Mukonda Dyahi Twatokala Kubhinga Itendelesu?

1. Kyebhi kitutena kusola o ima yanda tubhekela mbote? (Jisabhu 13:10; 15:22)

ETU enyoso twamesena kusola ima yanda tubhekela mbote. O Mak’â Nzambi atutangela kwila phala kubhanga kiki, twatokala kubhinga itendelesu.—Tanga Jisabhu 13:10; 15:22.

2. Jihova utukanena ihi?

² Mu kidi, o Muthu wabeta kota phala kutubhana o itendelesu, o Tat’etu ya dyulu, Jihova. Mu Maka mê, mwene utukanena: “Ngi ku bhana kayula, kuma nga ku te mwene dyesu.” (Jisá. 32:8) O izwelu yiyi ilondekesa kwila Jihova katubhana ngo kitendelesu kyoso-kyoso, mwene utubhana o kitendelesu kitwabhindamena. Ku mbandu yamukwa, mwene utukwatekesa we kukumbidila o kitendelesu kyatubhana.

3. Ibhwidisu yebhi i twanda tambwijila mu milongi yiyi?

³ Mu milongi yiyi twanda tambwijila ibhwidisu iwana: (1) Kidifwa kyebhi ki ngatokala kukala nakyu phala kukatula mbote ku itendelesu yangibhana? (2) Nanyi utena kungibhana itendelesu yambote? (3) Kyebhi kingitena kulondekesa kwila ngamesena mwene o kitendelesu? (4) Mukonda dyahi kingatokala kubhinga phala akwetu asole o ima bhu kididi kyami?

KIDIFWA KYEBHI KI NGATOKALA KUKALA NAKYU?

4. Kidifwa kyebhi kitwatokala kukala nakyu phala kukatula mbote ku itendelesu yene mutubhana?

⁴ Phala kukatula mbote ku itendelesu yene mutubhana, twatokala kulenduka. Kima kyambote kuxikina kwila kitwejiya o ima yoso ni kwila twabhingi kikwatekesu phala kubatula o maka nuka twadibhele nawu. Se kitukale tu athu alenduka, Jihova kanda tena kutukwatekesa. Mu kiki twanda mona kwila kitwabhingi kukayela o itendelesu itubhana mwene bhukaxi ka Bibidya. (Mik. 6:8; 1 Ph. 5:5) Maji se tukala ni kidifwa kiki, twanda xikina o itendelesu itusanga mu Bibidya ni ku ikumbidila ku mwenyu wetu.

5. Ima yebhi yeji bhangesa Davidi kukala mukwa ukumbu?

⁵ Tumone se ihi i tutena kudilonga ku phangu ya Sobha Davidi. Mwene wabhange ima yavulu yambote, né kiki kexile mudizangeleka. Mu kifika, mivu ande dya kukala sobha, mwene wafumanene mukonda wexile ngimbidi ya katunda. Katé mwene amwixanene phala kwimba mu inzo ya sobha Sawulu. (1 Sam. 16:​18, 19) Kyoso kyamu undu phala kukala sobha, o nzumbi ya Jihova yabhana kutena kwa Davidi. (1 Sam. 16:​11-13) Mwene wafumenene mu Izalayele mukonda watolwele o jinguma jâ, katé mwene Ngoliya, wexile dizonda, mukwa Fidíxa. (1 Sam. 17:​37, 50; 18:7) Se Davidi wexile mukwa ukumbu, weji xinganeka kiki: ‘Kuma ngabhange kya ima yavulu yamakota, kingabhindamena dingi kitendelesu kya muthu!’ Maji kikyene kyaxinganeka.

6. Kyebhi kitwejiya kwila Davidi wawabhelele kutambula itendelesu? (Tala we yakapa.)

⁶ Kyoso kyakituka sobha, Davidi wasolo makamba eji tena kumubhana itendelesu yambote. (1 Mal. 27:​32-34) Kiki ki kima kya kudiwana mukonda ande dya kukituka sobha, Davidi wexile kya mubhana matwi ku itendelesu yambote. Davidi kexile ngo muxikina o itendelesu ya mayala, maji waxikinine we o kitendelesu kya muhatu amwixana Abingayíle. Mwene wexile muhatu wa Nabale. Nabale wexile diyala mukwa ukumbu, wakambele kisakidilu, kexile we muxila akwa. Ku mbandu ya mukwa Davidi walendukile. Mwene wakayela o kitendelesu kyamubhele Abingayíle, kiki kyamukwatekesa kukamba kutondala.—1 Sam. 25:​2, 3, 21-25, 32-34.

7. Ihi i tutena kudilonga ku phangu ya Davidi? (Ndongixi 4:13) (Tala we o jifoto.)

⁷ Tutena kudilonga ima yavulu ku phangu ya Davidi. Nange twejiya kubhanga ima yavulu mba twala ni ungana. Né kiki, kitwatokala kubanza kwila twejiya kya yoso, kitwabhindamena dingi itendelesu. Kala kyabhange Davidi, twatokala kukala polondo phala kwivwa itendelesu, kabasa muthu utubhana nakyu. (Tanga Ndongixi 4:13.) Se tubhanga kiki, kitwanda dibhekela maka mba kubhekela maka ku akwetu.

NANYI UTENA KUNGIBHANA ITENDELESU YAMBOTE?

8. Mukonda dyahi Jonatá wabhana itendelesu yambote kwa Davidi?

⁸ O phangu ya Davidi itulonga we kima kyengi. Mwene wexile mukwivwa o itendelesu ya athu exile makamba a Jihova, athu ejidile o ibhidi yexile mudibhana nayu mwene. Mu kifika, kyoso mwene kyamesenene kwijiya yatokalele kubhanga phala kukala ni paze ni sobha Sawulu, Davidi wevu o kitendelesu kya Jonatá, sumbala wexile mon’â Sawulu. Mukonda dyahi Jonatá wabhana itendelesu yambote kwa Davidi? Mukonda Jonatá wexile ni ukamba wambote ni Jihova ni kwila wejidile kyambote tat’ê, Sawulu. (1 Sam. 20:​9-13) Kiki kitulonga ihi?

9. Kyoso kitubhindamena itendelesu yambote, twabhingi kusota ananyi? Bhana phangu. (Jisabhu 13:20)

⁹ Kyoso kitubhindamena kikwatekesu, twabhingi kusota muthu wala ni ukamba wambote ni Jihova ni kwila wala ni kwijiya kwalungu ni maka utwamudibhana nawu.a (Tanga Jisabhu 13:20.) Mu kifika, xinganeka ku munzangala wa diyala wamesena kukazala. Nanyi utena kumubhana itendelesu yambote? Nange kamba dyê kakazala utena kumubhana kitendelesu kyambote kyala mu Bibidya. Maji mwene utena kudilonga dingi ku kitendelesu kyanda mubhana ku dikaza amwijiya kyambote, asanguluka we mu kusidivila Jihova. Kiki kibhita mukonda o dikaza didi anda mutangela o itendelesu ya Bibidya ni ima yene mumona mu ukaza wâ.

10. Ihi i twanda dilonga kindala?

¹⁰ Twadilongo kya o kidifwa kitukwatekesa kuxikina o itendelesu. Kindala twanda dilonga se kyebhi ki tutena kulondekesa kwila twamesena mwene o kitendelesu, ni mukonda dyahi kitutokala kubhinga phala akwetu asole o ima bhu kididi kyetu.

KYEBHI KINGITENA KULONDEKESA KWILA NGAMESENA MWENE O KITENDELESU?

11-12. (a) Kitwatokala kubhanga ihi? (b) Ihi yabhange Sobha Lobowamu kyoso kyexile phala kubatula maka?

¹¹ Sayi bhabha, o muthu utena kubhinga itendelesu ku akwa, maji wasolo kya o kima kyanda bhanga. Mu kidi mwene wamusota ngo muthu uxikina o kima kyasolo mwene. O muthu wala ni ukexilu yu ulondekesa kwila kabhindamena kitendelesu. Mwene watokala kudilonga ku phangu ya Sobha Lobowamu.

¹² Lobowamu wakituka Sobha kyoso tat’ê Solomá kyafu. Mu kithangana kyenyokyo o kifuxi kya Izalayele kyexile ni ima yavulu yambote, maji o athu afikile kwila Solomá wexile mwa ajijidika kukalakala kyavulu. O mundu wayi kwa Lobowamu phala kumudyondela nasosolole o kikalakalu kyâ. Lobowamu wa atangela phala kukingila. Ku dimatekenu wabhange kyambote, wayi mubhinga kitendelesu ku adyakime exile mukwatekesa tat’ê Solomá. (1 Jis. 12:​2-7) Maji mwene kakayela o kitendelesu kyamubhana o adyakime yá. Mukonda dyahi mwene wabhange kiki? O kwila Lobowamu wasolele kya o kima kyeji bhanga, yu wamesenene ngo kwila adyakime axikina o kima kiki? Kyoso o makamba mê kyamutangela o kima kyamesenene kwivwa, mwene waxikina o ndunge yâ. (1 Jis. 12:​8-14) Mwene wakayela o kitendelesu kyâ, anga wabhange yamutangela ene. Mukonda dya kiki, athu amubhukumukina ya asolo sobha yengi. Mu kusuluka, Lobowamu wadibhele ni maka avulu.—1 Jis. 12:16-19.

13. Phala kwijiya se twamesena mwene kwivwa o kitendelesu, twabhingi kudibhwidisa ihi?

¹³ Tutena kudilonga madisá ni ima yabhiti ni Lobowamu. Kyoso kitubhinga kitendelesu, twatokala kwivwa ni muxima woso o ima yamututangela o muthu. Phala kwijiya se twamesena mwene kwivwa o kitendelesu, twabhingi kudibhwidisa: ‘O kwila ngixikina kukayela o kitendelesu, se kikyene o kima kingamesenene kwivwa?’ Tumone dingi kifika kyengi.

14. Kyoso kitutambula itendelesu, twatokala kulembalala ihi? Bhana phangu. (Tala we ofoto.)

¹⁴ Xinganeka kwila, phange yadiyala kwamumoneka salu anda mufuta kitadi kyavulu. Ande dya kuxikina o salu yiyi, mwene ubhinga kitendelesu ku kafunga. O phange utangela ku kafunga kwila o salu yiyi yanda mubhangesa kukala dikanga dya mwiji wê mu ithangana yavulu. O kafunga umutangela kwila o kikalakalu kyabeta-kota kya mutwameni wa mwiji, o kudikila o ibhindamu mu nzumbi ya mwiji wê. (Efe. 6:4; 1 Ti. 5:8) Kindala xinganeka kwila o phange yú kaxikina o kitendelesu kya kafunga, uya dingi musota itendelesu ku athu engi, katé kyasanga muthu umutangela phala kuxikina o salu yiyi. Mu kidi, o kwila wamusota mwene kitendelesu? Inga wasolo kya kima anga wamusota ngo muthu uxikina yasolo mwene? Twatokala kulembalala kwila o muxima wetu ubhomba kinene. (Jel. 17:9) Sayi ithangana, o kitendelesu kitwabhindamena, kikyene kitwamesena kwivwa.

MUKONDA DYAHI KINGATOKALA KUBHINGA PHALA AKWETU ASOLE O IMA BHU KIDIDI KYAMI?

15. Twabhingi kudilanga ku ihi, ni mukonda dyahi?

¹⁵ Kala muthu mudyetu mwéne watokala kusola o ima. (Nga. 6:​4, 5) Kala kitwamono, o muthu wala ni unjimu ande dya kusola kima, mwene usota o itendelesu mu Mak’â Nzambi ni ku jiphange akulu mu nzumbi. Maji twabhingi kudilanga phala kitwehele akwetu kusola bhukididi kyetu. Sayi athu abhanga o kibhwidisu kiki ku athu a axila: ‘Ihi i weji bhanga se weji dibhana ni maka yá?’ Amukwa akayela ngo o ima ibhanga akwa, sé kuxinganeka dingi ku maka.

16. Ihi yatokalele kubhanga o Jikidistá ku Kolindu yalungu ni kudya xitu yosatele o iteka? (1 Kolindu 8:7; 10:​25, 26)

¹⁶ Xinganeka ku kima kyabhiti mu kilunga kya Kolindu, ku hama ya dyanga. O jiphange exile muxinganeka se atokalele kudya mba kana o xitu yosatele o iteka. Phawulu wasonekena kiki o Jikidistá jiji: “Mu kidi etu twejiya kwila o iteka ki jinzambi kana, maji kwene ngó Nzambi imoxi.” (1 Ko. 8:4) Mu kuxinganeka mu izwelu yiyi, sayi jiphange asolo kudya o xitu yosatele o iteka, o xitu yexile musumbisa bhu kididi kya kusumbisa o xitu. (Tanga 1 Kolindu 8:7; 10:​25, 26.) Kala muthu mwene watokalele kusola se udya mba kana. Phawulu kaswinisa o jiphange mu kilunga kya Kolindu kusola o ima bhukididi kya akwa, mukonda kala muthu mudya weji “bhakula jikonda kwa Nzambi.”—Lom. 14:​10-12.

17. Ihi itena kubhita se tukayela ngo o ima isola akwetu? Bhana phangu. (Tala we o jifoto.)

¹⁷ Kyebhi o kima kiki kitena we kubhita lelu? Xinganeka mu maka alungu ni jimbandu jofele (frações) ja manyinga.b Kidi kwila kala muthu watokala kusola se uxikina mba kana o jimbandu jiji jofele. Sayi bhabha kubhonza kutendela o maka enyá. Maji kala Kidistá mwéne watokala kusola yanda bhanga. (Lom. 14:4) Se tukayela ngo o ima ibhanga akwetu, kitwanda kala tu jinjimu, mukonda o muthu ukala ngo njimu se usola o ima bhukaxi ka itendelesu yala mu Bibidya. (Jih. 5:14) Kyenyiki-phe, kithangana kyebhi kitwatokala kubhinga kikwatekesu ku Kidistá wakulu mu nzumbi? Tubhanga kiki kyoso kitwatokwesa kya o maka mu Bibidya, anga sayi itendelesu kitwamono se kyebhi kitutena ku ikayela mu maka utwamudibhana nawu.

SULUKA MU KUSOTA ITENDELESU

18. Jihova ubhanga ihi kokwetu?

¹⁸ Jihova ulondekesa kwila watudyelela mu kutwehela kusola o ima. Mwene watubhana o Mak’â mê, o Bibidya, ni makamba ala jinjimu atukwatekesa kutendela o itumu yê yala mu Bibidya, ni ku ikumbidila. Mu kubhanga kiki Jihova utulanga kala Tat’etu yakazola. (Jisa. 3:​21-23) Ihi i tutena kubhanga phala kumusakidila?

19. Kyebhi kitutena kusuluka mu kusangulukisa Jihova?

¹⁹ Xinganeka mu maka yá: O jitata asanguluka kyavulu mu kumona o twana twâ kukala jiselevende ja Jihova akulu mu nzumbi, kukala jinjimu ni kukwatekesa akwa. Kyene we kimoxi, Jihova usanguluka kyoso kyatumona kukula mu nzumbi, mu kusota itendelesu ni mu kusola ima imubhana kijingu.