O Kuila Kuene Jianju Jaiibha?

Xiê, kuene jianju jaiibha. Jene ja tundu kuebhi? Lembalala kuila Nzambi ua bhange o jianju joso ni ufolo ua kusola. Kioso Nzambi kia bhange o diiala ni muhatu ua dianga, Adá ni Eva, mu kubhita thembu, anju ia iuka ia bhange kima kiaiibha iu ua suinisa o kubhukumuka mu ngongo. Muene ua tena kubhangesa Adá ni Eva kubhukumukina Nzambi. (Dimatekenu 3:1-7; Dijingunuinu 12:9) O Bibidia ki i tumbula o dijina dia anju ienii né muene kuzuela o kididi kia kexile na-kiu ku diulu ande dia kubhukumuka. Maji kioso kia bhukumukina Nzambi, o anju ienii eza mu ixana mu dijina dia Satanaji, dilombolola “Nguma,” ni Diabhu, dilombolola “Kamakutu.”—Matesu 4:8-11. Majina iá a mu tokala muene mukonda dia ima ia bhange muene.

Maji o ukexilu ua kubhukumuka ki u sukile bhenhobho. Mu izuua ia Noué, sai jianju “ja xi o kididi kia a tokala” ku muiji ua Nzambi ku diulu ia eza mu ngongo. Jene ja di bhange athu mu xitu phala kubhanga maufusa. Mu kiki, ene a kaiela njila iengi.—Juda 6; Dimatekenu 6:1-4; 1 Phetele 3:19, 20.

Ihi ia bhitile ni jianju jojo jaiibha? Kioso Nzambi kia bheka o dilúviu dia buikisa athu oso mu ngongo, o jianju jenhojo axi o mikutu iâ ia xitu, ji ja di bhange dingi jianju, ji ja vutuka dingi ku diulu. Maji Nzambi kehela o jianju jenhojo kuvutuka dingi mu “kididi kia a tokala” mua kexile ku dimatekenu. Mu veji dia kiki, Nzambi ua a te mua vundu mu nzumbi mba “mu makungu ma usuku.” (Juda 6; 2 Phetele 2:4) O madimonho enhá a kituka jiselevende ja Satanaji o Diabhu, o ‘dikota dia madimonho,’ uene “mu di bhangesa kala anju ia mukengeji.”—Matesu 12:24; 2 Kolindo 11:14.

O Bibidia i longa kuila o Utuminu ua Nzambi ua mateka kutumina ku diulu ku muvu ua 1914.a Kioso kia bhiti o kizulukutu kiki kia dikota, Satanaji ni madimonho mê a a kaie ku diulu anga a a takula mu ngongo. Ene ala ni njinda iavulu, mukonda dia kiki mu ngongo mu ezala ni kuiibha ni maufusa avulu.— Dijingunuinu 12:9-12.

Maji o kudibandekesa kua ima iaiibha kulondekesa kuila o disukilu dia utuminu ua Satanaji dia zukama. Kua kambe ngó, o jinzumbi jiji jaiibha ki ja-nda tena dingi kubhanga kima. Kioso o Utuminu ua Nzambi ki ua-nda tumina o ixi mu 1.000 ia mivu, Satanaji ni madimonho mê a-nda kua bhana dingi kithangana phala kunganala o athu mu veji ia sukina. Mu kusuluka, ene a-nda kua buikisa katé ku hádia ni hádia.—Matesu 25:41; Dijingunuinu 20:1-3, 7-10.