MILONGI YA 11

Kuzwela ni Kufulujuka kwa Muxima

Loma 12:11

IHI I WA TOKALA O KUBHANGA?: Wa tokala kuswinisa o jingivwidi bhu kaxi ka uzwelelu wé.

Ehela o maka kutula ku muxima wé. Mu kupelepalala o mbandu yé, wa tokala kuxinganeka ni muxima woso mu valolo ya maka mê. Wa tokala kudilonga kyambote o njimbu i wa-nda tula, phala u tene kuzwela ni muxima woso.
Banza ku jingivwidi jé. Xinganeka kyebhi o maka u wa-nda tanga, mba kulonga, a tena kubhekela mbote ku akwenu. Sota kulonga o maka mu ukexilu wa bhebhuluka, phala o maka n’a tula ku muxima wa jingivwidi jé, n’a mono o mbote ijila mu ku i kayela.
Longa ni muxima woso. Zwela ni kufulujuka. Bhanga ijimbwete ni maku. O pholo yé ya tokala kulondekesa ni kidi kyoso kyebhi ki wa mu dívwa.

Dilange phala kulandukise o jingivwidi mu kuzambesa o maku mu ukexilu umoxi ola joso. Mu kubhanga ijimbwete ni maku, yene ya tokala kulunga ni kima ki wa mu zwela. Wa tokala kuzwela ni kufulujuka kwa muxima, kotelele kyoso ki wa mu longa o jipondo ja beta kota, ni kyoso ki wa mu swinisa o jingivwidi jé kubhanga kima. Mu kubhanga diskulusu, kana ku fulujuka kyavulu, jingivwidi jé a-nda bhwila.