Ibhuidisu io Tambuijile

◼ Ihi ia tokala ku bhanga phala o jimbandu mu iônge ia ilunga, ki i bhite o ola?

O ithangana i bhita ni lusolo, kioso ki tu di zuelesa mu ima iambote ni makamba metu. Mukonda dia kiki, ki tena ku bhonza ku bhanga o jimbandu ja iônge, mu ithangana ia tokala. Ihi i tena ku kuatekesa?

Mateka mu ola ia tokala. Se kiônge kia kilunga, nange ki kala kikuatekesu o ku bhinga ku jingivuidi mu ku kenga o ididi iá, kioso ki ku kamba ngó kithangana kimoxi, mba iiadi, phala o kiônge ki mateke mu ola ia tokala. (Nd. 3:1) O iônge ia ibuka iofele, kála o iônge ia sidivisu ia kuboka, ki i tokala ué ku mateka tádidi mukonda dia ku kingila o jiphange ka bhixila luua, maji i tokala ku i bhanga mu ola.

Di pelepalala kiambote. O sabhi phala ku bhanga kiambote o mbandu mu kiônge mu ola ia tokala, o ku di pelepalala kiambote. Ua tokala uijiia se ihi ia mu bhinga o mbandu i uala na-iu. Tala o jipondo ja beta-kota, ni ku ji jimbulula. Kana ku zanga kithangana mu kuzuela ima ki ia tokala. Bhanga o mbandu mu ukexilu ua bhebhuluka. Se o mbandu i bhinga ku bhanga ifika, mba ku ibhuidisa phange, mua tokala ku di pelepalala mu kithangana kia soko. Kioso ki uia ni ku di pelepalala, mu ku di longa kuzuela ni dízui dia suína, ua tokala u tonginina kiambote o kithangana kiê.

Uana o jimbandu. Né muene se o mbandu iê ia ku bhana, diskursu mba mbandu phala ku i bhanga ni jingivuidi, kima kiambote ku uana o milongi mu jimbandu. (seções) Sola se ithangana i kuxi i ua-nda ku bhanga kala mbandu, ni ku soneka o ithangana íii, bhu mbandu ia phaphela. Mu kiki, langa o kithangana kiê, kioso ki uia ni ku bhanga o mbandu. Mu ku bhanga o mbandu ni jingivuidi, kana ku kuzuela kiavulu ku dimatekenu, phala ki u bhange ni lusolo o jipondo ja beta dingi kota. O endexi a milongi A Mulangidi mu kilunga, a tokala ku xa kithangana kia soko, phala ku bhanga o ibhuidisu i tu sanga mu kaxa ku disukilu dia milongi. A tokala ué ku di langa, phala ka bhite o kithangana kia tokala phala o muimbu ni musambu ua sukina.

Ku zubha o mbandu mu kithangana kia tokala. Se o kiônge kiala ni jimbandu javulu, kála o kiônge kia sidivisu, kala phange ua tokala kuijiia o kithangana kiê kia tokala o ku mateka, ni kia ku zubha. Ihi ia bhingi ku bhanga se o kiônge kia mu bhita mu o ola ia tokala? Nange phange imoxi, mba jiiadi a sukina, a tena ku xa jipondo ki ja beta-kota ku mbandu, maji a jimbulula ngó, o jipondo ja beta dingi kota, phala o kiônge ki zubhe mu ola ia tokala. O ukexilu ua ku bhanga kiki, ulondekesa o uhete ua mulongexi uambote.

O jingivuidi, a tokala a kuatekesa o phange ua mu bhanga o mbandu ia bhingi o itambuijilu ia jingivuidi, mu ku bhana itambuijilu ia butu, i suínisa. Etu enioso, tu tena ku kuatekesa phala o iônge i bhite “mu ujitu, ni mu uiukilu uê.”—1 Kol. 14:40.