Jobe
24 “Mukonda dyahi o Muteni wa Yoso, kaxindi o kithangana kyê kya kufundisa?
Mukonda dyahi o yó a mwijiya, katongolola o kizuwa kiki?
2 Sayi athu asondolola o ijimbwete ya jimbambe ja ibhela ya akwa, phala kubandekesa ku ibhela yâ.
Ene anyana jimbudi, ajambata mu ibhanga yâ.
3 Ambata o jumendu ya mona kitungu,
Atambula o ngombe ya mutudi, phala ku muvutula-yu ngo kyoso kyanda futa o dikongo.
4 Ene ajijidika o jingadyama kwa enzela o njila,
O yó abhindama, ene mudisweka phala ka amone.
5 O jingadyama aya musota kudya, mukwa ni jijumendu ja mukáwu mu kikangalakata.
Aya mwene musota o kudya mu kikangalakata phala o twana twâ.
6 Abhingi kukalakala ku mabhya angene phala ku abhana kudya,
Akanza o jiuva ja subhuka mu dibhya dya mukwa phulu.
7 Azeka ni thuxi,
Kala ni kima kya kudivunga mu kithangana kya mbambi.
8 O mvula inoka ku milundu ya abetesa.
Kuma kala ni inzo, abasa ku matadi.
9 O mona kitungu, a mukatula bhu mele a manyâ,
Ambata o izwatu ya jingadyama, a avutula-yu ngo kyoso kyanda futa o makongo.
10 A ajijidika kwenda ni thuxi,
Atuta ita ya tiliku ni nzala.
11 Akalakala kyavulu bhu mbandu a kimbaka* mu mwanya watu,
Akama o jiuva, maji né kiki akala ni dinyota.
12 O yó kwa akambe ngo phala kufwa, ya akema mu mbanza.
O yó a akwama kyavulu, a mudikola mu kubhinga kikwatekesu,
Maji Nzambi kamusuwa o ima yiyi.*
13 O athu ayibha azembe o mukengeji.
O jinjila jâ kajijiya,
Adituna kwenda mu jinjila jambote.
14 O kijibhanganga ubalumuka mu kamene-mene,
Ujibha yó watate, ujibha we o ngadyama,
Mu usuku unyana.
15 O mukwa jiphánda ukingila kuma kuvunda,
Mwene wamba: ‘Séku muthu wanda ngimona!’
Mwene usweka o pholo yê.
16 Mu usuku, o miyi ibokona mu jinzo jangene,
Mu mwanya adijikila mu jinzo jâ,
Mukonda azembe o mukengeji.
17 Ene akala ni wôma wa kamene,
Mukwa ni athu engi kyakala ni wôma wa usuku.
18 Akwa phulu ene mu a kungulula ni lusolo ku menya.
O mabhya mâ anda ku abhubhidila.
Ene kanda vutuka dingi ku mabhya mâ a jiuva.
19 Kala o kixibhu ni munza ukukutisa o menya* bhoxi,
Kyene we kya kà fwa yó ata o ituxi!
20 O mukwa phulu anda mujimba kwa manyâ, a kà mudya mwene ku mándwi.
Kanda mu lembalala dingi.
O mukwa phulu anda mubukujula kala muxi.
21 Ene atatesa o mbaku,
O mutudi ka mukwatekesa.
22 Nzambi mu nguzu yê wanda bwika yó ala ni kutena.
Sumbala adizangeleka, kejiya se ku hádya anda kala ku mwenyu.
23 Nzambi wa ehela kubanza kwila ala bhwa kondama,
Maji mwene wejiya o ima ya mubhanga.
24 A azangeleka mwene mu kithangana kyofele, mu kusuluka ajimuka.
A abatula mukwa ni mítwe ya masa, a atulula anga afwa,
Kala kibhita ni athu oso.
25 Se kikyene, nanyi utena kwamba kwila ngimukwa makutu?
Nanyi utena kwamba kwila, o izwelu yami kiyakidi?”