Kukwatekesa yó a Bhiti mu Mavuwa 2021—Kitwabhana Dikunda ku Jiphange Jetu

Ku muvu wasidivisu wa 2021,a o athu kumundu woso asuluka ni kutala hadi mukonda dya dibhebhu dya COVID-19. Kala kyo jimbulule mu milongi “Kukwatekesa o Jiphange Mukonda dya Uhaxi yú Wala ku Mundu Woso,” twangastala mazunda ajidolaleb phala kukwatekesa mukithangana kiki kya dibhebhu, twasokejeka we 950 a Ibuka Ikwatekesa o Athu Abhiti mu Mavuwa.

Mukidi, o dibhebhu dyabheka hadi yavulu, o mavuwa akamukwa abhekela we hadi kujiphange jetu ku mundu woso. Phala kukwatekesa o 200 a mavuwa abhiti, o Kibuka Kya Tufunga Ala Kupholo Kya Kibuka Kya Utuminu a xikina kungastala 8 milhões ya jidolale (4,474,430,000 Kz) phala kukwatekesa mu kithangana kiki kya COVID-19. Tala kyebhi kya ngastala o kitadi kiwene musangela phala kukwatekesa yó abhiti mu mavuwa ayadi abhiti kindala.

O Kubaza Kwa Mulundu wa Nyiragongo

Mu kizuwa kya 22 kya mbeji ya Kasambwadi ka 2021, o mulundu wa Nyiragongo, ku República Democrática do Congo, yamateka kutunda túbhia koxi amavu. O túbhia tutu twajokotesa jinzo, jixikola ni ididi yakubhakelamu menya. Maji o túbhia kitwene ngó twexile o kilwezu. Mu kubhita izuwa kyoso kyabaze o mulundu (erupção), o kubaza kuku kwabhekesa fufuta ibhanga kyayibha kumuthu, o fufuta yiyi yadimwange mu mbanza ya Ngoma, kwabhiti we tu itungutisu twofele twa ixi. Athu avulu mu mbanza a akatulamu phala kwa ambata mu kididi kyengi. Jihama ja jimidi ja athu alenge, amoxi ayi mu ixi ya Ruanda.

O yó a akatula phala kwa ambata mu kididi kyengi atenesa 5.000 ya Jimbangi ja Jihova. Amoxi atexika o jinzo jâ mukonda dya mulundu yu wabaze; o jinzo jamukwa anyanamu o imbamba kyoso o athu kya lenge. O kibuka kikwatekesa o athu abhiti mu mavuwa ku Ruanda kumoxi ni jiphange ala kupholo ku República Democrática do Congo akalakala kumoxi. Yalungu ni kibuka kikwatekesa o athu abhiti mu mavuwa, o filiyale ya Congo (Kinshasa) yambe: “Sumbala ni kavwanza kexile mu mbanza, ande mwene dyakubhana o ngolokela phala kwambata o athu mu ididi yengi, o kibuka kikwatekesa o athu abhiti mu mavuwa amateka kubhana kudya, menya, imbamba phala kuzeka ni izuwatu.” Mu mbanza mwexile 2.000 ya jiphange jetu, o kibuka kikwatekesa o athu abhiti mu mavuwa kyabhana jitenda, jimascara, kya jimbulula we kyebhi kyatokalele kudilanga phala kakwate o uhaxi wa COVID-19 ni cólera.

Mbeji jitatu kyoso kyabhiti o mavuwa, o jiphange jetu awanene kya jitonelada jisamanu ja loso ndenge, jitonelada jisamanu ja fuba ya masa, tonelada jitatu ja maji ni tonelada jitatu ja jimbinda ja menya. Phala kubhaka dingi kitadi, o filiyale yasolo kusumba o kudya kwene mudima mu ixi yenyoyo mu veji dya kusumba mu jixi jengi kwate dingi kalu.

“Twaluwalele kyavulu, twexile we ni ndolo kumuxima,” kyoso kitwevu kwila o inzo ya ubhe yaphange yetu yamuhatu yajokota mukonda dya túbhia twatundu koxi dya mulundu. Maji o mwiji wê watambula kikwatekesu kikale muxitu ni mu nzumbi. Mwene wambe: “Ni kikwatekesu kya Jihova, twala ni ima itwabhindamena. Twamono Jihova kutukatula o kimbamba kya neme, mukiki ki kwatubhonzele dingi kudibhana ni maka ya.”

Wadyama mu Ixi ya Venezuela

O ixi ya Venezuela yabhiti mu wadyama mumivu yavulu. O jiphange jetu kwenyóko amubhita mu ibhidi yavulu mukonda dya wadyama, kukamba kudya ni usweya wamudibandekesa kyavulu. Maji, o kilunga kya Jihova ki kyabhana dikunda kujiphange jiji.

Ku muvu watundumu wa sidivisu, a ngastala 1.5 a mazunda a jidolale phala kusumba ni kututa makudya ni nzabá phala o jiphange jabhindamene. O filiyale ya Venezuela yambe kiki: “kwatubhonzele kyavulu mbeji ni mbeji kututa 130 ajitonelada ja makudya phala ku jambata ku ixi yoso ni kuwanena o kudya kujiphange abhindamene.” Phala o kudya kikubole, muveji javulu o jiphange atumikisa o kudya kwanda laleka kyavulu phala kubola. O filiyale yambe dingi: “Etu twene musumba dingi kudya kwavulu mukithangana kya kubhongolola mukonda ka kute kalu yavulu. Twene mu ituta mu ukexilu utukwatekesa kuphopheka dingi kitadi.”

Leoneli, watokala ku Kibuka Kikwatekesa o Athu Abhiti mu Mavuwa ku ixi ya Venezuela, wawabhela kyavulu o kikalakalu kyê. Mwene wambe: “O kikalakalu kiki, kikalakalu kya katunda”. “O ujitu yú wene mu ngikwatekesa kyavulu tunde kyafu muhat’wami mukonda dya uhaxi wa COVID-19. Ngala ni ima yavulu yakubhanga, ngidivwa kwila ngitena kukwatekesa o jiphange abhindama. Ngene mumona ni mesu ami kyebhi Jihova kya kumbidila o kikanenu kyê kya kwila kandabhana dikunda ku mundu wê.”

Sayi phange watambula o kikwatekesu, wabhangele we kya mbandu ku kibuka kikwatekesa o athu abhiti mu mavuwa. Mwene wambe: “Kindala o kithangana kyami kya kutambula we o kikwatekesu”. “Katukwatekesa ngó muxitu kana. O jiphange we a ngikwatekesa eme ni muhat’wami kukala ni kutululuka. Ene atulange, atukondo o malamba ya atuswinisa.”

Sayi mavuwa abhita se etu kukijiya mba atutangela ngó ima yofele. Maji, muveji javulu o kilunga kya Jihova kyene musumba ni kutumikisa ni lusolo lwoso imbamba phala kukwatekesa o jiphange abhiti mu mavuwa. Tusakidila o kitadi kiwene musangela phala kukwatekesa o kikalakalu ku mundu woso. Sayi maukexilu akusangela kitadi o jimbulule mu sayite donate.jw.org. Twasakidila o ukexilu we wakubhana.