Xinganeka Kala Kixinganeka Jihova ni Jezú

1-2. O kuzola Jihova ni kilunji kyetu kyoso kyalungu ni ihi? Kyebhi Jezú kyalondekesa kwila wazolele Jihova ni kilunji kyê kyoso?

“ZOLA Jihova Nzambi yé, ni muxima wé woso ni mwenyu wé woso, ni nguzu yé yoso, ni kilunji kyé kyoso.” (Luk. 10:27) Jezú walondekesa kwila o kitumu kiki kyene kyabeta kota mu Ijila ya Mozé. Etu twazolo Jihova ni muxima wetu woso, ni nguzu yetu yoso, ni kilunji kyétu kyoso. Kuzola Jihova ni kilunji kyetu kyoso kyalungu ni ixinganeku yetu. Kidi kwila nuka twanda tena kutendela o ixinganeku yoso ya Jihova, maji phala kutendela o ixinganeku ya Nzambi, twatokala kudilonga o kilunji kya Kidistu. Mukonda Jezú uxinganeka kala Tat’ê.—1 Ko. 2:16.

² Jezú wazolo Jihova ni kilunji kyé kyoso. Jezú wejidile se ima yebhi yamesenene Nzambi kwila mwene wibhanga, mwene wexile polondo phala kubhanga kiki ne mwene mu kwijiya kwila eji mutalesa hadi. Kuma mwene wa mesenene ngo kusangulukisa Tat’ê, mwene kehela kima kyoso-kyoso kumulandukisa.

3. Poxolo Phetele ni jipoxolo jamukwa exile ni ujitu webhi? Phetele wa swinisa o Jikidista kubhanga ihi? (1 Phetele 4:1)

³ Phetele ni jipoxolo jamukwa exile ni ujitu wa kwenda ni Jezú ni kudilonga ni mwene. Poxolo Phetele wa swinisa o Jikidista kubanza kala kibanza Kidistu. (Tanga 1 Phetele 4:1.) Phetele watumbula izwelu yene muzwela o masoladi, Phetele wixi: ‘Kalenu polondo.’ Kyenyiki se o Jikidista a banza kala kibanza Jezú, ene andatena kubhânga ni Satanaji ni mundu wê.—2 Ko. 10:​3-5; Efe. 6:12.

4. Ihi itwanda dilonga mu milongi yiyi?

⁴ Mu milongi yiyi twanda dilonga o ukexilu wa Jezú wa kuxinganeka, ni kyebhi kitutena kukayela o phangu yé. Twanda dilonga kyebhi kitutena (1) kukayela o ukexilu wa Jihova wa kuxinganeka, o ukexilu yu wanda tukwatekesa kukala ni muxima umoxi, (2) kulenduka, ni (3) kukala ni ibanzelu yambote kyoso kituya ni kudyelela kwa Jihova.

XINGANEKA KALA KYENE MUXINGANEKA JIHOVA

5. Kyebhi poxolo Phetele kyalondekesa kwila mwene kexile mubanza kala kibanza Jihova?

⁵ Sayi kizuwa Phetele kabanze kala kibanza Jihova. Jezú wambe ku jipoxolo je kwila wejikuya ku Jeluzaleme, kwenyoko eji mutalesa hadi ku atwameni a jingeleja, eji ku mupapela kutaka ni kumujibha. (Mat. 16:21) Phetele wejidile kwila Jezú mwene o Mexiya amukanene weji bhulula o mundu wa Nzambi. Phetele kyamubhonzele kyavulu kuxikina kwila Jihova weji kwehela Jezú kufwa. (Mat. 16:16) Kyenyiki Phetele wambata Jezú kumbandu yu wamwambela: “Dikwatele henda Ngana! Kiki, ki kyanda bhita n’eye.” (Mat. 16:22) Kuma Phetele kexile muxinganeka kala Jihova, katenene we kuxinganeka kala Jezú.

6. Kyebhi Jezú kyalondekesa kwila wexile mubanza kala kibanza Tat’ê?

⁶ Jezú wakexile jinga mubanza kala kibanza Jihova. Kyenyiki Jezú wambela Phetele: “Tunda bhabha Satanaji! Eye wadibhange uditadi dya ku dibhukana, mukonda o ima i uxinganeka ki ya Nzambi kana, maji ya athu.” (Mat. 16:23) Jezú wejidile o vondadi ya Jihova yalungu ni mwene. Mwene wejidile kwila watokalele kutala hadi ni kufwa. Sumbala Phetele wamesenene kukwatekesa Jezú, maji Jezú waditunu o izwelu ya Phetele. Kyenyiki Phetele wadilongo kwila watokalele kukala ni ibanzelu ya Jihova, netu we kyene.

7. Kyebhi Phetele kyalondekesa kwila wa mesenene kukala ni ibanzelu ya Jihova? (Tala ofoto yakapa.)

⁷ Mukubhita ithangana Phetele walondekesa kwila wamesenene kukala ni ibanzelu ya Jihova. Kyokyo kyexile kithangana kya Jihova kuxikina o athu akwa jixi jengi phala abhange we mbandu ku mundu wé. Phetele amubhana o kikalakalu kya kubokela Kolonelyu. Koloneliyu wexile o muthu wadyanga, mukwa ixi yengi wakituka Kidista. O Jijude kawabhelele kudilunga ni athu akwa jixi jengi. Mukonda dya kiki, Phetele wabhingile kulungulula o ukexilu wê wa kubanza na tene kubokela o athu akwa jixi jengi. Kyoso Phetele kyatendela kyebhi Jihova kyexile mumona o athu akwa jixi jengi, mwene walungulula o ibanzelu yê. Mukonda dya kiki, kyoso kya mutumikisa, mwene waxikina “se hele”. (Ika. 10:​28, 29) Phetele wa bokela Kolonelyu ni mwiji wê anga a abatizala.—Ika. 10:​21-23, 34, 35, 44-48.

8. Kyebhi kitutena kulondekesa kwila twamubanza kala kibanza Jihova? (1 Phetele 3:8 ni Nota)

⁸ Kupholo dya kwenda, Phetele waswinisa o Jiphange “kubanza mu ukexilu umoxi.” (Tanga 1 Phetele 3:8 ni Nota.) Se tukala ni ibanzelu ya Jihova, o ibanzelu yala mu Bibidya, twanda banza mu ukexilu umoxi. Jezú watendelesa o maxibulu me kuta kupholo o Utuminu wa Nzambi kumwenyu wâ. (Mat. 6:33) Mu kiki, xinganeka kwila phangyetu mukilunga umesena kukala muboki wa thembu yoso mba kubhanga ikalakalu yamukwa mu sidivisu ya thembu yoso. Muveji dya kumutangela phala kusola kima kyengi, twatokala kuzwela ima yambote yalungu ni mbambe yaxindi mwene ni kumukwatekesa.

KALA U MUTHU WA LENDUKA

9-10. Kyebhi Jezú kyalondekesa kwila walendukile kyavulu?

⁹ M’usuku ande dya kufwa, Jezú walongo kwa Phtele ni maxibulu amukwa disá dyalungu ni kulenduka. Mu kizuwa kyenyokyo mu kamene, Jezú watumu Phetele ni Nzwá kusokejeka o ima ni kididi bhweji dila Jezú ni jipoxolo jê ande dya kufwa. Nange ene atudile mbasiya ni ditwaya phala kusukula o inama ni maku ande dya kudya. Maji nanyi wexile o muthu walenduka phala kusukula o inama ni maku a ene oso?

¹⁰ Jezú mwene wabhange o kikalakalu kiki. Mwene walondekesa kwila walendukile kyavulu, o jipoxolo a diwanene kyavulu mukumona Jezú kubhanga o kikalakalu kyexile mubhanga o abhika. Jezú wakatula o divunga dyê wakwata ditwaya, wadikutu nadyu mu mbunda, wate menya mu mbasiya yu wamateka kusukula o inama ya jipoxolo. (Nzw. 13:​4, 5) Nange kwabhiti ithangana yavulu phala kusukula o inama ya 12 ya jipoxolo jê kate mwene ya Juda weji musumbisa. Jezú, ni mwanyu woso wa atangela: “O kwila mwatendela o kima ki nga mi bhange? Enu mwene mu ng’ixana, ‘Mesene’ ni ‘Ngana,’ kidi ki mwazwela, mukonda éme mwene. Se eme ngi Ngana, ngi Mesene, nga mi sukula o inama, enu wenu, mwatokala kudisukula o inama mudyenu.”—Nzw. 13:​12-14.

11. Kyebhi Phetele kyalondekesa kwila wexile muthu walenduka? (1 Phetele 5:5) (Tala we ofoto.)

¹¹ Phetele wadilongo ni phangu ya Jezú ya kulenduka. Kyoso Jezú kyavutuka kudyulu, Phetele wasake diyala a muvwalele kinema. (Ika. 1:​8, 9; 3:​2, 6-8) Mukonda dya madiwanu ya, athu avulu adiwanene kyavulu ni mwene. (Ika. 3:11) Maji Phetele kamesenene kwila o athu adiwana ni mwene, sumbala amuvwala mukididi o athu a wabhelele kyavulu o fuma. Muveji dya kiki, Phetele walendukile, mwene waswinisa o athu kuximana Jihova ni Jezú, mwene wa atangela: “Bhukaxi ka dijina dya Jezú, ni kixikanu kyetu mu dijina dyê, o diyala didi mwa mu mumona, mwa mwijiya we kyambote, wadisanze.” (Ika. 3:​12-16) Ku pholo dya kwenda, Phetele wasonekena o Jikidistá o valolo ya kulenduka. Phetele watumbula kizwelu mu dimi dya Ngeleku, kilombolola kuzwata o kulenduka, kifwa Phetele wasokesa o kulenduka ni kizwatu. Kiki kitulembalesa o kithangana kyoso Jezú kyakutu ditwaya bhu mbunda yé yu wasukula o inama ya jipoxolo jê.—Tanga 1 Phetele 5:5.

12. Kyebhi kitutena kukayela o phangu ya poxolo Phetele wa kulenduka?

¹² Tutena kukayela o phangu ya poxolo Phetele mukukala tu athu alenduka. O muthu walenduka kazwele kwila eme ngalenduka. O kizwelu kyatumbula Phetele yalungu ni kulenduka, kyalungu ni kyebhi kitudixinganeka etu mudyetu, ni kyebhi kituxinganeka akwetu. Etu kitukwatekesa akwetu mukonda twamesena fuma, maji twakwatekesa mukonda twazolo Jihova ni kwila twa azolo wê. Etu tulondekesa o kulenduka kwakidi, kyoso kitusanguluka mukusidivila Jihova ni jiphange jetu, ne mwene kyoso kamutumona.—Mat. 6:​1-4.

KALA NI “KILUNJI”

13. Ihi ibhanga o muthu wala ni “kilunji.”

¹³ O muthu mukwa “kilunji” ukala kyebhi? (1 Ph. 4:7) O Kidista mukwa kilunji ande dya kubatula maka mba ande dya kusola kima, usota hanji kwijiya o kibanzelu kya Jihova. Mwene wejiya kwila o ukamba we ni Jihova kyene o kima kyabeta kota ku mwenyu wê. Mwene utendela kwila kejiye o ima yoso, mukiki ubhinga kikwatekesu kya Jihova bhukaxi ka musambu.

14. Mukonda dyahi Phetele wakambele kudyelela kwa Jihova?

¹⁴ Musuku ande dya kufwa, Jezú wambe ku maxibulu mê: “Mu usuku wenyú enu-oso mwanda ngixisa, mukonda dya ima yanda bhita n’eme.” Phetele wamutambwijila ni kuswina kwoso: “Né mwene ene oso yá akuxisa, mukonda dya ima yanda bhita n’eye, eme ki nganda kuxisa, kana!” M’usuku wenyo Jezú wambele dingi ku maxibulu mê: “Kolokotenu-phe mu kudilanga, sambenu jinga.” (Mat. 26:​31, 33, 41) Phetele ka bhana matwi mu itendelesu ya Jezú, se wabhele matwi mwene hinu keji kala ni woma wa kuzwela kwila wexile dixibulu dya Jezú. Maji mu kudituna Jezú, kiki kyamubhekela kikote kumuxima.—Mat. 26:​69-75.

15. Kyebhi Jezú kyalondekesa kwila wadyelele jinga kwa Jihova?

¹⁵ Jezú wadyelele jinga kwa Jihova. Sumbala wexile muthu wa yuka, maji ne kiki wexile musamba ithangana yoso. Kiki kyamubhana nguzu phala kubhanga o vondadi ya Jihova. (Mat. 26:​39, 42, 44; Nzw. 18:​4, 5) Se phata Phetele nuka wajimbi kwila mu usuku ande dya Jezú kufwa mwene wasambele kyavulu.

16. Kyebhi Phetele kyalondekesa kwila wa kitukile Kidista wa kulu mu nzumbi? (1 Phetele 4:7)

¹⁶ Mukubhita ithangana Phetele wamateka dingi kudyelela kwa Jihova yu wakexile musamba kyavulu. Kyoso Jezú kya mufukununa, mwene wambe kwa Phetele ni ku jipoxolo jamukwa kwila ene eji tambula o nzumbi ikola phala kuboka o njimbu yambote. Maji Jezú wa atangela phala nakale ku Jeluzaleme kate kyeji tambula o nzumbi ikola. (Luk. 24:49; Ika. 1:​4, 5) Ihi yexile mubhanga Phetele kyoso kyayi ni kukingila? O Bibidya yamba “Ene oso anga akolokota mu kusamba.” (Ika. 1:​13, 14) Kupholo dya kwenda Phetele waswinisa o jiphange kukala ni kilunji ni kusamba jinga kwa Jihova. (Tanga 1 Phetele 4:7.) Phetele wa dilongo kudyelela kwa Jihova, yu wa tena kukwatekesa ni kuswinisa o jiphange mu kilunga.—Nga. 2:9.

17. Ne mwene se twala ni mauhete avulu twatokala kusuluka mukubhanga ihi? (Tala we ofoto.)

¹⁷ Phala kukala ni kilunji twatokala kusamba jinga kwa Jihova. Twatokala kusamba jinga kwa Jihova ne mwene se twala ni mauhete avulu, benge-benge kyoso kitwanda sola kima kyabetakota kumwenyu wetu. Twatokala kusamba kwa Jihova mu ku mubhinga kikwatekesu, ni kumudyelela kwila mwene wejiya o kima kyabetakota phala etu.

18. O kwila tutena kulungulula o ukexilu wetu wa kuxinganeka phala tukayele kyambote o ukexilu wa Jihova kuxinganeka?

¹⁸ Tusanguluka kyavulu mukwijiya kwila Jihova watubhange ni kutena kwakukayela o idifwa yé. (Dim. 1:26) Kidi kitutena kukayela o idifwa ya Jihova ni kuyuka kwoso. (Iza. 55:9) Maji kala kyabhiti ni Phetele, twamesena kusuluka kuxinganeka kala kixinganeka Jihova, tusote jinga kukala tu athu alenduka, athu ala ni kilunji kyambote.