MBANDU YAKUDILONGA 44
MWIMBU 138 O Jimvi Kitundu Kya Ujitu
Sanguluka ku Mwenyu wé Sumbala Wakuka Kya
“ Katé ni mu ukukilu, hanji ema ibundu.”—JISÁ. 92:14.
ITWANDADILONGA
Twanda dilonga se mukonda dyahi o adyakime akuka kya atokala kusuluka ni kusanguluka ni kyebhi kyatena kubhanga kiki.
1-2. Ihi ibanza Jihova yalungu ni jiselevende jê jakuka kya? (Jisálamu 92:12-14; tala we o yakapa.)
SAYI athu kyoso kyamukuka asanguluka mukonda ejiya kwila o kukuka kijingu kyadikota. Maji amukwa kyoso kyamukuka aluwala kyavulu. Mu kifika sayi ya kyoso kyamona jimvi ku mutwe, ene ajikatula, ne kiki o jimvi jiya ni kudibandekesa. Kiki kilondekesa kwila kitutena kulenga o kukuka.
2 Maji ihi ibanza o Tat’etu ya dyulu yalungu ni jiselevende je jakuka kya? (Jisa. 16:31) Jihova wa asokesa ni mixi yafwama. (Tanga Jisálamu 92:12-14.) Mukonda dyahi? Mukonda o mixi yala ni mivu yavulu, ya beta dingi kota mu kufwama, yene yala ni mafwe avulu ni itulu yavulu. Mu kifika mu ixi ya Japão mwala mixi yala ni mivu yavulu. Amoxi ku mixi yiyi yala ni midi ya mivu ndenge, yene yafwama kyavulu. Kala o mixi yiyi, Jihova ubhana valolo yavulu mu idifwa yambote yala nayu o jiselevende jê akuka kya. Ene, ene kya mumusidivila mu mivu yavulu, ya amusuluka mukumusidivila ni ufiyele woso kikale mu ithangana yabhonzo mba mu ithangana yambote.
Sayi mixi kyoso ki ikala ni mivu yavulu ifwama dingi, isuluka ni kubhana ibundu. O adyakime akuka kya amusidivila Jihova ni ufiyele woso, ala ni valolo bhu pholo yê (Tala okaxi 2)
3. Kyebhi Jihova kyabhange ikalakalu yakatunda bhu kaxi ka adyakime?
3 Jihova usuluka mukutubhana valolo ne mwene se twakuka kya.a Mu kidi Jihova wabhange ikalakalu yakatunda bhu kaxi ka adyakime. Mu kifika Sala wakukile kya kyoso kyamutangela kwila weji kala mama ya kifuxi kyadikota ni kwila o Mexiya weji kwijila bhu kaxi ka mbutu yê. (Dim. 17:15-19) Mozé wakukile kya kyoso Jihova kyamutumikisa phala kukatula o akwa Izalayele mu ixi ya Ijitu. (Mak. 7:6, 7) Poxolo Nzwá wakukile kya kyoso Jihova kyamutumina kusoneka o Bibidya. Mwene wasoneka madivulu atanu.
4. Jihova utena kukwatekesa o adyakime akuka kya kubhanga ihi? (Jisabhu 15:15) (Tala we ofoto.)
4 O adyakime akuka kya adibhana ni ibhidi yavulu mukonda dya kukuka. Sayi mwadyakime wa muhatu wakuka kya, wambe: “O kukuka uhaxi.” Maji Jihova utena kukwatekesa o adyakime akuka kya kusangulukab sumbala ni ibhidi. (Tanga Jisabhu 15:15.) Mu milongi yiyi twanda dilonga se ihi yatokala kubhanga o adyakime akuka kya phala kusuluka ni kusanguluka ku myenyu yâ. Twanda dilonga we kyebhi o jiphange mu kilunga kyatena kukwatekesa o adyakime. Maji, kyadyanga twanda dilonga hanji se mukonda dyahi kubhonza kusanguluka mu ukukilu.
O kusanguluka kukwatekesa o adyakime akuka kya, kudibhana kyambote ni ibhidi ijila mukonda dya kukuka (Tala okaxi 4)
IMA YEBHI ITENA KULUWALESA O ADYAKIME AKUKA KYA?
5. Ihi itena kuluwalesa o adyakime akuka kya?
5 Ihi itena kukuluwalesa? Nange uxinganeka mu ima iwexile mubhanga mu ukulu, maji kindala kiwamutena dingi ku ibhanga. Nange wamesena dingi kukala munzangala ni kukala ni sawidi yambote. (Ndo. 7:10) Mu kifika sayi phange ya muhatu amwixana Rubi wambe: “Kungibhonza kyavulu kuzwata ubheka wami mukonda dya jindolo jingene mukwivwa. Kungibhonza we kyavulu kuta o jimeya. Ngivwa jindolo javulu ku maku, kiki kingibhonzesa we kubhanga ikalakalu yengi yabhebhuluka.” Phange Haroldy wasidivila ku betele wambe: “Sayi bhabha ngikala ni njinda kyoso ki ngibanza mu ima ingexile mu bhanga mu ukulu. Eme ngawabhelele kyavulu kujokala, o athu exile mu zwela kiki: ‘Bhanenu o bola kwa manu Haroldy mukonda mwene wanda tukwatekesa kunganyala.’ Lelu ne mwene kutakula ngo o bola kingitena dingi.”
6. (a) Ima yebhi dingi itena kuluwalesa o adyakime akuka kya? (b) Ihi itena kukwatekesa o adyakime akuka kya kusola se anda suluka mu kwendesa dikalu mba kana? (Tanga o milongi yiyi mu Mulangidi yu ni dyambu: “O Kwila Ngatokala Kweha Kwendesa Dikalu?”)
6 Eye we utena kuluwala mukonda sayi ima ki utena ku ibhanga dingi ubheka we. Kiki kibhita benge-benge se wandaya mutunga ni mon’é mba sayi muthu wanda kala mukwiza kubhata dyé phala ku kulanga. Nange kiwamutena dingi kwendesa dikalu, mba kuya kididi kyoso-kyoso mukonda kiwala dingi ni nguzu yavulu mba ki wamumona dingi kyambote. Kiki kikuluwalesa kyavulu! Maji lembalala kwila Jihova ni akwenu akuzolo kyavulu, sumbala kiwamutena dingi kubhanga o ima iwexile mubhanga mukulu. Tutena kudyelela kwila Jihova utendela kyebhi kitwamudivwa. Jihova wejiya kwila eye wamuzolo ni kwila wazolo we o jiphange mu nzumbi. Mukonda dya kiki mwene wakuzolo kyavulu.—1 Sam. 16:7.
7. Ihi itena kukwatekesa yo aluwala mukonda amubanza kwila kanda tena kumona o dizubhilu dya mundu yu?
7 Nange eye waluwala mukonda wamubanza kwila kiwanda tena kumona o dizubhilu dya mundu yu. Ihi itena kukukwatekesa se wamubanza kiki? O kulembalala kwila Jihova wamukingila we ni mwanyu woso o kithangana kyanda bwika o mundu yu wayibha. (Iza. 30:18) Mukonda dyahi Jihova wamukingila ni mwanyu woso? Mukonda mwene wamesena kwila athu avulu amwijiye, anga amusidivila. (2 Ph. 3:9) Kyenyiki kyoso ki uluwala, lembalala kwila athu avulu atena kwijiya Jihova ni kwabhulula kudizubhilu dya mundu yu. Amoxi ku athu ya atena mwene kukala o jindandu jé.
8. Kyoso o adyakime akuka kya kyamukata, sayi bhabha azwela mba abhanga ihi?
8 Kikale se tuminzangala mba twa kuka kya, kyoso kitukata sayi bhabha tuzwela mba tubhanga ima itubhangesa kudyela. (Ndo. 7:7; Tiy. 3:2) Mukifika, Jobe kyoso kyexile mutala hadi, wazwela “sè ku xinganeka.” (Jobe 6:1-3) O adyakime akuka kya sayi bhabha azwela mba abhanga ima keji ku ibhanga se kakukile hanji. Nange ene abhanga kiki mukonda dya uhaxi mba mukonda dya milongo ya munwa. Kikale se twakuka kya mba twahaxila, kitwatokala kukwatela njinda ku akwetu mba kukingila kwila ene abhanga ngo o ima itwamesena. Mukiki se tumona kwila twazwela kima kyaluwalesa mukwetu, twatokala kumubhinga muloloki.—Mat. 5:23, 24.
KYEBHI O ADYAKIME KYATENA KUSULUKA NI KUSANGULUKA?
Ihi i utena kubhanga phala kusuluka ni kusanguluka sumbala ni ibhidi ijila mukonda dya kukuka? (Tala ojikaxi 9-13)
9. Mukonda dyahi wabhingi kuxikina o kikwatekesu kya akwenu? (Tala we o jifoto.)
9 Xikina o kikwatekesu kya akwenu. (Nga. 6:2) Kudimatekenu nange kutena kukubhonza kuxikina o kikwatekesu kya akwenu. Phange yamuhatu amwixana Greti wambe: “Sayi bhabha kungibhonza kubhinga kikwatekesu ku akwetu, mukonda ngimona kwila ngamwabhana salu yavulu. Kwabhiti ithangana yavulu phala kuxikina kwila ngabhindamena kikwatekesu.” Kyoso ki uxikina o kikwatekesu kya akwenu, ene asanguluka. (Ika. 20:35) Eye wanda sanguluka mu kumona kwila akwenu akuzolo ni kwila amesena ku kulanga.
(Tala okaxi 9)
10. Mukonda dyahi watokala kusakidila o athu ene mukukwatekesa? (Tala we o jifoto.)
10 Sakidila o athu ene mukukwatekesa. (Kol. 3:15; 1 Te. 5:18) Kyoso o athu kyatukwatekesa, etu tudivwa kyambote, maji sayi bhabha tujimba kwasakidila. Maji se tu asakidila, ene anda mona kwila twa azolo kyavulu. Sayi phange ya muhatu amwixana Liya ulanga o adyakime akuka kya ku Betele, wambe: “Sayi phange ya muhatu ngene mu mulanga, wene mungisakidila jinga. Mwene wene musoneka tumikanda, eme ngawabhela kyavulu o tumikanda tutu. Mukonda ngimona kwila mwene usanguluka kyoso ki ngimulanga.”
(Tala okaxi 10)
11. Kyebhi ki utena kukwatekesa akwenu? (Tala we o jifoto.)
11 Bhanga yoso i utena phala kukwatekesa akwenu. Kyoso ki uxinganeka kukwatekesa akwenu, ki wanda dikwatenena kyavulu mu ibhidi yé. Sayi sabhu isokesa o adyakime ni madivulu atena kutulonga madisa avulu. Maji se o athu akamba kutanga o madivulu ya, ene kanda dilonga kima. Kyene we kimoxi, se eye ukamba kuzwela ni minzangala ene kanda kwijiya o ima i wejiya. U abhanga ibhwidisu anga wa evwa. U alonga kumona kwila o kubelesela o itumu ya Jihova kyene o kima kyabeta kota, o kubhanga kiki kyanda kwa sangulukisa. Kyoso kiwanda swinisa o makamba me minzangala kiki kyanda kukusangulukisa we.—Jisá. 71:18.
(Tala okaxi 11)
12. Kala kyamba o divulu dya Izaya 46:4, Jihova ukanena kubhanga ihi ku adyakime akuka kya? (Tala we o jifoto.)
12 Samba kwa Jihova phala kukubhana nguzu. Sumbala wanda tohoka, maji lembalala kwila Jihova “kene kuzônda, kene kubhwila.” (Iza. 40:28) Kyebhi Jihova kyakalakala ni kutena kwê kikwene mbambe? Ukexilu umoxi o kuswinisa o adyakime akuka kya amumusidivila. (Iza. 40:29-31) Mukidi Jihova ukanena kwa akwatekesa. (Tanga Izaya 46:4.) Jihova ukumbidila jinga o ikanenu yê. (Josu. 23:14; Iza. 55:10, 11) Kyoso ki usamba, Jihova wanda kubhana o nguzu i wabhindamena. Kyenyiki wanda mona kwila mwene wakuzolo kyavulu, kiki kyanda kusangulukisa.
(Tala okaxi 12)
13. Kala kyamba o divulu dya 2 Kolindu 4:16-18, twatokala kulembalala ihi? (Tala we o jifoto.)
13 Lembalala kwila ku hadya wanda kala dingi u munzangala. Kyoso kitumona kwila o kibhidi kitwamu dibhana nakyu kikyanda nangenena, kiki kitukwatekesa kukolokota. O Bibidya yamba kwila o kukuka ni mauhaxi anda bhwa. (Jobe 33:25; Iza. 33:24) Mukiki utena kusanguluka mukonda ku hadya wanda kala ni nguzu yavulu, sawidi ya yuka ni kubwingita dingi. (Tanga 2 Kolindu 4:16-18.) Kyebhi o jiphange mu kilunga kyatena kukwatekesa o adyakime?
(Tala okaxi 13)
KYEBHI O JIPHANGE MU KILUNGA KYATENA KUKWATEKESA O ADYAKIME?
14. Mukonda dyahi kima kyambote kukunda o jiphange akuka kya ni kwaxindila?
14 Kala ni ukexilu wa kukunda o jiphange akuka kya ni kwaxindila. (Jih. 13:16) Jiphange javulu akuka kya adivwa ubheka. Sayi phange amwixana Kamilu, katena dingi kutunda kubhata, wambe: “Eme ngene mukala kubhata suku ni mwanya. Sayi bhabha, ngidivwa kala hoji amukwika mu ngenda. Kiki kyangikumu kya!” Kyoso kitukunda o adyakime akuka kya tulondekesa kwila twa azolo kyavulu. Nange kyakubhitile kya, wamesenene kuxindila ku mwadyakime ya kilunga kye ni kumukunda maji ki watenene kubhanga kiki. Kiki kitena kubhita mukonda wala ni ima yavulu ya kubhanga. Mukiki, kyebhi kitutena ‘kwijiya o ima yabeta dingi kota,’ kala o kukunda o adyakime akuka kya? (Fil. 1:10) O kima kitena kukukwatekesa o kusoneka o kithangana kiwamesena kuxinda mba kukunda o mwadyakime wakuka kya wa kilunga kye. Muveji dya kuzwela ngo: ‘Sayi kizuwa twanda dibakana phala kuya mukukunda,’ kota o kuzwela o kizuwa kiwandaya mumukunda.
15. Ima yebhi itena kubhanga kumoxi o minzangala ni adyakime akuka kya?
15 Sayi minzangala kejiya se ima yebhi itena kuzwela ni kubhanga ni adyakime akuka kya. Maji kana kutandanganya ni kima kiki. Kala u dikamba dyambote. (Jisa. 17:17) Zwela ni adyakime akuka kya ande dya kumateka o kyonge ni kyoso kibhwa o kyonge. Nange utena kwa ebhwidisa o velesu ya Bibidya yawabhela dingi mba kukutangela o itonokenu yawabhelele dingi mu undenge wâ. Eye utena we kwa exana phala kutala o minangu ya JW Broadcasting®. Ku mbandu yengi eye utena kudibhakula phala ku akwatekesa kubhanga o ikalakalu katena dingi ku ibhanga. Mu kifika eye utena ku akwatekesa mu kumona se o mitelembe yâ yakafwetele yamu kalakala kyambote mba se ene ala ni madivulu a ubhe ni jividyu ja ubhe. Sayi mwadyakime wakuka kya amwixana Carol wambe: “Exana o adyakime phala kubhanga o ima iwawabhela kubhanga. Sumbala nga kuka kya, ngawabhela kusumba o ima yami, kudya ni makamba mami ni kutunda nawu phala kutonoka.” Sayi phange ya muhatu amwixana Maira wambe: “Ngala ni kamba dyami wala ni 90 a mivu. Eme ngala ni 33 kya mivu. Maji mu ithangana yavulu ngijimba kwila mwene wangitúndu mu mivu yavulu, mukonda twolela kyavulu, twene mutala we jifilime kumoxi. Kyoso kikumoneka maka, twene mudibhinga itendelesu.”
16. Mukonda dyahi kima kyambote kuxinjikila o adyakime akuka kya mu inzo ya kusaka?
16 Xinjikila o adyakime akuka kya mu inzo ya kusaka. Ambata-wu mu inzo ya kusaka, utena we kukala-mu phala kumona se o asaki anda kwa atalatala kyambote. (Iza. 1:17) Eye utena we kusoneka yoso yanda zwela o asaki. Sayi phange wakuka kya amwixana Lute wambe: “Sayi ithangana kyoso ki ngiya ubheka wami mu inzo ya kusaka, o asaki kene mungitalatala kyambote. Ene azwela ima kala yiyi: ‘Eye wamusaluka, eye kiwamu kata kana.’ Maji kyoso kyangixijikila, o ima yiyi kene mubhita. Ngisakidila kyavulu o jiphange ene mukatula kithangana phala kungixinjikila mu inzo ya kusaka.”
17. Ihi i utena kubhanga phala kuboka ni adyakime akuka kya?
17 Boka ni adyakime akuka kya. Sayi adyakime akuka kya katena dingi kuya mu boka inzo ni inzo. O kwila mu kilunga kyé mwala mwadyakime wakuka kya katena dingi kuya mu boka nzo ni inzo? Se mwala, eye utena kudibhakula phala kuboka-ne ni kadikalu ka madivulu. Nange eye utena kwiza ni kyalu phala mwene na xikame-ku. Se o mwadyakime wamutena hanji kwenda, utena kuya-ne kudibhata dya dixibulu dyé. Maji se kana, utena kulonga o dixibulu dyé ku dibhata dya phange wakuka kya. O tufunga atena we kutonginina se o kyonge kya kuboka kitena kubhita ku dibhata dya phange wakuka kya phala mwene natene kukatula mbote. Jihova usanguluka kyavulu kyoso kitulondekesa henda ni kuxila o adyakime akuka kya.—Jisa. 3:27; Lom. 12:10.
18. Ihi itwanda dilonga mu milongi ya kayela?
18 O milongi yiyi yatulembalesa kwila Jihova wazolo kyavulu o adyakime akuka kya, mwene u abhana we valolo. Etu twa azolo we kyavulu! Enu mwa adyakime mwakuka kya, sumbala mwene mukata kyavulu, ijiyenu kwila Jihova wanda mikwatekesa mu kusuluka mu kusanguluka. (Jisá. 37:25) Eye utena kukingila ni hanji yoso o kithangana kiwanda sanguluka dingi ku mundu wa ubhe! Maji kwala jiphange ene mudibhana ni ibhidi yengi. Sayi ya ene mulanga muthu ku mwiji wakuka kya, mona-ndenge mba dikamba wamukata. Ihi yatokala o kubhanga phala na suluke mu kusanguluka? Mu milongi yakayela twanda dilonga o maka enya.
MWIMBU 30 Kamba Dyami, Nzambi Yami, Tat’etu
a Tala mu jw.org ni mu JW Library® o vidyu ni dyambu Adiakimi—Enu Muala Ni Valolo Ia Dikota.