Atangi Amadivulu Metu Ebhula
Kyoso Jezú kyabhange o Seyalu ya Ngana, kwebhi kwexile o 70 a maxibulu a atumikisine phala kuboka? O kwila amubwazekele?
Kyoso Jezú kyabhange o Seyalu ya Ngana, o 70 a maxibulu kexile-bhu. Kitutokala kubanza kwila, kuma kexile-bhu, Jezú ka axikinine mba ene amubwazeka. Jezú wamesenene ngo kukala ni jipoxolo jê mu kithangana kyenyokyo.
Kikale o 12 mba o 70, enyoso exile maxibulu a Jezú. Kya dyanga ku maxibulu mê, Jezú wasolo-bhu 12 kya jipoxolo. (Luk. 6:12-16) Mwene wexile ku Ngalileya kyoso kyexana “o kwinyi ni kiyadi kya jipoxolo” ni kwila “wa atumikisa phala kuboka o Utuminu wa Nzambi ni kusaka o jihaxi.” (Luk. 9:1-6) Anga kyakexile mu Judeya, Jezú “wasolo dingi makwinyi a sambwadi, yu wa atumikisa kiyadi-kiyadi.” (Luk. 9:51; 10:1) Mu kiki, Jezú wexile ni maxibulu avulu mu ididi mwabokele yalungu ni mwene.
O Jijudé akituka maxibulu a Jezú, ku muvu ni muvu nange exile mubhanga o fesa ya Phasu kumoxi ni miji yâ. (Mak. 12:6-11, 17-20) Mu kuzukama o kithangana kyê kya kufwa, Jezú ni jipoxolo jê ayi mu Jeluzaleme. Maji mwene kexana o maxibulu oso exile mu Judeya, mu Ngalileya ni ku Peleya nayi kwenyoko, nabhange kumoxi o fesa ya Phasu. Mu kithangana kyenyokyo, Jezú wamesenene ngó kukala ni jipoxolo jê. Mwene wa ambela: “Nga mesenene kyavulu kudya o Phasu yiyi ni enu, ande dya kutala o hadi.”—Luk. 22:15.
Jezú wejidile kyambote se mukonda dyahi wabhange kiki. Kwakambele ngó mwene weji fwa. O Bibidya yamba kwila Jezú, mwéne “o Kambudi ka Nzambi, kakatula o kituxi mu ngongo!” (Nzw. 1:29) Mwene weji fwa mu Jeluzaleme, bhwakexile mubhana jisata kwa Nzambi. O kambudi ka Phasu kexile mulembalesa o akwa Izalayele kwila, Jihova wa akatula ku Ijitu. Maji bhukaxi ka sata yê Jezú weji bhanga dingi. Mwene weji bhulula o athu oso ku ituxi ni kalunga! (1 Ko. 5:7, 8) Mukonda dya sata ya Jezú, o 12 kya jipoxolo eji kituka o kaboko ka kilunga kya Jikidistá. (Efe. 2:20-22) O Jeluzaleme ya dyulu yala ni “kwinyi ni kiyadi kya matadi a kaboko, ku matadi enyá a soneka-ku o majina a kwinyi ni kiyadi kya jipoxolo ja Kambudi.” (Dij. 21:10-14) O jipoxolo ja fiyele eji kala ni kikalakalu kya katunda. Kyenyiki-phe tutena kutendela se mukonda dyahi Jezú wamesenene kukala kumoxi ni ene mu fesa yoyo ya Phasu ni kubhanga nawu o Seyalu ya Ngana.
O 70 ni maxibulu engi kexile mu Seyalu kumoxi ni Jezú. Né kiki, o maxibulu oso eji kala fiyele eji katula mbote ku Seyalu ya Ngana. O maxibulu oso eji kituka Jikidistá ja undu, eji bokona mu kikutu kya utuminu kyazwela Jezú ku jipoxolo jê mu usuku wenyó.—Luk. 22:29, 30.