Kyebhi Kitutena Kubhana Itendelesu Yambote?

1. Ananyi atokala kubhana itendelesu ni mukonda dyahi?

EYE wawabhela kubhana itendelesu? Sayi ya ki kya abhonzo kubhana itendelesu. Maji athu amukwa akala ni woma mba hele ya kubhanga kiki. Kithangana ni kithangana, etu enyoso twanda bhinga kubhana itendelesu. Mukonda dyahi? Mukonda Jezú wambe kwila o akayedi’ê a kidi eji kwa ejiya mukonda dya henda yeji dilondekesa mudya. (Nzw. 13:35) Ukexilu umoxi wakulondekesa o henda yiyi, o kubhana itendelesu ku jiphange kyoso kyabhindamena kikwatekesu. O Mak’â Nzambi amba kwila ‘o ukamba wa kidi’ utena kwijila mu ‘itendelesu ya kidi.’—Jisa. 27:9.

2. O tufunga atokala kwijiya kubhanga ihi, ni mukonda dyahi? (Tala we o kaxa “Itendelesu Itutambula mu Kyonge Kya Kaxi ka Semana.”)

² Benge-benge o tufunga atokala kwijiya kubhana itendelesu yambote. Jihova ni Jezú asolo o mayala yá phala kwinga o kilunga. (1 Ph. 5:​2, 3) O tufunga ene mubhanga kiki, kyoso kyamubhanga madiskulusu. Ene abhingi kubhana itendelesu ku jiphange joso, kate mwene kwa yó atundu mu kilunga. Kyebhi etu ni tufunga, kitutena kubhana itendelesu yambote?

3. (a) Kyebhi kitutena kudilonga kubhana itendelesu yambote? (Izaya 9:6; tala we o kaxa “Kayela o Phangu ya Jezú mu Kubhana Itendelesu.”) (b) Ihi itwanda dilonga mu milongi yiyi?

³ Tutena kwijiya kubhana itendelesu yambote mu kudilonga o phangu ya athu otumbule mu Bibidya, benge-benge o phangu ya Jezú. Dijina dimoxi dyatambula Jezú, dyenyidi: “Ndongixi.” (Tanga Izaya 9:6.) Mu milongi yiyi, twanda dilonga se ihi itutena kubhanga phala kubhana itendelesu kyoso kyatubhinga, ni ihi itutena kubhanga kyoso kyakamba kutubhinga. Twanda mona we o mbote ijila mu kubhana o itendelesu mu kithangana kyatokala ni mu ukexilu watokala.

KYOSO KYATUBHINGA ITENDELESU

4-5. Kyoso muthu kyatubhinga itendelesu, twatokala kubhanga ihi? Ta kifika.

⁴ Kyoso o muthu kyatubhinga itendelesu, kyadyanga twatokala kubhanga ihi? Nange eye usanguluka kyavulu, mukonda dya kiki umesena kya kumubhana itendelesu. Maji kyadyanga twabhingi hanji kudibhwidisa: ‘O kwila ngafwama kubhana itendelesu mu maka yá?’ Sayi ithangana o ukexilu wambote wakukwatekesa kamba dyé, o kusanga muthu utena ku mukwatekesa mu maka wamudibhana nawu.

⁵ Mu kifika, xinganeka kwila kamba dyé dya kazola wamukata. Mwene ukutangela kwila wamateka kya kutokwesa o maukexilu akusaka o uhaxi wê. Anga ukubhinga kikwatekesu. Nange eye ubanza kwila o ukexilu umoxi wabeta-kota, o maukexilu amukwa ndenge. Maji eye ulembalala kwila kiwala u musaki kana. Mu kiki, o ukexilu wambote wa kukwatekesa kamba dyé, o kusanga musaki utena kumukwatekesa mu uhaxi wala nawu.

6. Ihi i watokala kubhanga ande dya kubhana itendelesu?

⁶ Né mwene se wafwama kubhana itendelesu ku muthu, nange wabhingi kukingila o kithangana kyatokala phala kutambwijila o muthu wakubhingi kikwatekesu. Mukonda dyahi? O divulu dya Jisabhu 15:28 dyamba kwila “muxima wa muthu wayuka, uxinganeka kyoso kya tokala kukumbulula.” Se ufika kwila wejiya kya o kitambwijilu, ihi iwatokala o kubhanga? Eye watokala hanji kusamba, kutokwesa ni kuxinganeka. Se ubhanga kiki wanda dyelela kwila o kitambwijilu kyé kyalungu ni kibanzelu kya Jihova. Tala yabhiti ni polofeta Natane.

7. Ihi itutena kudilonga ku kima kyabhiti ni polofeta Natane?

⁷ Sobha Davidi watangela kwa polofeta Natane kwila wamesenene kutunga tembulu phala Jihova. Ni lusolo Natane wamutangela phala kubhanga kiki. Maji Natane watokalele hanji kwibhwidisa Jihova. Mukonda dyahi? Mukonda Jihova kamesenene kwila Davidi utunga o tembulu. (1 Mal. 17:​1-4) O phangu yiyi ilondekesa kwila kyoso muthu kyatubhinga kitendelesu, kima kyambote ‘kukokoloka mukuzwela.’—Tiy. 1:19.

8. Kima kyahi kitubhangesa kudilanga ande dya kubhana kitendelesu ku muthu?

⁸ Xinganeka ku kima kyengi kitubhangesa kudilanga ande dya kubhana kitendelesu ku muthu. Xinganeka kwila tubhana kitendelesu kyayibha, anga o muthu ubhita mu ibhidi. Etu we twanda kala ni kikuma. Mukiki-phe, ande dya kubhana kitendelesu twabhingi hanji kubanza kyambote.

KYOSO KYAKAMBA KUTUBHINGA ITENDELESU

9. Ande dya kubhana itendelesu, kyadyanga o tufunga abhingi kwijiya ihi? (Ngalásya 6:1)

⁹ Sayi bhabha o tufunga abhingi kubhana kitendelesu kwa phange “wa muditela mu njila yayibha.” (Tanga Ngalásya 6:1.) O muthu wamuditela mu njila yayibha, usola ima itena ku mubhangesa kuta kituxi kya dikota. O tufunga amesena kwila o muthu yu usuluka mu kusidivila Jihova, n’atambule o mwenyu wakalelaku. (Tiy. 5:​19, 20) Maji phala kubhana kitendelesu kyambote, kyadyanga o tufunga abhingi kwijiya kwila o muthu wamuditela mwene mu njila yayibha. Mukonda se o muthu usola kubhanga kima ki kyadifu ni kima kyamesena o tufunga, kiki ki kilombolola kwila mwene wamubhukumukina Jihova. (Lom. 14:​1-4) Maji se o tufunga amona kwila sayi phange wadite mwene mu njila yayibha, ihi yatokala kubhanga phala kumubhana kitendelesu kyambote?

10-12. Ihi yatokala kubhanga o tufunga kyoso kyabhana itendelesu ka abhingi nayu? Bhana kifika. (Tala we o jifoto.)

¹⁰ Kubhonza phala o tufunga kubhana kitendelesu ku muthu ka abhingi nakyu. Mukonda dyahi? Poxolo Phawulu wambe kwila sayi bhabha o muthu kamona kwila wabhindamena kikwatekesu. Ande dya kubhana kitendelesu ku muthu, kwala hanji ima yatokala kubhanga o tufunga.

¹¹ Kubhana kitendelesu kyakamba kutubhinga nakyu, kyadifu ni kukuna o jimbutu mu mavu akolo. Ande dya kukuna o jimbutu, o kidimakaji udyanga hanji kusokejeka o mavu. Kiki kyanda bhangesa o jimbutu kusabhuka kyambote. Kudisukilu, o kidimakaji wanda tekela o jimbutu phala jene jikule kyambote. Kyene we kimoxi, ande dya kubhana kitendelesu katubhingi-nakyu, kwala hanji ima yatokala kubhanga o tufunga. Mu kifika, o kafunga ukingila o kithangana kyatokala, utangela kwa phange kwila wamuzolo ni kwila wamesena kuzwela-nê. Se o kafunga wanda bhana o kitendelesu amwijiya kala mukwa henda, ki kyanda bhonza phala o jiphange kuxikina o itendelesu yê.

¹² Kyoso kyaya ni kudizwelesa, o kafunga usuluka mu kusokejeka o mavu mu kulembalesa o phange kwila etu enyoso tu akwa ituxi, kithangana ni kithangana twabhingi kutambula itendelesu. (Lom. 3:23) Ni kadizwi ka henda ni kuxila kwoso, bhukaxi ka Bibidya o kafunga ulondekesa kwa phange o kitondalu kyê. Kyoso o phange kyaxikina kwila watondala, o kafunga ukuna o jimbutu, mu kumutangela o ima yatokala kubhanga mwene phala kukala ni ukamba wambote ni Jihova. Kudisukilu, o kafunga “utekela” o jimbutu, mu kuzwela o ima yambote yene mubhanga o phange, anga usamba-nê.—Tiy. 5:15.

13. Kyebhi o tufunga kyatena kwijiya kwila o muthu amubhana kitendelesu wakitendela kyambote?

¹³ Sayi bhabha o muthu watambula o kitendelesu ukamba ku kitendela kyambote. Ihi itena kubhanga o tufunga phala o maka ya kabhite? Ni henda yoso, ene atena kubhanga ibhwidisu phala kumona se o muthu watendela o kitendelesu ni ihi yatokala kubhanga phala ku kikayela.—Ndo. 12:11.

BHANA O KITENDELESU MU KITHANGANA KYATOKALA NI MU UKEXILU WATOKALA

14. Mukonda dyahi kitutokala kubhana itendelesu kyoso kitukala ni njinda?

¹⁴ Etu enyoso tu akwa ituxi, sayi kithangana twanda bhanga mba kuzwela kima kyanda luwalesa akwetu. (Kol. 3:13) O Bibidya yamba kwila tutena kukala ni njinda mba kubhangesa akwetu kukala ni njinda. (Efe. 4:26) Maji kitutokala kubhana kitendelesu kyoso kitukala ni njinda. Mukonda dyahi? Mukonda “o njinda ya muthu ki ibhekela kuyuka bhupholo ya Nzambi.” (Tiy. 1:20) Se tubhana kitendelesu kyoso kitukala ni njinda, mu veji dya kubatula o maka twanda kwavudisa dingi. Kiki ki kilombolola kwila kitutokala kuzwela ni muthu watukwatesa njinda, o ima itubanza. Maji twanda tena kuzwela kyambote o ibanzelu yetu, kyoso kitwanda tululuka. Tudilonge ku phangu ya Edihu wabhana kitendelesu kyambote kwa Jobe.

15. Ihi itutena kudilonga ku phangu ya Edihu? (Tala we ofoto.)

¹⁵ Edihu wabhiti izuwa yavulu mu kwivwa Jobe mu kudizokela mukonda dya kitatelu kya makamba mê atatu a makutu. Edihu wamukwatela henda. Maji Jobe wazwela ima phala kulondekesa kwila wayukile, yu wazwela ima kiyatokalele yalungu ni Jihova. Mukonda dya kiki Edihu njinda yamukwatele. Né kiki, mwene wakingila o kithangana kyê phala kukwatekesa Jobe. Kyoso kyabhange kiki, wa kibhange ni kutululuka kwoso ni kuxila kwoso. (Jobe 32:2; 33:​1-7) O phangu ya Edihu itulonga disá dya katunda: Kyoso kitutululuka, kyene o kithangana ki twatokala kubhana o kitendelesu. O kuzwela ni henda yoso ni kuxila kwoso, wene o ukexilu watokala wakubhanga kiki.—Ndo. 3:​1, 7.

SULUKA MU KUBHANA NI KUXIKINA O ITENDELESU

16. O divulu dya Jisálamu 32:8 ditulonga ihi?

¹⁶ O velusu ya milongi yiyi ilondekesa kwila ‘Jihova utubhana kitendelesu ni mesu mê kokwetu.’ (Tanga Jisálamu 32:8.) Kiki kilondekesa kwila Jihova wene mutukwatekesa jinga. Mwene katubhana ngo o itendelesu, maji utukwatekesa we ku ikayela. Yiyi phangu yambote phal’etu! Mu kukayela o phangu ya Jihova, kyoso kitubhana kitendelesu ku akwetu, twabhingi we kusuluka mu kwa akwatekesa ku ikayela.

17. Mukonda dyahi kima kyambote kukala ni tufunga atubhana itendelesu itwabhindamena? (Izaya 32:​1, 2)

¹⁷ Kindala kyene o kithangana kitwabhingi dingi kubhana ni kutambula o itendelesu, mu ukulu ndenge. (2 Ti. 3:1) O tufunga abhana itendelesu bhukaxi ka Bibidya ni mu kithangana kyatokala, ala kala “jingiji ja menya mu mikáwu ya kukuta.” (Tanga Izaya 32:​1, 2.) Kyoso o kamba dyetu wejiya o kima kitwamesena kwivwa, né kiki utangela o kima kitwabhindamena kwivwa, mwene utubhana kima kyala ni valolo yavulu “kala jimasá ja ulu bhu mabandeja ma phalata.” (Jisa. 25:11) Mu kiki twabhingi kukala ni unjimu utwabhindamena phala kubhana ni kutambula itendelesu.