‘Athu Oso a Kala Kiki, Muenda ni ku a Xila’

TUNDÉ ku muvu ua 1992, o Kibuka Kia Utuminu kiene mu sola tufunga a kulu mu nzumbi, phala kukuatekesa o ibuka ioso kukumbidila o ikalakalu iâ.a (Tala ku luiji.) O akuatekexi iâ a tokala ku “jimbudi jamukuá,” ene a kuatekesa o Kibuka Kia Utuminu. (Nzuá 10:16) Semana joso ene a moneka mu kiônge kia kibuka mua tokala. O ikalakalu iâ, ia lungu ni ku pelepalala o milongi ia tambula ni kubhana jindunge. O jiphange ja tokala ku Kibuka Kia Utuminu, a batula o maka oso-oso a moneka mu ukexilu ua iuka, mu kusuluka o akuatekexi a kumbidila o milongi ioso i bhana o Kibuka Kia Utuminu. O jiphange jiji ala polondo phala kubhanga kikalakalu kioso-kioso kia a tumina o kubhanga. Ene a bhanga njila ja makanga kumoxi ni jiphange ja tokala ku Kibuka Kia Utuminu, mu iônge ia makota iene mu bhita ku mundu uoso. Ene ué a tena kua tumikisa phala kukunda jifiliale.

Saí phange ua mu kalakala kala múkuatekexi tundé ku muvu ua 1992, uambe: “Kioso ki ngi bhanga o kikalakalu kiami, o Kibuka Kia Utuminu ki suluka mu kubhanga o ikalakalu iâ.” O phange ia mukua ua mu kalakala kala múkuatekexi mu 20 a mivu, uambe: “Ujitu ua dikota, ki nga banzele kuila, ngeji bhanga o kikalakalu kiki ku muenhu uami.”

O Kibuka Kia Utuminu a bhana ikalakalu iavulu ku akuatekexi, ene a uabhela kiavulu o ikalakalu i bhanga o jiphange jiji ja fiiele. Mu kiki, tu bhangienu ioso phala kukaiela o kitendelesu kiambe: ‘Athu oso a kala kiki, muenda ni ku a xila.’​—Filipe 2:29.