Jingolokela ja Kidi Jikolesa o Kixikanu

O Jimbangi ja Jihova awabhela kyavulu kwijiya se kyebhi kyala o jiphange je ja mala ni ja ahatu. (1 Phetele 2:17) Avulu mudyetu tudivwa kala kyadivu phange Tanya, watungu mu ixi ya Kenya. Mwene wambe: “Ngawabhela kyavulu kwijiya se kyebhi kyala o jiphange jami mu ngongo yoso.” Kyebhi Tanya ni mazunda a Jimbangi ja Jihova, kyeza mukwijiya yalungu ni Jimbangi ja Jihova ja mukwa? Tunde ku muvu wa 2013, etu twamateka kubhanga jingolokela bhukaxi ka sayte yetu, jw.org.

Mu mbandu ya ubhe ya jingolokela mu sayte yetu tusangamu milongi ya kidi yalungu ni Jimbangi ja Jihova kala, kyoso kyabhana o Bibidya ya ubhe, kikalakalu kya kukwatekesa yo ene mubhita mu mavuwa, kikalakalu kya kutunga, ni maka engi a betakota. O jingolokela jiji ji tutangela ya lungu ni jiphange jetu ja mala ni ja ahatu ala mu kaleya mukonda dya kixikanu kya. Mu mbandu yiyi mwala we ifika yalungu ni kambanya ka kuboka, ni milongi yalungu ni Lembalasa. Ananyi ene mutokwesa o milongi yiyi ni kyebhi kyene mu isokejeka?

Kutokwesa ni Kubhana Jingolokela ja Ubhe

O mbandu yiyi ya jingolokela ja ubhe ayendesa kwala o kibuka kya Departamento de Informações ao Público (OPI, sigla em inglês). O kibuka kiki kikalakala ku mbonge ya Jimbangi ja Jihova. O kibuka kyala ku pholo dya ibuka ya tufunga (Comissão dos Coordenadores do Corpo Governante) yene yendesa o kikalakalu kiki. Kwala hama a jiphange ja mala ni ja ahatu ndenge ene mu kalakala kumoxi ni kibuka akixana OPI. Amukuwa adibhakula phala kukalaka tunde ku mabhata mâ. Bhukaxi ka athu ya mwala akwa kutokwesa, ni yo ene muxabula jifoto ni alunguludi. Sayi ya adikunda ni yo ala ni mawugana, ni jinguvulu, jimesene ja kulonga ni yo akwa minangu. Kwala we 80 a ibuka mba Setor de Informações ao Público (PID, sigla em inglês) mu jifiliyale ku mundu woso yene mu kwatekesa o kibuka kya OPI.

Phala kusokejeka ngolokela, o kibuka kya OPI, kikalakala kumoxi ni ibuka ya PID. Kyoso o jiphange kyamona musoso wambote phala ku usoneka, ene atokwesa o maka enyá, anga ongeka o milongi yoso ya kidi. Sayi bhabha abhingi kwibhwidisa athu, ni jingijiye. Kyoso kyazubha kutokwesa o milongi yoso, ene asoneka o ngolokela, a isokejeka, ata we o jifoto. Mu kusuluka a itumikisa phala ku ixikina ku kibuka kyala ku pholo dya ibuka ya tufunga (Comissão dos Coordenadores do Corpo Governante).

Izwelu ya Kusakidila

Kyebhi kyene mudivwa o jiphange jetu kyoso kyatanga o Jingolokela jiji? Sayi phange amwixana Cheryl, watungu mu ixi ya Filipina wambe: “Nga wabhela kumateka o kizuwa mu kutanga jihundu jalungu ni kilunga kya Jihova ni mundu wê.”

Atangi avulu azwela kyebhi o jingolokela ja jw.org ki jadifu ni jingokela ja mitelembe. Tatiana, watungu ku Kazaquistão wambe: “Ngisakidila kyavulu, eme ngitena kudyelela mu jingolokela jala mu sayte jw.org. Jene jingolokela ja kidi, ja tokala mwene.” Phange ya muhatu watungu ku Mexico amwixana Alma, wambe: “O jingolokela ja mitelembe jizwela ngó yalungu ni ima yayibha, yene mubhita mu ngongo, maji o Jingolokela ja sayte yetu jiswinisa.”

O jingolokela jiji ja kidi mwene, jiswinisa we o kixikanu. Bernard, watungu mu ixi ya Kenya, wambe: “O jingolokela jiji, ji ngikwatekesa kumona o jiphange ku mundu woso kala mwiji wami, kabasa kididi bhwala ene. Eme ngala polondo phala kutumbula o majina mâ ni ibhidi yene mudibhana nayu, mu misambu yami.” Phange ya mukwa ya muhatu amwixana Bybron, mu ixi ya Kenya, wambe: “Eme ngisanguluka kyavulu kyoso ki ngimona ngolokela yalungu ni Bibidya ya ubhe mu dimi dyengi! O jimbandu jiji, ji ngilembalesa kwila Jihova kimukwa kathombo.”

Ne mwene o misoso yalungu ni jiphange a mwa zukutisa itena ku tu swinisa kyavulu. Jackline, watungu we mu ixi ya Kenya wambe: “O kuxinganeka mu kuswina kwâ, kukolesa dingi o kixikanu kyami. Eme ngisota kwijiya se ihi ya akwatekesa kukolokota. Ngadilongo kwila o ima kala, o kusamba, kutanga o Bibidya, ni kwimba, ku kwatekesa o jiphange kukolokota.”

Phange ya muhatu a mwixana Beatriz mu ixi ya Costa Rica, wawabhela kyavulu o jingolokela jalungu ni mavuwa. Mwene wambe: “O jingolokela jiji, ji ngi kwatekesa kumona kyebhi o kisangela kyetu kikwatekesa ni lusolo lwoso ni henda yoso kyoso o jiphange abhita mu mavuwa. Kiki ki ngi londekesa kwila, kiki kyene o kilunga kya Jihova.”

Kisangusangu kyadikota kutambula jingolokela jalungu ni jiphange jetu mu ngongo yoso! Kiki kya mubhita mukonda dya ukexilu wê wa kusangela kitadi phala o kikalakalu kyetu mu ngongo yoso. O kitadi kiki ene mu kisangela mu mbandu donate.jw.org. Twasakidila kyavulu o ukexilu wê wakusangela kitadi ni henda yoso.