Kyebhi ki Utena Kusakidila Jihova mu Kukubhana o Sata ya Kukula?

1-2. O sata ya Jezú itukwatekesa kubhanga ihi ni mukonda dyahi? (2 Kolindu 5:​14, 15) (Tala we o foto.)

KYEBHI ki weji divwa se muthu ukukatula moxi a sabhalalu yabu? Weji divwa kala wala ni dikongo ni mwene, ki kyene? Né mwene se athu amukwa a abhulula we, maji ku mwenyu wé woso eye weji sakidila kyavulu o muthu wakukatula-mu, nuka weji mujimba.

² Kala kitwadilongo mu milongi yatundu-mu kitutena kudibhulula ku kituxi ni ku kalunga. Maji o sata ya Jezú itena kutukula mukonda (1) itena kubhangesa Jihova kuloloka o ituxi yetu, (2) itukwatekesa kukala ni kidyelelu kya kutambula o mwenyu wakalelaku, ni (3) kukala ni ukamba wambote ni Nzambi. Mukonda dya sata ya kukula, tutena kudyelela kwila mu Palayizu twanda kala ni mwenyu wakalelaku. O sata ya kukula ilondekesa kwila Jezú wazolo kyavulu o athu, mwene wexile kya ni henda yiyi ande dya kwiza mu ixi. (Jisa. 8:​30, 31) Poxolo Phawulu wambe kwila “o henda ya Kidistu ituswinisa.” (Tanga 2 Kolindu 5:​14, 15.) Kiki kilombolola kwila twatokala kusakidila o henda yatukwatela Jezú ni kwila kitutokala kujimba yabhange mwene phal’etu.

3. Mukonda dyahi o ukexilu wé wakusakidila o sata ya kukula kiwadifu ni ukexilu wa athu engi?

³ Ihi i utena kubhanga phala kusakidila o sata ya kukula? Nange o kitambwijilu kyé kikyadifu ni kitambwijilu kya athu amukwa. Mu kifika, xinganeka kwila athu atatu amuya mu kididi kimoxi, maji kala muthu wamutunda mu kididi kikyadifu, mu kyenyiki kala muthu wanda ditela mu njila yê. Kyene we kimoxi netu. Etu enyoso twamesena kusakidila Jihova ni Jezú mukonda dya sata ya kukula. Maji o ukexilu u twanda londekesa o kisakidilu kyetu, kiwadifu ni ukexilu wa athu amukwa. Mukonda dya kiki, o milongi yiyi yanda londekesa kyebhi o maxibulu a Bibidya, o Jikidistá a abatizala kya, ni jiphange adisandula mu kilunga kyatena kusakidila o sata ya kukula.

O MAXIBULU A BIBIDYA

4. Se eye u dixibulu Bibidya, Jihova ukumona kyebhi?

⁴ Se eye u dixibulu dya Bibidya, xinganeka mu maka ya: O kumesena kudilonga yalungu ni Jihova, ilondekesa kwila Jihova wamu kubheka kwa mwene phala ni umwijiye. (Nzw. 6:44; Ika. 13:48) “Jihova mwene mukwa kutungula o mixima ya athu.” Kiki kilombolola kwila mwene umona o nguzu i ubhanga phala kudilonga yalungu ni mwene, usanguluka we mu ku kumona kwila wamulungulula o ukexilu wa mwenyu we phala kumusangulukisa ni kukala kamba dyê. (Jisa. 17:3; 27:11) Eye utena ngo kukala udikamba dya Nzambi mukonda dya sata yakukula. (Lom. 5:​10, 11) Kana kujimba o kidi kiki.

5. Kyebhi o maxibulu a Bibidya kyatena kukayela o kitendelesu kitusanga mu divulu dya Filipe 3:16?

⁵ Kuma u dixibulu dya Bibidya, kyebhi ki utena kusakidila o sata yakukula? Ukexilu umoxi, o kukayela o kitendelesu kyabhana poxolo Phawulu ku akwa Filipe: “Kuma twala kyá ni kixikanu kyakolo, twatokala kusuluka mu kwenda mu ukexilu yú.” (Fil. 3:16) O Bibidya yamukwa yajimbulula o velusu yiyi mu ukexilu yu: “Tu suluke ku pholo, mu kubhanga o ima itwamubhanga kya.” ʹMu kiki kayela o kitendelesu kiki, kana kwehela kima mba muthu kukukatula mu njila yambata ku mwenyu wakalelaku.—Mat. 7:14; Luk. 9:62.

6. Ihi yatokala kubhanga o maxibulu a Bibidya kyoso kyamu dibhana ni ibhidi? (Matendelelu 30:​11-14) (Tala we o foto.)

⁶ Nange kwamu kubhonza kuxikina kima ki wadilongo mu Bibidya. Ihi i utena kubhanga? Tokwesa, samba kwa Jihova phala na kukwatekese kutetuluka o kima ki wamu dilonga. (Jisá. 86:11) Ne mwene mu kubhanga o ima yiyi maji umona kwila wala hanji ni jiphata, suluka mu kudilonga o Bibidya, kupholo dya kwenda nange wanda xikina. Ihi i watokala kubhanga se kwamu kubhonza kweha kubhanga kima kyazembe Jihova? Lembalala kwila Jihova katubhingi kubhanga kima ‘kyabhonzo kukibelesela.’ Kifwa eye utena kubhanga ima isangulukisa Jihova. (Tanga Matendelelu 30:​11-14.) Jihova ukanena kukukwatekesa. (Iza. 41:​10, 13; 1 Ko. 10:13) Kyenyiki, suluka mukubhanga nguzu phala kubelesela Jihova. Mu veji dya kuxinganeka kyavulu mu kibhidi ki wamu dibhana nakyu, xinganeka mu ima yambote yabhange kya Jihova phala eye, bhenge-bhenge o sata ya kukula ya Mon’ê. Kyoso ki wanda zola kyavulu Jihova, wanda mona kwila “o itumu yê-phe ki ibhonzo ku i belesela.”—1 Nz. 5:3.a

7. O minzangala ala ni jitata jimbangi ja Jihova, atokala kulembalala ihi?

⁷ Eye u munzangala, se o jitata jé jimbangi ja Jihova, lembalala kwila eye u dixibulu dya beta dingi kota dya jitata jé. O Bibidya yamba: “Zukamenu kwa Nzambi, mwene wanda mi zukama we.” (Tiy. 4:8; 1 Mal. 28:9) Se ubhanga kima phala kuzukama kwa Jihova, mwene we wanda kuzukama. Jihova kakuzolo ngo mukonda dya jitata jé kukala jimbangi ja Jihova kana, mwene wakuzolo mukonda wamesena kukala kamba dyé. Ihi yabhange Jihova phala kukala kamba dyé? Mwene wabhana Mon’ê kala sata yakukula. Kana kujimba kwila yu ujitu wakatunda wa Jihova phala eye. (Lom. 5:​1, 2) Kyenyiki ande dya kuya mu Lembalasa ya muvu yu, xinganeka mu yoso yabhange Jihova ni Jezú kokwé. Anga xinganeka se ihi i utena kubhanga phala kuta kupholo o Utuminu wa Nzambi ni kusakidila o sata ya kukula.b

JIKIDISTÁ A ABATIZALA KYA

8. Mu maukexilu ebhi o kidistá amubatizala kya, walondekesa o kisakidilu mu sata ya kukula?

⁸ Se akubatizala kya, eye wasakidila kya o sata yakukula mu maukexilu avulu. Mu kifika eye walungulula ima yavulu ku mwenyu phala kusangulukisa Jihova ni kukala u dikamba dyê. Eye wabelesela o kitendelesu kya Jezú kya kuboka ni kubhanga maxibulu. Eye wadibhakula kwa Jihova anga akubatizala. Nange akuzukutisa mukonda wasolo kusidivila Jihova. (2 Ti. 3:12) Maji ne kiki eye wakolokota mu kusidivila Jihova ni ufiyele woso. Kiki kilondekesa kwila eye wazolo Jihova ni kwila usakidila o sata yakukula.—Jih. 12:​2, 3.

9. O kidistá amubatizala kya watokala kudilanga mu ihi?

⁹ Kuma tu jikidistá twabhingi kudilanga. Se kitudilange, mu kubhita kithangana tutena kukamba kusakidila o sata ya kukula. Kyebhi kyene? Xinganeka yabhiti ni jikidistá akwa Efezu mu hama ya dyanga. Kyoso Jezú kyamufukununa, mwene wa aximana mukonda dya kukolokota kwâ. Maji wa atangela we o kima kiki: “Ngi kubazela mu kima kiki: Eye waxisa o henda i wakexile nayu kudimatekenu.” (Dij. 2:​3, 4) O izwelu ya Jezú ilondekesa kwila bhofele-bhofele, o jikidistá atena kweha kusidivila Jihova ni muxima woso. O kidistá utena kate mwene kusamba, kuya mu yonge ni kuboka, maji mwene nange ubhanga ngo kiki mukonda wejidila kya kubhanga o ima yiyi, ki mukonda dya henda yê kwa Jihova. Maji ihi iwatokala kubhanga se umona kwila o henda yé kwa Jihova ki yakolo dingi kala kiyexile mu ukulu?

10. Kyebhi ki utena kuxinganeka “ni ‘kudikwatenena’ mu ima mu nzumbi? (1 Timote 4:​13, 15)

¹⁰ Poxolo Phawulu waswinisa Timote phala “kuxinganeka “ni ‘kudikwatenena’ mu ima mu nzumbi. (Tanga 1 Timote 4:​13, 15.) Xinganeka we mu ima i utena kubhanga phala “kufulujuka” mu nzumbi. (Lom. 12:11; tanga o nota de estudo “Sejam fervorosos no espírito” mu Bibidya mu dimi dya Phutu.) Mu kifika eye utena kukatula kithangana phala kusokejeka o yonge ni kudikwatenena mu ima i wanda dilonga mu kudisokejeka. Ande dya kudilonga ubheka, sota kididi kyakondama ki mwala kima kyanda ku kulandukisa, kiki kyanda kukwatekesa kukatula mbote mu ima iwamu dilonga. Kiki kyedi kala twamuta jihwinyi phala o tubhya kitujime. Eye watokala kubhanga o ima yiyi phala ni usuluke mu kusakidila Jihova mu yoso yene mubhanga kokwé, kala o sata ya kukula. Ku mbandu yengi mu jisemana ande dya Lembalasa, xinganeka mu mabesá u wala nawu mu kukala u mbangi ya Jihova.

11-12. Se umona kwila ki wamusidivila dingi Jihova ni muxima woso kala kiwexile mubhanga mu ukulu, o kwila kiki kilombolola kuma kiwala dingi ni nzumbi ikola ya Nzambi? Jimbulula. (Tala we o foto.)

¹¹ Se umona kwila ki wamusidivila dingi Jihova ni muxima woso kala kiwexile mubhanga mu ukulu, kana kuluwala, kana kubanza kwila kiwala dingi ni nzumbi ikola ya Nzambi. Lembalala ya zwela poxolo Phawulu ku jiphange akwa Kolindu: “Né mwene se ki ngi kibhange mu vondadi yami, kyene o kikalakalu kya ngibhana Nzambi.” (1 Ko. 9:17) Kiki kilombolola ihi?

¹² Kwexile ima yexile mufidisa poxolo Phawulu kuboka o njimbu yambote. Maji mwene wexile polondo phala kusuluka mu kubhanga o kikalakalu kya kuboka kikale kyoso kya sangulukile mba kyoso kyaluwalele. Eye we utena kubhanga kiki. Kala polondo phala kubhanga o ima yatokala ne mwene se waluwala. Mu kiki samba phala kukala ni “hânji ni kutena kwa kubhanga o vondadi yê.” (Fil. 2:13) Suluka mu kubhanga o ima yanda kuzukamesa kwa Jihova. Dyelela kwila mu kubhanga o ima yiyi o henda yé kwa Jihova yanda dibandekesa dingi.

13. Kyebhi ki tutena ‘kukolokota mu ku di tonginina mudyetu phala ni tumone se twala mu kixikanu’?

¹³ Sayi ithangana kima kyambote kuditonginina se twamu kumbidila o kitendelesu kitusanga mu divulu dya 2 Kolindu 13:5: “Kolokotenu mu ku di tonginina mudyenu phala mu mone se mwala mu kixikanu.” Mu kifika tutena kudibhanga ibhwidisu yiyi: ‘O kwila ngamuta o Utuminu wa Nzambi ku pholo dya mwenyu wami’? (Mat. 6:33) ‘O kwila o itonokenu yami ilondekesa kwila ngazembe o kuyibha?’ (Jisá. 97:10) ‘O izwelu yami ni ibhangelu yami, yamukwatekesa o kilunga kukala kumoxi?’ (Efe. 4:​2, 3) Mu kithangana kya Lembalasa, kyene o kithangana kituxinganeka dingi mu sata ya kukula.c

O JIPHANGE ADISANDULA MU KILUNGA

14. Ima yebhi ibhangesa o jiphange kudisandula mu kilunga?

¹⁴ Sayi jiphange ene mudisandula mu kilunga. Amoxi abhanga kiki né mwene se exile kya musidivila Jihova mu mivu yavulu ni ufiyele woso. Mukonda dyahi? Sayi athu abhange kiki mukonda atandanganyele kyavulu ni “ibhindamu ya mwenyu.” (Luk. 21:34) Amukwa adisandula mu kilunga mukonda sayi phange wazwela mba wabhange kima kya aluwalesa. (Tiy. 3:2) Amukwa hanji ate kituxi kyadikota, maji mukonda dya jisonyi mba kima kyengi kabhingi kikwatekesu. Mu ima yoso yiyi se sayiku kima kyakubhangesa kudisandula mu kilunga, ihi i watokala kubhanga? O sata yakukula itena kutukwatekesa kubhanga ihi?

15. Kyebhi Jihova kyalondekesa kwila ubhana valolo ku jimbudi jê adisandula mu kilunga? (Izekiyele 34:​11, 12, 16)

¹⁵ Xinganeka kyebhi kyadivwa Jihova yalungu ni yo adisandula mu kilunga. Jihova ka akwatela njinda, ka ajimbi we kana. Maji wene musota o jimbudi jê jajimbidila. Mwene wa alanga mu kwa abhana kudya mu nzumbi ni ku akwatekesa kuvutuka mu kilunga kyê. (Tanga Izekiyele 34:​11, 12, 16.) O kwila kikyene kyamu bhanga Jihova kokwé? Kyene! Kuma wamutanga o milongi yiyi wamulondesa kwila o muxima wé walungu hanji kwa mwene. Jihova wamono ima yambote kokwé kyoso kyakukwatekesa ku mwijiya, ni kubhanga mbandu ya mwiji wê. Mwene wamumona hanji ima yambote kokwé yu wamesena kwila uvutuka ku mwiji wê.

16. Ihi itena kukwatekesa o jiphange adisandula mu kilunga ku vutuka kwa Jihova? (Tala we o foto.)

¹⁶ Mu kadivulu Vutuka Kua Jihova, tusanga-mu o izuwelu yiyi yambote: “Ijiya kwila Jihova wala polondo phala ku ku kwatekesa, se u vutuka kwa mwéne. Mwéne wa-nda ku kwatekesa kudibhana ni ibhidi, ku katula o ndolo ku muxima, ni ku kala ni kutululuka ku muxima, kwijila mu kukala ni kitongolwelu kya zele. Kiki-phe eye wa-nda mesena dingi kusidivila Jihova kumoxi ni jiphange jê mu kilunga.” Lembalala kwila o tufunga amesena kyavulu kukukwatekesa. Ene ala “kala diswamenu kiza o kitembu, dilengelu kiza o kalêmba.” (Iza. 32:2) Phala kulondekesa o kisakidilu ku sata ya kukula dibhwidise: ‘Ihi ingatokala o kubhanga phala kuvutuka kwa Jihova?’ (Iza. 1:18; 1 Ph. 2:25) Mukifika: O kwila utena kuya mu kididi kya ubhezelu phala kutala o kyonge? Ihi i uxinganeka kuzwela ni kafunga mu kumubhinga kikwatekesu mu nzumbi? Nange mwene ukutangela phala eye kuvutuka mu kudilonga dingi o Bibidya mu tu izuwa. Dyelela kwila se usamba yalungu ni maka enya ni kubhanga nguzu phala kusakidila o sata ya kukula, Jihova wanda kubesowala.

IHI I WANDA BHANGA?

17-18. Ihi itutena o kubhanga mu izuwa ande dya Lembalasa?

¹⁷ Jezú wambe kwila Jihova wamutumikisa phala kubhana o mwenyu wê “phala woso u muxikana káfwe, maji akale ni mwenyu wakalelaku.” (Nzw. 3:16) Bhukaxi ka sata ya kukula Jihova utena kutubhulula mu kituxi ni ku kalunga. Mu kiki tusulukyenu mu kubhana valolo mu sata ya kukula. (Lom. 3:​23, 24; 2 Ko. 6:1) Mu izuwa ande dya Lembalasa, tuxinganeke mu henda yalondekesa Jihova ni Jezú kokwetu. O henda yiyi yanda tuswinisa kusakidila yoso yabhange ene kokwetu.

¹⁸ Kyebhi ki utena kulondekesa o kisakidilu kyé mu sata ya kukula? O kitambwijilu kyé ki kyadifu ni kya athu engi. Maji eye utena kudyelela kwila mwene wanda besowala o nguzu yé ni ya mazunda ni mazunda a jiselevende jê “phala oso ala ku mwenyu kabhange dingi o vondadi yâ, maji abhange o vondadi ya yó wa afwila.”—2 Ko. 5:15.