Njimbu Iambote Phala Athu Oso

O difukunukinu dia Jezú dia suínisa kiavulu o maxibulu mê. O poxolo Phaulu ua nhungu o ixi ioso ia Azia Menore ni ku Meditelânio, ku bhanga ilunga ni ku suínisa o Jikidistá ku kolokota mu ku kala ni ukexilu uambote sumbala ni ibhidi. Sumbala ni ibhidi, athu avulu a kituka Jikidistá.

Phaulu a mu ambata mu kaleia. Maji né muene mu kaleia, muéne ua soneka mikanda iu ua i tumikisa ku jiphange mu ilunga ioso phala ku a suínisa. Muéne ua a dimuna ku kiluezu kieji kuíza—o akua ku lungulula o kidi. Ni kikuatekesu kia nzumbi ikôla, Phaulu ua zuela kuila mu’axaxi kâ, kueji “kuiza jimbinji” eji “tanga ima ia makutu” ni ku “sunga jixibulu ku mbandu iâ.”—Ikalakalu 20:29, 30.

Mu disukilu dia hama ia dianga, o akua ku lungulula o kidi a moneka mu kilunga. Mu kithangana kieniókio, Jezú ua jimbulula kua poxolo Nzuá mu kisuma, ihi ieji bhita ku hádia. Kala kia soneka Nzuá, ki kale o jinguma mba o jimesene ja makutu, keji tena ku fidisa Nzambi ku kumbidila o vondadi iê ia lungu ni ixi ni athu. “Athu oso a tungu mu ngongo, ku ifuxi ioso, ni madimi, ni madiembu,” a-nda kuívua o njimbu iambote ia lungu ni Utuminu ua Nzambi. (Dijingunuinu. 14:6) O ixi ioso ia-nda kala dingi Palaízu, muthu uoso-uoso ua mesena ku bhanga o vondadi ia Nzambi u tena ku kala-mu!

O kuila íii “njimbu iambote” phala eie? Se kiene, di longe dingi ia lungu ni njimbu ia Nzambi phala o athu i tu sanga mu Bibidia ni kiebhi o njimbu íii, i tena ku ku bhekela mabesá lelu ni ku hádia.

Eie u tena ku tanga o Bibidia mu phutu, mu, www.jw.org. Mu Kijimbuete kiki, u tena ué ku tanga o kadivulu, Njimbu Iambote ia Nzambi! ni divulu, Mu Kidi Ihi i Longa o Bibidia? ni kikuatekesu kia madivulu a mukuá, a jimbulula se mukonda diahi tua tokala ku dielela mu Bibidia ni kiebhi ki tu tena ku kumbidila o milongi iê ku muiji uetu ni ku muenhu uetu. Se ua mesena dingi milongi ia mukuá, bhinga ku Jimbangi ja Jihova.

—O milongi íii ia tundu mu divulu dia Ikalakalu, Efezo, Filipe, Kolose, Filimone, 1 Nzuá, Dijingunuinu.