Mozé—Diiala Dia Henda

O HENDA IHI?

O henda ilombolola o ukexilu ua ku kuata ukamba ua kidi ni akuenu. O muthu ua henda ulondekesa o henda mu izuelu ni mu ima ia bhanga, né muene se o ku bhanga kiki, ku bhinga ku bhanga kima.

KIEBHI MOZÉ KIA LONDEKESA O HENDA?

Mozé ua londekesa kuila ua zolele Nzambi. Mu ukexilu uebhi? Lembalala o izuelu i tu sanga mu divulu dia 1 Nzuá 5:3, diambe: “O henda ia kuzola Nzambi inhi’íi, o kualuka o ijila iê.” Mozé ua kexile mu kumbidila o kitumu kiki. Mozé ua belesela Nzambi mu ithangana ioso. Mu kifika, Mozé ua belesela kioso kia mu tumine ku zuela ni sobha Falaó, ni ku sununa o mbangala mu Kalunga ka Kusuka. Ki kale se o kitumu kia bhonzele mba kana, Mozé ua kexile mu belesela. O Bibidia i zuela: “Mozé anga u ki bhanga; kioso kia mu tumu Jihova.”—Makatukilu 40:16.

Mozé ua londekesele kuila ua zolele o mundu ua Izalaiele. Ene ejidile kuila Jihova muéne ua kexile mu tumina Mozé ku a endesa. Mukonda dia kiki, ene akexile mu bhixila kua Mozé phala ku batula o maka mâ. O Bibidia i zuela: “Mundu uemana ua mu bhongolokela tunde kimene katé ngoloxi.” (Makatukilu 18:13-16) Mozé ua kexile mu bhuila kiavulu mu kuívua o mundu ola joso! Maji Mozé ua sangulukile kiavulu ku kuatekesa o athu a zolele muéne.

Mozé ka kexile ngó kua evua kana, maji ua kexile ué mu a sambela. Muéne ua kexile ué mu sambela o athu a bhangele kia iibha kua muéne! Mu kifika, kioso Midiiana phange’a Mozé, kia kexile mu longolola Mozé, Jihova ua mu kaxtikala ni dibhute. Mu veji dia ku sanguluka, Mozé ua bhingile mu musambu: “Nzambi, mu sake, nga ku dióndo.” (Dialuilu 12:13) Ihi ieji bhangesa Mozé ku samba phala Nzambi ku loloka phang’iê?

PHANGU IAHI I TU KATULA KUA MUÉNE?

Tu tena ku kaiela o phangu ia Mozé mu ku londekesa o henda ietu kua Nzambi. O henda íii, i tena ku tu kuatekesa ku belesela o ijila iê “ni muxima uoso.” (Loma 6:17) Kioso ki tu belesela Jihova ni muxima uoso, tu sangulukisa o muxima uê. (Jisabhu 27:11) Tu katula ué mbote. Kioso ki tu sidivila Nzambi mu henda, ki tua-nda bhanga ngó o ima ia tokala, maji tua-nda sanguluka ué mu ku i bhanga!—Jisálamu 100:2.

Tu tena ué ku kaiela o phangu ia Mozé, mu kulondekesa o henda ietu ku akuetu. Kioso o makamba mba jindandu jetu kia bhixila ko kuetu ni maka mâ, o henda i tu suínisa (1) ku a evua kiambote, (2) ku divua kála kia mu divua ene ni (3) kulondekesa kuila tua a suu.

Kála Mozé, tu tena ku a tumbula mu misambu ietu. Saí ithangana tu luuala kiavulu mukonda ki tu tena ku a kuatekesa. Nange tu zuela ni ku luuala: “Kima kia iibha ki ua mu bhita na-kiu, eme ngi divua kia iibha, ngi tena ngó ku samba phala Nzambi ku ku kuatekesa.” Maji ijiia-kiu kuila: ‘O musambu ua muthu ua iuka, uala ni kutena kuavulu.’ (Tiiaku 5:16) O misambu ietu i bhangesa Jihova ku kuatekesa o muthu ua bhindama. O kuila saí kima kia beta dingi kota ki tu tena o ku bhanga phala ku kuatekesa o athu, o ku samba ndenge?a

Eie ku xikina kuila tu tena ku di longa kiavulu ku phangu ia Mozé? Sumbala uexile diiala kala etu, muéne ua tu xila phangu ia dikota ia kixikanu, kulenduka ni ia henda. Se tu kaiela jinga o phangu iê, tua-nda tena ku zediua ni ku kuatekesa akuetu.—Loma 15:4.