“O Dizubhilu” Ihi?

Kioso ki uivua kuila, “O dizubhilu dia zukama!” U banza mu ihi? O kuila u banza o kizuua kia-nda kuiza o Mexiia phala kuambata ku diulu o athu ambote ni ku tumikisa ku ifernu uoso ua iibha? Inga u banza mu kizuua kioso kifua o muthu? O ku banza kiki, ku bhangesa athu amoxi ku thandanganha kiavulu, a mukuá a kala ni jiphata, a mukuá hanji olela mu kuívua o maka enhá.

O Bibidia i zuela kuila: ‘O dizubhilu dia-nda kuíza.’ (Matesu 24:14) O kizuua kiki kia dizubhilu, a k’ixana ué “kizuua kia Dikota kia Nzambi” a k’ixana ué “Alumajedone.” (Dijingunuinu 16:14, 16) Mu kidi, o jingeleja jene mu longa ima iavulu ia lungu ni dizubhilu, ima i kuatesa uôma. Maji, o Bibidia i jimbulula kiambote o dizubhilu. O Mak’â Nzambi a tu kuatekesa ué ku mona se o dizubhilu dia zukama mba kana. O kia beta-kota, o Mak’â Nzambi a tu tangela se ihi i tua tokala o ku bhanga phala tu bhuluke! Maji kia dianga, tua-nda mona hanji o ibanzelu ia iibha ia lungu ni dizubhilu ni ku lombolola kiambote se o dizubhilu ihi. Mu kidi, o Bibidia i jimbulula kiebhi “o dizubhilu?”

IHI I ZUELA O BIBIDIA IA LUNGU NI DIZUBHILU

1. O DIZUBHILU KO KIBUIKILU KIA IXI NI TÚBHIA.

   O Bibidia i zuela: “[Nzambi] ua tena kutula madisesa m’axi katé ia kuata, ki i xikina ku i lundumuna.” (Jisálamu 104:5) O kibatulu kiki ni ibatulu ia mukuá mu Bibidia, i tu londekesa kuila Nzambi ka-nda buika o ixi né kuehela kuila athu a i buika—kana!—Ndongixi 1:4; Izaia 45:18.

2. O DIZUBHILU KI DIA-NDA KUÍZA NGÓ, A DI XINDI MUENE.

   O Bibidia i tu londekesa kuila o dizubhilu a di xindi muene—Nzambi ua xindi kiá o kizuua kia ku bheka o dizubhilu. O Bibidia i zuela: “Kizuu’okio-phe ni kithangana kiê, kana muthu ua k’ijiia, né ji-anju mu diulu, né o Mona, ki kale Tata muène ngó. Alukenu-phe, mu langidile, mu sambe; kuma o thembu ki mua ijiia.” (Marku 13:32, 33) Mu kidi, Nzambi o (“Tata”) ua xindi kiá “o thembu” ia-nda bheka o dizubhilu.

3. O DIZUBHILU KA-NDA DI BHEKA KU ATHU MBA KU MATADI A-NDA BAZA KU DIULU.

   Nanhi ua-nda bheka o dizubhilu? O divulu dia Dijingunuinu 19:11 di zuela: “Anga ngi mona diulu dia jikuka. Ngedi ngi tala, kua moneka kabalu kazele, o ua xikama-ku a mu ixana Fiiele, a mu ixana Kidi.” O velusu ia 19 i suluka ni kuzuela: “Anga ngi mona o kiama ni jisobha mu ngongo, ni ifuxi iâ ia masoladi, a di bhongolola mu kùlua ita ni ió ua mondala ku kabalu kazele, ni kifuxi kia makuenze mê.” (Dijingunuinu 19:11-21) Sumbala ima iavulu io tange bhabha, ifika ngó, maji tu tena ku mona kuila: Nzambi ua-nda tumikisa o ji-anju jê phala ku buika o jinguma jê.

DIZUBHILU DIA JINGUVULU JOSO.

1. O Bibidia i zuela kuila: ‘O Nzambi ia diulu ua kà bheka-ku o utuminu ki u xikina dingi ku u jikinisa; o utuminu iú kà uehela ku bhita dingi bhu maku ma miji iéngi uene kiá ua kà sasujula o mautuminu moso’ama anga a bhua-ku, maji o uene ua kà xalela ni ku tumina mu thembu joso katé ku hádia ni hádia.’ (Daniiele 2:44) Kála ki tua mono ku diba dia 3, o “jisobha mu ngongo, ni ifuxi iâ ia masoladi, a di bhongolola mu kùlua ita ni ió ua mondala ku kabalu kazele, ni kifuxi kia makuenze mê,” a-nda a buika.—Dijingunuinu 19:19.

2. DIZUBHILU DIA ITA, UJIBHANGÂNGA, NI KU KAMBA O KU IUKA.

   “[Nzambi] ita ua i suikika katé ku maxokololo a’xi.” (Jisálamu 46:9) “Athu ambote ene a kà tunga mu ngongo, oso a iuka o muxima a kà nangenena muenhomo. Maji akua phulu mu ngongo a kà a buikisa-mu, o ibalukutu a kà a vuza-mu muene.” (Jisabhu 2:21, 22) “Kindala ima ioso nga i bhangulula ku ubhe!”—Dijingunuinu 21:4, 5.

3. DIZUBHILU DIA JINGELEJA JENE MU NGANALA O ATHU NI KU BHANGA IMA IA IIBHA BHU PHOLO IA NZAMBI.

   ‘O Misesedi a tanga ima ia makutu, o jinganga a tumina ku maku mâ-ene; . . . O kia kà suka mua-nda ku bhanga kiebhi?’ (Jelemiia 5:31) “Saí avulu a ka ng’ambela mu kizu’okio: ‘Ngana, Ngana, kifua etu ki tua tele maka mu dijina diê, o mu dijina diê, anga tu kaia madimonho, mu dijina diê anga tu bhanga madiuanu avulu?’ Bhenhobho eme nga ka a tangela: Eme ki nga m’ijidile! Tundenu bhu mbandu iami, enu mu ati a ituxi.”—Matesu 7:21-23, NW.

4. DIZUBHILU DIA JINGUMA JOSO JA NZAMBI.

   Jezú Kristu uambe: “O kuêla kuenhuku: O mukengeji ueza mu ngongo, maji athu-phe a beta kuzola o kitombe, mukengeji ua a kala ndenge, mukonda ima iâ ia bhanga iaiibha.” (Nzuá 3:19) O Bibidia i tanga o musoso ua lungu ni kibuikilu kia mundu kia bhiti m’ukulu mu izuua ia Noué, diiala dia fiiele. O Bibidia i zuela kuila: “Oxi ioio ia kexile-ku, ia bobele mu Diluviu dia menha anga i jima. O maulu kiki ala-ku, ni oxi-phe, mu kizuelu kiene kimoxi kia Nzambi, ia xikamena tubhia. A i bhake katé bhu Kizuua kia Kufundisa, kia kubuikisa athu abhumu.”—2 Phetele 3:5-7.

Tala kuma o uijilu ua “Kizuua kia Kufundisa, kia kubuikisa” o athu, a ki sokesa ni kibuikilu kia “Oxi ioio” mu izuua ia Noué. Ixi iebhi ia buikile? O ixi ietu ka i buika kana; maji o “athu abhumu”​—o jinguma ja Nzambi​—ene a a ‘buikisa.’ Kioso kia-nda bheka Nzambi o “Kizuua kia Kufundisa,” oso a solo ku kala jinguma ja Nzambi a-nda ku a buika ué. Maji o makamba a Nzambi, a-nda bhuluka kála kia bhulukile Noué ni muiji uê.—Matesu 24:37-42.

Xinganeka kiebhi kia-nda kala o ixi kioso kia-nda buika Nzambi o ku iibha kuoso! Sé phata o njimbu ia lungu ni dizubhilu, ki njimbu ia iibha kana. Nange ua mu dibhuidisa: ‘O kuila o Bibidia i tu tangela o thembu ia-nda kuíza o dizubhilu? O kuila dia zukama? Kiebhi ki ngi tena ku bhuluka ku dizubhilu?’