Suluka mu Kulondekesa Kwila ‘Wabhindamena Nzambi’

1. Ima yebhi itwabhindamena phala kukala ku mwenyu? (Matesu 5:3)

JIHOVA wejiya o ima yabhindamena o athu. Mukifika, phala kukala ku mwenyu twabhindamena kudya, izwatu ni inzo. Se kitukala ni ima yiyi o mwenyu wetu utena kubhonza kyavulu mba tutena mwene kufwa. Kumbandu yengi Jihova wabhange we o athu ni kibhindamu kya kumwijiya. (Tanga Matesu 5:3.) Se twamesena kusanguluka mu kidi, twatokala kwijiya kwila twabhindamena Nzambi ni kwila twatokala kumudyelela.

2. Ibhidi yebhi yene mudibhana nayu o jingadyama?

² O izwelu “yó ejiya kwila abhindamena Nzambi” mu dimi dya Ngeleku ilombolola “jingadyama mu nzumbi.” Kiki kitubhangesa kuxinganeka ku ngadyama ubhinga jimola. Mwene uxikama mukikoka, o izwatu yê yatandujuka. Mwene kene mudya kudya kwa soko, kyoso o kuma kukya mwene wivwa kalolo kavulu mukonda dya mwanya, mu usuku wivwa mbambi yavulu. O athu akala mumusebhulula kyavulu mukonda dya kiki mwene uluwala kyavulu ni kwila utohoka we kyavulu. O ngadyama yu wejiya kwila phala kukala ku mwenyu wabhindamena o kikwatekesu kya athu. Kyene we kimoxi, o jingadyama mu nzumbi ejiya kwila phala kusanguluka kumwenyu ene abhindamena Nzambi. Ene atokala kudilonga o itendelesu yoso ibhana Jihova kwa yo wa azolo.

3. Ihi i twanda mona mu milongi yiyi?

³ Mu milongi yiyi twanda mona se ihi i tutena kudilonga ni muhatu mukwa Fenixa wadyondela kikwatekesu kya Jezú. O musoso yu ulondekesa idifwa itatu yatokala kukala nayu yo ejiya kwila abhindamena Nzambi. Mu kusuluka twanda mona o phangu ya Phetele, Phawulu ni Davidi, o mayala alondekesa kwila abhindamene Nzambi.

O PHANGU YA KULENDUKA, YA KUKOLOKOTA NI YA KIXIKANU

4. Mukonda dyahi muhatu umoxi mukwa Fenixa wayi kate kwa Jezú?

⁴ Sayi kizuwa muhatu umoxi mukwa Fenixa wayi kate kwa Jezú. O mon’ê wa muhatu exile “mu mu zukutisa ku dimonyo.” (Mat. 15:​21-28) O muhatu wafukama, yu wadyondela Jezú phala kumukwatekesa. Kindala twanda dilonga idifwa itatu yalondekesa o muhatu yu ni kyebhi ki tutena kukayela o phangu yé.

5. Idifwa yebhi yalondekesa o muhatu mukwa Fenixa ni ihi yabhange Jezú? (Tala we o foto.)

⁵ O muhatu mukwa Fenixa walondekesa kulenduka. Mukonda dyahi tuzwela kiki? Mukonda mwene kaluwala ni ukexilu wazwela Jezú ni mwene. Mwene wamusokesa ni kana ka imbwa. Nange o athu ki Jijudé exile ni jimbwa ku mabhata mâ. Ihi i weji bhanga se Jezú wakutangele o ima yiyi? O kwila weji luwala ni kwila ki weji mubhinga dingi kikwatekesu? Ki kyene kyabhange o muhatu mukwa Fenixa, mwene kalondekesa ngo o kulenduka, maji wakolokotele we. Mwene wasuluka mukudyondela Jezú phala kumukwatekesa. Mukonda dyahi? Mukonda dya kixikanu kyê kwa Jezú. Mu kumona o kixikanu kyê kyakolo, Jezú wamukwatekesa. Sumbala mwene watangela kwa muhatu kwila amutumine “ngó ku jimbudi ja jimbidila ja dibhata dya Izalayele,” Jezú wakaye o dimonyo dyexile muzukutisa o mona wa muhatu yu.

6. Ihi itutena kudilonga ni phangu ya muhatu mukwa Fenixa?

⁶ Phala kulondekesa kwila twabhindamena Nzambi, twatokala kukala ni idifwa yiyi. Twatokala kukala tu athu alenduka, kukolokota ni kukala ni kixikanu kyakolo. Se o muthu usuluka mu kudyondela Nzambi mu kumubhinga kikwatekesu, kiki kilondekesa kwila mwene walenduka. Twatokala we kulondekesa kixikanu kyakolo kwa Jezú Kidistu ni kwa yo a asolo phala kwendesa o maxibulu mê. (Mat. 24:​45-47) Se tu londekesa o idifwa yiyi, Jihova ni Monê Jezú anda sanguluka mu kutukwatekesa kulanga o ibhindamu yetu mu nzumbi. (Sokesa ni Tiyaku 1:​5-7.) Kindala twanda mona se ihi yene mutubhana Jihova phala kutukwatekesa mu nzumbi. O phangu ya poxolo Phetele, ya Phawulu ni ya sobha Davidi, yanda tukwatekesa kwijiya se ihi itwatokala kubhanga phala kukatula mbote mu yoso yene mutubhana Jihova.

KAYELA O PHANGU YA POXOLO PHETELE MU KUDILONGA O BIBIDYA

7. Ujitu webhi watambula Phetele ni ihi yatokalele kubhanga mwene? (Jihebelewu 5:14–6:1)

⁷ Tala o phangu ya poxolo Phetele. Mwene wexile mwaxaxi ka Jijudé adyangele kuxikina kwila Jezú mwéne o Mexiya, yo exile mu mwendesa kwa Jihova phala kudisa o mundu we ni “maka a mwenyu wakalelaku.” (Nzw. 6:​66-68) Ande dya kuvutuka ku dyulu, Jezú wambe kwa Phetele: “Disa o tumbudi twami.” (Nzw. 21:17) Phetele wabelesela Jezú, yu walongo o jiphange mu ilunga. Ku pholo dya kwenda Jihova wamubhangesa kusoneka mikanda iyadi yala mu Bibidya. Ne kiki Phetele wabhindamene we kudidikila mu nzumbi. Mu kifika mwene wexile mudilonga o mikanda yasonekene poxolo Phawulu. Phetele waxikinine kwila sayi ima yasoneka Phawulu ‘yabhonzele ku itetuluka.’ (2 Ph. 3:​15, 16) Maji mwene wasuluka mu kudilonga o ima yiyi. Mwene waxikinine kwila Jihova weji mukwatekesa kutetuluka o ima yiyi ni kukumbidila o ima yexile mudilonga mu mikanda ya Phawulu.—Tanga Jihebelewu 5:14–6:1.

8. Kyoso kyatambula kitendelesu kya ubhe ku anju, ihi yabhange Phetele?

⁸ Kuma Phetele wexile ni kixikanu kyakolo, mwene wexile mutumaka o itendelesu ya Jihova. Mu kifika, kyoso kyexile mu mbanza ya Jope, Phetele wamonene kisumwa. Mu kisumwa, sayi anju yatumu Phetele phala kujibha ni kudya yama yofidise mu Kijila kya Mozé. Kuma Phetele wexile Judé, mwene wamono kwila kituxi kubhanga kiki. Mu kiki mwene watambwijila kiki o anju: “Kana Ngana, mukonda kiluwa ngi dya kima kyayibha mba kyaxidi.” Mu kusuluka, o anju yamutangela: “Yazelesa Nzambi, kana ku izwela kwila yaxidi.” (Ika. 10:​9-15) Phetele watetuluka o vondadi ya Jihova, yu walungulula o ukexilu wê wa kuxinganeka. Kyebhi ki twejiya o maka enyá? Kyoso Phetele kyazubha kumona o kisuma kiki, mayala atatu ayile mu mukunda. Kolonelyu wexile mukwa ixi yengi, mwéne watumine o mayala enyó. Ene exana Phetele phala kuya kudibhata dya ngana yâ, Kolonelyu. O Jijudé exile mumona akwa jixi jengi kala athu axidi. Mu kiki se kamonene o kisumwa, Phetele keji xikina kubokona mu inzo ya Kolonelyu. (Ika. 10:​28, 29) Maji ni lusolo Phetele waxikina o kitendelesu kyamubhele Jihova. (Jisa. 4:18) Mwene wabokela Kolonelyu, o jindandu jê ni makamba mê akexile kubhata dyê. Phetele wasanguluka kyavulu mu kwamona kuxikina o kidi, kutambula o nzumbi ikola ni kwa abatizala.—Ika. 10:​44-48.

9. Ima yebhi iyadi itubhangesa kudilonga o milongi yazongo ya Mak’â Nzambi?

⁹ Kala kyabhange Phetele, twatokala kudilonga jinga o milongi ya dyanga ya Mak’â Nzambi. O milongi yiyi a isokesa ni lete. Twatokala we kukala ni hanji ni kukatula kithangana kyasoko phala kudilonga o milongi yazongo ya Mak’â Nzambi, sumbala sayi bhabha kubhonza ku itetuluka. O milongi yiyi a isokesa ni kudya kwa nguzu. Mukonda dyahi twatokala kutetuluka o milongi yiyi? Mukonda dya ima iyadi. Kyadyanga, twanda dilonga ima yanda bandekesa o henda yetu ni kuxila kwetu kwa Jihova. Kayadi, twanda kala dingi ni hanji ya kuzwela ku athu yalungu ni Tat’etu ya dyulu. (Lom. 11:33; Dij. 4:11) O phangu ya Phetele itulonga we kwila, kyoso kyalungulula ukexilu wetu wa kutetuluka o milongi ya Mak’â Nzambi, ni lusolo twatokala we kulungulula o ukexilu wetu wa kuxinganeka ni ibhangelu yetu. Se tubhanga kiki, twanda tena kukula mu nzumbi ni kusidivila Jihova ni ufiyele woso.

KALA POXOLO PHAWULU, ZWATENU O UKEXILU WA UBHE

10. Kala kyamba o divulu dya Kolose 3:​8-10, ihi i twatokala kubhanga phala kusangulukisa Nzambi?

¹⁰ Phala kusangulukisa Nzambi, twatokala we kuzwata o ukexilu wa ubhe. Kiki kilombolola ihi? Poxolo Phawulu wasoneka kwila twatokala kuzula “o ukexilu wokulu” ni kuzwata “o ukexilu wa ubhe.” (Tanga Kolose 3:​8-10.) Phala kubhanga kiki kubhinga kithangana ni nguzu. Tala yabhiti ni Phawulu. Kyoso kyexile munzangala, wexile mubhanga nguzu yavulu phala kusangulukisa Nzambi. (Nga. 1:14; Fil. 3:​4, 5) Maji mwene kexile ni kwijiya kwa kidi kwalungu ni vondadi ya Nzambi, mu kiki wexile ngadyama mu nzumbi. Phawulu kejidile o milongi ya Kidistu, wexile mukwa ukumbu, ‘wakakele we kyavulu.’ (1 Ti. 1:13) Kiki kyedile kala Phawulu wazwatele o ukexilu wayibha.

11. Nguzu yebhi yatokalele kubhanga Phawulu?

¹¹ Ande dya kukituka kidistá, Phawulu wexile mukwa njinda. O divulu dya Ikalakalu 9:1 dyamba kwila Phawulu wakexile “mu kwatesa wôma ku maxibulu a Ngana ni kumesena kwajibha.” (Ika. 9:1) Sé phata kyoso Phawulu kyakituka kidistá, mwene wabhange nguzu phala kweha o wendelu wê wokulu. (Efe. 4:​22, 31) Né kiki Phawulu watondalele. Kyoso mwene ni Balanabé ‘kyazoko,’ Phawulu wexile ni njinda yavulu. (Ika. 15:​37-39) Mu kithangana kyenyokyo, Phawulu kabhange o kima kyamesenene Nzambi. Maji wasuluka ‘mu kubhana jihuxi ku mukutu wê,’ kifwa o kubhanga nguzu phala kweha o ukexilu wê wokulu ni kusangulukisa Nzambi.—1 Ko. 9:27.

12. Mukonda dyahi Phawulu watena kulungulula o ukexilu wê?

¹² Phawulu watena kulungulula o ukexilu wê mukonda walendukile ni kwila kexile mudyelela mu nguzu yê. (Fil. 4:13) Kala kyabhangele Phetele, Phawulu wexile mudyelela “mu kutena kubhana Nzambi.” (1 Ph. 4:11) Né kiki, sayi bhabha Phawulu wexile muluwala mukonda dya itondalu yê. Kyoso o ima yiyi yexile mubhita, Phawulu wakexile mubanza mu ima yambote yexile mubhanga o Tat’ê yadyulu phala mwene. Kiki kyexile mu mukwatekesa kukala dingi polondo phala kulungulula o ukexilu wê.—Lom. 7:​21-25.

13. Kyebhi kitutena kukayela o phangu ya Phawulu?

¹³ Tutena kukayela o phangu ya Phawulu mu kwijiya kwila, kikale se twamusidivila kya Jihova mu mivu yavulu, twatokala kusuluka mu kuzwata o ukexilu wa ubhe utubhana Jihova. Phala kubhanga kiki twatokala kusuluka mu kuzula o ukexilu wokulu ni kuzwata o ukexilu wa ubhe. Se tulondekesa ukexilu wayibha, kala o kukala ni njinda mba kuzwela kyayibha ni muthu, kitutokala kubanza kwila tu athu ayibha. Mu veji dya kiki, twatokala kusuluka mu kubhanga nguzu phala kulungulula o ukexilu wetu wa kubanza ni ibhangelu yetu. (Lom. 12:​1, 2; Efe. 4:24) Twabhingi kulembalala o kima kiki: Se twamesena kusuluka mu kuzwata o ukexilu wa ubhe, twatokala kwijiya kyambote Jihova ni kumwehela kutulonga.

KALA DAVIDI, SULUKA MU KWEHELA JIHOVA KU KULANGA

14-15. Kyebhi Jihova kyene mutulanga? (Jisálamu 27:5) (Tala we yakapa.)

¹⁴ Kyoso Jihova kyatulanga, tusanguluka mu kidi. Kyebhi Jihova kyene mutulanga ni kyebhi kitutena kumwehela kubhanga kiki?

¹⁵ Sobha Davidi wazwela yalungu ni kilangidilu kyene mu tubhana Jihova. (Tanga Jisálamu 27:5.) Jihova utulanga ku kima kyoso-kyoso mba muthu woso-woso utena kuzozesa o kixikanu kyetu. Mwene ukanena kwila falamenda yoso-yoso yobhange phala ku tukwama, yanda lweza. (Jisá. 34:7; Iza. 54:17) Satanaji, o madimonyo mê ni athu ene mutuzukutisa ala ni kutena. Maji Jihova wala dingi ni kutena, ene ndenge. Né mwene se atujibha, ku hadya Jihova wanda tufukununa. (1 Ko. 15:​55-57; Dij. 21:​3, 4) Jihova utulanga we ku hele itena kutufidisa o kumubheza. (Jisa. 12:25; Mat. 6:​27-29) O Tat’etu ya henda utubhana jiphange atukwatekesa ni tufunga ene mu twinga. (Iza. 32:​1, 2) Kyoso ki tuya mu yonge, tudilonga maukexilu a mukwa mututena kwehela Jihova kutukwatekesa ni kutulanga.—Jih. 10:​24, 25.

16. Ihi yexile mubhanga Jihova kwa Davidi?

¹⁶ Kyoso Davidi kyexile mubelesela Jihova, Jihova wexile mu mulanga ni kumukwatekesa kusola kyambote o ima. Kiki kyexile musangulukisa Davidi. (Sokesa ni Jisabhu 5:​1, 2.) Maji kyoso kyabhukumukina Jihova, Davidi watale hadi yavulu. (2 Sam. 12:​9, 10) Mu ithangana ya mukwa, Davidi exile mu mutalesa hadi ku athu. Kyoso o athu kyexile mubhanga kiki, Davidi wexile mutangela kwa Jihova yoso yexile mu mutandanganyesa. Jihova wexile mu mukonda o malamba ni ku muswinisa, wexile we mu mudyelelesa kwila wamuzolo ni kwila weji mulanga.—Jisá. 23:​1-6

17. Kyebhi kitutena kukayela o phangu ya Davidi?

¹⁷ Tutena kukayela o phangu ya Davidi mu kusota o itumu ya Jihova, ande dya kusola kima. Twejiya we kwila sayi bhabha tutala hadi mukonda dya kusola kyayibha, ki mukonda dya Jihova kukamba kutulanga. (Nga. 6:​7, 8) Kyoso kitutala hadi mukonda dya ima ibhanga akwetu, tutangela kwa Jihova yoso yala ku mixima yetu, tudyelela we kwila mwene wanda tukonda o malamba metu ni kutuswinisa.—Fil. 4:​6, 7.

SULUKA MU KULONDEKESA KWILA ‘WABHINDAMENA NZAMBI’

18. (a) Mukonda dyahi mazunda ni mazunda a athu aluwala kyavulu? (b) Kyebhi kitutena kusuluka mu kulondekesa kwila twabhindamena Nzambi? (Tala we o jifoto.)

¹⁸ O velusu ya muvu wa 2026 yamba: “Azediwa yó ejiya kwila abhindamena Nzambi.” Kindala twatokala mwene kulondekesa kwila twabhindamena Nzambi. Mazunda ni mazunda a athu aluwala kyavulu. Mukonda dyahi? Mukonda kaxikina kwila abhindamena Nzambi. Amukwa axikina kwa Nzambi, maji amubheza mu ukexilu wayibha. Amukwa hanji adyelela mu itumu ya athu. Kitutokala kwehela o athu yá kutufunyisa. Kyebhi kitutena kusuluka mu kulondekesa kwila twabhindamena Nzambi? Mu kukatula mbote mu milongi yoso i tubhana Jihova, mu kuzwata o ukexilu wa ubhe ni mu kusuluka kusota o kilangidilu kya Jihova.