ZUKAMA KUA NZAMBI
‘Kolokota mu ku Bhinga, A-nda ku Bhana’
‘Ngana, tu longe o ku samba.’ (Luka 11:1) Jezú a mu bhingi ku bhanga kiki ku dixibulu diê. Phala ku tambuijila, Jezú ua te ifika iiadi i tu longa kiebhi ki tua tokala o ku samba n’a tuivu kua Nzambi. Se ua di bhuidisa kiá se Nzambi uivua o misambu iê, ua-nda sanguluka kiavulu mu kuijiia o kitambuijilu kia Jezú.—Tanga Luka 11:5-13.
O kifika kia dianga, kia tokala ku muthu u samba. (Luka 11:5-8) Mu kifika kia te Jezú, diiala u tambulula mujitu mu kaxaxi ka usuku, sé kúdia phala ku mu bhana. O diiala mukua dibhata, u thandanganha kiavulu. Sumbala tádidi kiá, muéne u lengela kubhata dia kamba diê ku sobha-ku mbolo jitatu. O kamba diê u dituna ku balumuka bhu hama, mukonda o muiji uê ua mu zeka kiá. Maji mukonda dia ku jiza kuê, u balumuka, u mu bhana ioso ia mu bhingi.a
Ihi i tu longa o kifika kiki kia lungu ni ku samba? Jezú ua mu longa kuila tua bhingi ku kolokota—ku kolokota mu ku bhinga, mu ku sota ni ku phupa. (Luka 11:9, 10) Mukonda diahi? O kuila Jezú bhabha ua mu londekesa kuila, Nzambi u laleka mu ku tambuijila o misambu ietu? Kana. Jezú ulondekesa kuila, Nzambi ka difu ni diiala mu kifika, ua laleka ku tambuijila o dikamba diê. Maji Nzambi ua mesena ku bhana o ima ia mu bhinga o jiselevende jê ni kixikanu. Tu londekesa o kixikanu kietu mu ku kolokota kuetu. Mu ku bhinga veji javulu, tu londekesa kuila tua mesena muene o ima i tua bhingi ni kuila tua dielela kuma Nzambi u tena ku tu bhana na-iu—se iene mu vondadi iê.—Marku 11:24; 1 Nzuá 5:14.
O kifika kia kaiiadi, kia tokala ku ‘mukua kuívua o misambu’—Jihova. (Jisálamu 65:2) Jezú uebhula: “Tata [iebhi] mudienu, se mon’ê ua mu bhingi mbolo, u [mu bhana] ditadi? Mba mona ua mu bhingi mbiji, bhu kididi kia mbiji u mu bhana nhoka?” Jezú ua mu londekesa kuila, se-ku tata u bhana kima kia iibha kua mon’ê. Mu kiki-phe, u jimbulula o kifika: Se o jitata akua ituxi, a bhana “ima iambote” ku tuana tuâ, “manhi Tat’enu ia diulu, ka kala kota mu [ku bhana] o Nzumbi Ikôla kua ió oso a mu bhinga?” O ujitu ua beta o kota—ku tuana tuê mu ixi!b—Luka 11:11-13; Matesu 7:11.
Nzambi ua mesena ku bhana o ima i mu bhinga o jiselevende jê ni kixikanu
Ihi i tu longa o kifika kiki kia lungu ni Jihova o ‘mukua kuívua o misambu?’ Bhu kaxi ka kifika kiki, Jezú u tu kuatekesa ku mona Jihova kala tata ia henda, uala polondo phala ku tambuijila o tuana tuê kioso kia mu bhinga ki kuatekesu. Mu kienhiki, o abhezi a Jihova a tena ku zukama kua muéne sé uôma ni ku mu bhinga ioso ia bhindamena. Mu kuijiia kuila muéne ua mesena o mbote iâ, ene a tena ku xikina o kitambuijilu ki bhana Nzambi né muene se ki kiene kia kexile mu kingila.c
Milongi ia Bibidia phala o mbeji ia Kasamanu
a O kifika kia Jezú kilondekesa, o kifua kia Jijudé m’ukulu. Phala ene, o ku zalela ajitu, kuexile kima kikôla. O muiji ua kexile mu bhanga ngó jimbolo ja soko kizuua kimoxi, mukonda dia kiki, ki kiexile kima kia iibha o ku di sobhesa jimbolo. Se ene exile jingadiama, o muiji uoso u zeka bhoxi mu dixilu dimoxi.
b Mu veji javulu, Jezú ua tumbula o kizuelu, “manhi” mu ku mateka ni ndenge ni ku suka ni dikota. Saí mukua ku tokuesa o Bibidia, ua jimbulula o kizuelu kiki: “Se o kima kia dianga, kia kidi, mu kiki-phe, o kima kia kaiiadi, kia beta o kota mu ku kala kia kidi.”
c Phala kuijiia dingi kiebhi ki tua tokala o ku samba ni ku tuívua kua Nzambi, tanga o kibatulu 17 kia divulu, Mu Kidi Ihi i Longa o Bibidia?, a di bhange ku Jimbangi ja Jihova.