Atangi Amadivulu Metu Ebhula
Kwakambe ngo bhofele Jihova wandata “kixinganeku” kyebhi ku mixima ya jinguvulu?
Mukuzwela yalungu ni hadi ya dikota, o divulu dya Dijingunwinu 17:16, 17 dyamba: “O dikwinyi dya jingela ji wamono ni kyama kya muxitu, anda zemba o kidyanzunga, ene anda mu koka ni ku muzula, anda dya o xitu yê ni ku mwoha mu túbhya. Mukonda Nzambi wate ku mixima yâ, o vondadi ya kubhanga o kima kya mukala ku muxima. Kyene, o kubhanga o kixinganeku kyala ku mixima yâ, o kubhana o utuminu wâ ku kyama kya muxitu.” M’ukulu o madivulu metu exile muzwela kwila o “kixinganeku” kyandata Jihova ku mixima ya jinguvulu, o kubwika o jingeleja ja makutu.
Maji twabhingile kulungulula kima. O “kixinganeku” kyandata Jihova ku mixima ya jinguvulu, o “kubhana o utuminu wâ ku kyama kya muxitu.” Phala kutendela se kyebhi kyanda dikumbidila o kikanenu kiki, twanda tambwijila ibhwidisu itanu.
Ananyi abhanga mbandu ya kikanenu kiki? “O kidyanzunga” kyatambula o dijina “Babilonya ya dikota,” o kisangela kya jingeleja ja makutu. O “kyama kya muxitu kya kusuka,” o kibuka kya Nações Unidas. O kibuka kiki akibhange ku muvu wa 1919 phala kubheka paze ku mundu woso, exile mukixana Liga das Nações. (Dij. 17:3-5) “O dikwinyi dya jingela,” o jinguvulu joso jene mukwatekesa o kyama kya muxitu.
Ukamba webhi wala nawu o kidyanzunga ni kyama kya muxitu kya kusuka? O kidyanzunga “waxikama” kuthandu dya kyama kya muxitu. Kiki kilombolola kwila mwene ukwatekesa, ni kwila usota kulanga o kyama kya muxitu.
Ihi yanda bhita ni kidyanzunga? O kyama kya muxitu ni dikwinyi dya jingela, “anda zemba o kidyanzunga” ni kunyana o jimbote jê joso ni kulondekesa ku mundu woso o kuyibha kwê. Mukusuluka ene anda mubwika, Jihova wambe kwila kiki kyanda bhita. (Dij. 17:1; 18:8) Didi dyanda kala o disukilu dya jingeleja joso ja makutu. Maji kyadyanga, Jihova wanda bhangesa o jinguvulu kubhanga kima nuka kyabhitile ku mundu woso.
Jihova wanda bhangesa o jinguvulu kubhanga ihi? Mwene wanda bhangesa kwila o jinguvulu abhanga “o kima kya mukala ku muxima,” kifwa o jinguvulu anda bhana “o kutena ni ungana ku kyama kya muxitu [kya kusuka],” o kibuka kya Nações Unidas. (Dij. 17:13) Kiki kilombolola ihi? O kwila o jinguvulu anda sola mudya kubhana o kutena kwâ ku kyama kya muxitu? Kana! Jihova mwéne wandata o kixinganeku kiki ku mixima yâ. (Jisa. 21:1; sokesa ni Izaya 44:28.) O kwila kiki kyanda bhita bhofele-bhofele? Kana! Kiki kyanda bhita mu kithangana ni mbandu. Mu kusuluka, bhukaxi ka kutena kwatambula, o kyama kya muxitu kyanda bwika o jingeleja joso ja makutu.
Kyenyiki ihi i twatokala kukingila? Kitwatokala kukingila kwila o jinguvulu anda bhana bhofele-bhofele o kutena ku Nações Unidas. O kima kitwatokala kukingila kyenyiki: Mu kithangana ni mbandu Jihova wanda bhangesa kwila o jinguvulu abhana o kutena kwâ ku kyama kya muxitu. Kyoso o kima kiki kyanda bhita, twanda kwijiya kwila o hadi yadikota yazukama. Kindala kiki, “twatokala kudilanga ni kukala ku mesu azele” mukonda kwa kambe ngo bhofele o ima yiyi yanda bhita kya!—1 Te. 5:6.