Mimbu Ituzukamesa Dingi Kwa Nzambi

O mwimbu ujitu wadikota watundu kwa Jihova. Yene ilungulula o ixinganeku yetu, itusangulukisa kyoso kituluwala, ituswinisa we. Sé phata kyene kitudivwa kyoso kitwivwa o mimbu ya Broadcasting. Mu kidi, yene ibhanga dingi: O mimbu yiyi itena kutuzukamesa dingi kwa Jihova.

Tundé ku muvu wa 2014, twabhange kyá 70 a mimbu ndenge, kindala mwimbu umoxi a ulungulula mu 500 a madimi ndenge! Maji eye utena kudibhwidisa, ‘Nanyi usoneka o mimbu yiyi, nanyi uyimba?’

Kyebhi o Jiphange Kyabhanga o Mimbu Yiyi?

O mimbu ya Broadcasting a ibhanga ku jiphange atokala ku kibuka kya jingimbi, Kibuka Kya Jividyu, kikalakala ni kitendelesu kya Kibuka Kya Kulonga, kya Kibuka Kya Utuminu. O kibuka kya jingimbi kyala ni 13 kya jiphange jamala ni j’ahatu akwatekesa mu kusoneka o mwimbu, mu kubhanga o mukumbi, kusola o kizuwa ni kubhanga o ima yamukwa dingi. O Kibuka Kya Kulonga, kixikina we jiphange adibhakula mu ngongo yoso phala kukwatekesa o kikalakalu kiki. Sayi yá asoneki a mimbu, jingimbi, amukwá abhanga mikumbi. O jiphange jiji akalakala ni mauhete ala nawu sé kusota kiximanu phala ene.

Kyebhi kyabhanga o mimbu yiyi? Kya dyanga, o Kibuka Kya Kulonga kisola o velusu ya Bibidya mutunda o mwimbu ni njimbu yebhi yandakala mu mwimbu. O kibuka kya jingimbi kisola se nanyi wandasoneka o mwimbu ni kubhanga o mukumbi. Anga afikisa hanji ku ungalavala. O jiphange akwa Kibuka Kya Kulonga evwa o ngalavasa, anga abhana jindunge jamukwa. O kibuka kya jingimbidi akayela o jindunge ja abhana anga abhanga o ngalavasá yasukina. O mimbu yiyi a ingalavala mu ididi yavulu, kikale mu jifiliyale mba mu jinzo ja jiphange.

Phala kusoneka ni kungalavala o mimbu yiyi, o jiphange jetu akalakala ni jiprograma javulu ja komputadolo. O kikalakalu kiki kibhinga we jifalamenda ja mwimbu kala jimicrofone ni jifalamenda jikwatekesa kufwamesa o mwimbu. Microfone imoxi atena ku isumba 100 ya jidolare (58.571,9 ajikwanza) mba 1.000 ya jidolare (585.719 ajikwanza) ndenge. Ku muvu wa 2020, twangastala 116.000 ajidolare (67.943.400 ajikwanza) phala kusumba jifalamenda ja kungalavala naju o mimbu.

Nguzu yebhi itwene mubhanga phala kuphopheka dingi kitadi? Muveji dya kusola kibuka kyadikota kya jingimbidi ku Betele, tukalakala ni jiphange javulu kala ku Betele adibhakula mu vondadi yâ. Muveji dya jiphange ala ni uhete wa kuxika kukala mu kididi kimoxi phala kungalavala, ene angalavala bhukaxi ka programa ya komputadolo ibhanga maukexilu avulu amikumbi.

“O Mimbu Yiyi Yene Mukolesa Jinga o Kixikanau Kyami”

O jiphange azolo kwivwa o mimbu yiyi ya Broadcasting. Tara, watungu ku ixi ya Alemanha, wambe: “O mimbu ingikwatekesa kutululuka kyoso kingikala ni hele. O kwivwa o mimbu mudimi dyami dya uvwalukilu, ngidivwa kala Jihova wamungindwakuna.” O phange yadiyala watungu ku ixi ya Cazaquistão, amwixana Dmitry, wambe: “Ngawabhela kwivwa o mimbu ya Broadcasting, mukonda kingibhingi kuthandanganya se yene yalungu mwene ni itumu ya Bibidya. Mukidi, o mimbu yiyi ingikwatekesa kukolesa o ukamba wami ni Jihova Nzambi.”

Delia, watungu ku ixi ya África do Sul, mwene wambe kyebhi kyadivwa ni mimbu ya Broadicasting: “O mimbu yiyi yene mukolesa jinga o kixikanau kyami. Kyoso kingiluwala mba ngamudibhana ni ibhidi, kwene jinga mwimbu ungikwatekesa kudibhana ni ibhidi. Muveji javulu, o kwivwa ngó o mukumbi wa mwimbu, ungitululukisa kyá o muxima!”

Sayi ku mimbu ya Broadcating ingawabhala dingi. Lerato, watungu we ku África do Sul, wambe: “O mimbu ‘Kwakambe Ngó Bhofele’ ni ‘Kiyandalaleka’ ingibhangesa kuxinganeka kuhádya, kyoso kingandatambulula mam’etu mu palayizu. Ithangana yoso ingivwa o mimbu yiyi, ngimona mam’etu yuwiza ni kulenga phala kungindwakuna.”

Sayi mwimbu wa Broadcating wakituka wakatunda phala o muzangala wamuhatu, Sri Lanka, mukonda wamukwatekesa kyavulu. Mwene wambe: “O mulongexi wami, wangizwela ima yayibha bhu pholo dya jikoleka jami mukonda dya kukala Mbangi ya Jihova. Mu kiki jisonyi jangikwata, kingejidile ihi ingeji zwela. Kyoso kingabhixila kubhata, mam’etu wangiswinisa kwivwa o mwimbu ni dyambu: ‘O Estudo me Faz Bem.’ O mwimbu wangikwatekesa kumona kwila ngabhindamena kutokwesa ni kupelepala o itambwijilu ya ibhwidisu yalungu n’etu. Mu kizuwa kyakayela, ngazwela ni mulongexi wami. Mwene wangivu, yu wambe kwila kindala mwene utendela kyá, o ilongesu mba mu ima ixikina o Jimbangi ja Jihova. Ngisakidila kyavulu o kilunga kya Jihova mukutubhana o mimbu yiyi ituswinisa.”

Kwebhi kutusanga o kitadi phala kubhanga o mimbu yiyi? Bhu kaxi kakitadi kisangela o athu phala o kikalakalu ku mundu woso mu donate.jw.org. Twamisangidila mukitadi kimwene musangela ni muxima woso.