Kala ni Kutululuka mu Kithangana Kyabhonzo

1. Kyebhi kitutena kukala ni “kutululuka kwa Nzambi”? Ni mbote yebhi itukatula mu kukala naku? (Filipe 4:6, 7)

SAYI kutululuka o athu ku mundu yú ka kwijiya. O kutululuka kuku, “o kutululuka kwa Nzambi.” Kwene kwijila mu kukala ni ukamba wambote ni Tat’etu ya dyulu. Kyoso kitukala ni kutululuka kwa Nzambi, tudivwa kyambote kala twala mu kididi kya kondama. (Tanga Filipe 4:6, 7.) Tu sanguluka kumoxi ni makamba metu azolo we Jihova. Tu sanguluka mukukala ni ukamba wambote ni “Nzambi ya paze.” (1 Te. 5:23) Kyoso kitwijiya, tudyelela, ni kubelesela o Tata yetu, o paze yê itena kutululukisa o muxima wetu né mwene se twamudibhana ni ibhidi.

2. Mukonda dyahi tuxikina kwila tutena mwene kukala ni kutululuka kwa Nzambi?

² O kwila tutena mwene kukala ni paze ya Nzambi kyoso kitudibhana ni maka kala o mabhebhu, o ita mba izukutisu? O maka yá atena kutubhangesa kukala ni wôma. Né kiki, Jezú wabhana o kitendelesu kiki ku akayedi’ê: “Ki mu tandanganye, kimukale ni wôma!” (Nzw. 14:27) Kima kyambote kwijiya kwila o jiphange ene mubelesela o kitendelesu kiki kya Jezú. Ni kikwatekesu kya Jihova, ene atululuka né mwene kyoso kya dibhana ni ibhidi yavulu.

KYEBHI KITUTENA KUTULULUKA MU KITHANGANA KYA MABHEBHU?

3. Kyebhi o mabhebhu kyatena kutukatula o kutululuka kwetu?

³ O mwenyu wa athu utena kulunguluka mu ukexilu wayibha kyoso kumoneka mabhebhu. Talesa o maka abhekela o uhaxi wa COVID-19 ku athu avulu. Nzungule dya athu ambe kwila, kene muzeka mukonda dya COVID-19. O uhaxi yu wabhangesa athu avulu kukala ni hele, ni kikote ku muxima, amukwa akituka jiholwa, amateka kunwa jidroga, ni kudibeta ku mabhata mâ. Avulu we andala kudijibha. Se mu kididi mu watungu mwala dibhebhu, kyebhi kitutena kulanga o hele yé ni kukala ni kutululuka kwa Nzambi?

4. Mukonda dyahi o kwijiya o kima kyambe Jezú kyalungu ni izuwa isukidilaku kitubhana o paze?

⁴ Jezú wambe kwila mu izuwa isukidilaku mwanda moneka mauhaxi, “mu ididi yavulu.” (Luk. 21:11) Kyebhi o kwijiya o ima yiyi kutubhana o paze? Etu kitudiwana mukwivwa o njimbu yalungu ni mauhaxi mba mabhebhu. Etu twejiya o ima yiyi, mukonda kyene kyambe Jezú. Tu belesela o kitumu kyabhana Jezú ku athu ejitunga mu izuwa isukidilaku: “Alukenu-phe, phala kimukale ni wôma.”—Mat. 24:6.

5. (a) Kala kilondekesa Filipe 4:8, 9, kyoso ki kumoneka mabhebhu, ihi itutena kutumbula mu misambu yetu? (b) O kwivwa o kitangelu kya Bibidya kyongalavale kikukwatekesa kyebhi?

⁵ Kyoso ki kumoneka mabhebhu, tutena kutandanganya ni kukala ni wôma. Kiki kyabhiti ni phangyetu mana Kintinya.b Kyoso o sekulwê ndenge ya tata ni mona sekulu kyafu ni COVID-19, mwene wexile ni wôma wakwila weji kwata o uhaxi yu ni kusambukisa many‘â. Mwene watandanganyele kwila ejimukaya kusalu, wexile we mu dibhwidisa se kyebhi kyeji sumba o kudya ni kufuta o lenda ya inzo. Mukonda dya ima yoso yiyi yexile mu mutandanganyesa, mwene kexile dingi muzeka. Maji mana Kintinya wasange o kutululuka. Kyebhi? Mwene wasambe kwa Jihova phala kumutululukisa ni kumu kwatekesa kukala ni ibanzelu yambote. (Tanga Filipe 4:8, 9.) Mwene wevu Jihova kuzwela bhukaxi ka kitangelu kya Bibidya kyongalavale. Mwene wambe: “O mbimbi ya atangi yangitululukisa, ni kwila yangilembalesa o henda yene mungikwatela Jihova.”—Jisá. 94:19.

6. Kyebhi kudilonga o Bibidya ubheka wê ni kuya mu yônge kyanda kukwatekesa?

⁶ Mu kithangana kya dibhebhu, kitutena kubhanga o ima itwexile mubhanga ande dya kumoneka o dibhebhu. Maji kana kwehela o dibhebhu ku kufidisa kudilonga o Bibidya ubheka mba kuya mu yônge. O misoso ya kidi itusanga mu madivulu metu, ni jividyu janda tulembalesa kwila o jiphange jetu amukolokota fiyele sumbala ni ibhidi kala itwamudibhana nayu. (1 Ph. 5:9) O yônge yanda kukwatekesa ni kukuswinisa bhukaxi ka Bibidya. Yene yanda kukwatekesa kuswinisa akwenu ni kukuswinisa we. (Lom. 1:11, 12) Kyoso ki uxinganeka kyebhi Jihova kya kwatekesa o jiselevende jê ja fiyele jakatele, exile ni wôma, adivwile ubheka, o kixikanu kyé kyanda kola dingi, wandakala we ni kidyelelu kuma Jihova wanda kukwatekesa we.

7. Disá dyebhi di wadilongo ku phangu ya poxolo Nzwá?

⁷ Sota kuzukama kujiphange mu kilunga. Mukonda dya dibhebhu nange kitutena kudimona dingi pholo ni pholo ni jiphange jetu mba kukala kumoxi. O ithangana kala yiyi, tutena kudivwa kala poxolo Nzwá. Mwene wamesenene kyavulu kumona kamba dyê Ngayu. (3 Nz. 13, 14) Maji sayi kithangana Nzwá katenene kumona kamba dyê Ngayu. Nzwá wabhange yatenene o kubhanga, mwene wasoneka mukanda phala Ngayu. Se ki kyene mubhana kukunda o jiphange pholo ni pholo, zwela nawu bhukaxi kamitelembe, mba wasonekena mikanda. Kyoso ki usuluka mu kuzwela ni jiphange jetu, eye kiwanda divwa dingi ubheka, wanda tululuka. Kyoso ki ukala ni hele, xinda ku tufunga, mu kusuluka xikina o kikwatekesu kyâ.—Iza. 32:1, 2.

KYEBHI KITUTENA KUTULULUKA KYOSO KIKUMONEKA MAVUWA?

8. Kyebhi o mavuwa kyatena kukatula o kutululuka kwê?

⁸ Se mu dyembu mu watungu mwabhiti mvula yadikota, anga yezalesa o dyembu dyoso, mba mwabhiti kitungutu kya ixi, túbhya twa muxitu, nange eye wexile ni hele yavulu kyoso kyabhiti o divuwa didi. Se sayi muthu ku mwiji wé wafu, o inzo yenu yabudika, nange eye wexile ni kikote ku muxima, wadivu sé kidyelelu, mba nange katé mwene eye wexile ni njinda. Kiki ki kilombolola kuma eye wazolo o kitadi mba kiwala ni kixikanu. Eye wabhiti mu ibhidi yabhonzo, amoxi amesenene kwila eye ubhanga ima yayibha. (Jobe 1:11) Né mwene mu ibhidi, eye utena kutululuka. Kyebhi kyene?

9. Ihi yambe Jezú itukwatekesa kukala polondo phala kudibhana ni mavuwa?

⁹ Xinganeka mu izwelu ya Jezú. Sayi athu abanza kuma nuka andadibhana ni mavuwa. Maji twejiya kwila o mavuwa andavula dingi mu izuwa yetu, kyenyiki tutena mwene kubhita mu mavuwa. Jezú wambe ku akayedi’ê kwila ande dya dizubhilu dya mundu yú kwejibhita “itungutu ya makota” ni mavuwa engi. (Luk. 21:11) Mwene wambe we kuma o “kuyibha” kweji dibandekesa. O ima yene mubhita mu izuwa ya lelu, twene mumona o ujibhangânga ni usweya. (Mat. 24:12) Jezú kambe kwila o mavuwa enyá ejitalesa ngó hadi kwa yó axisa Jihova. Mu kidi, jiselevende javulu jafiyele ja Jihova abhita we mu mavuwa. (Iza. 57:1; 2 Ko. 11:25) Jihova kandatulanga bhukaxi ka madiwanu ku mavuwa oso, mwene wandatubhana yoso itwabhindamena phala kukala ni kutululuka.

10. Mukonda dyahi o kudisokejeka kindala, kulondekesa kwila twala ni kixikanu? (Jisabhu 22:3)

¹⁰ Se tudisokejeka ande dya kubhita o mavuwa, ki kyanda tubhonza kutululuka kyoso maka yá kyandabhita. Maji o kwila o kudisokejeka kulondekesa kuma kitwala ni kixikanu kwa Jihova? Ki kyene. Mu kidi, o kudisokejeka kulondekesa kwila twala ni kixikanu mu kutena kwê kwa kutulanga. Kyebhi kyene? O Mak’â Nzambi atutendelesa kudisokejeka phala kudibhana ni mavuwa. (Tanga Jisabhu 22:3.) Bhukaxi ka madivulu metu, ka yônge ni jingolokela, o kilunga kya Nzambi kyene mutudimuna ithangana ni ithangana kudisokejeka phala kudibhana ni mavuwa.c O kwila twadyelela kwa Jihova? Se kyene, twandabelesela o itendelesu yiyi kindala, ande dya kumoneka o mavuwa.

11. Ihi iwadilongo mu phangu ya mamá Margaret?

¹¹ Xinganeka ku musoso wa phangyetu mamá Margaret. O jinguvulu amutendelesa kuxisa o inzo yê mukonda o muxitu wakwata túbhya. Kuma athu avulu exile mulenga mu kithangana kimoxi, o ikoka yezalele ni makalu, kwexile munonono wavulu seku dikalu dyatenene kuya ku pholo ne kudima. Kwexile dixi dyavulu bhulu, mamá Margaret katenene kutunda mu dikalu dyê. Maji mwene wabhuluka mukonda wadisokejekele ande dya kubhita o mavuwa. Mu mbwenga yê mwexile mapa mwakexile njila phala mwene kulenga. Mwene wejidile kyá se kwebhi kweji ditela se kwamonekene mavuwa. Mukonda dya kudisokejeka mamá Margaret wabhuluka ku mavuwa.

12. Mukonda dyahi kima kyambote kubelesela o itendelesu?

¹² Phala kudilanga ni kulanga we akwetu, o jinguvulu atena kututangela phala kubelesela o alarme ni itendelesu ya mukwá phala kulenga. Sayi athu kabelesela o itendelesu yiyi mukonda kamesena kuxisa o jimbote jâ. Maji ihi ibhanga o Jikidistá? O Bibidya itutangela: “Mukonda dya Ngana, tumakenu o maungana moso a ngongo, kikale o sobha mukonda mwene wa mikala kupholo, kikale o jinguvulu, mukonda ene a asolo kwa sobha.” (1 Ph. 2:13, 14) O kilunga kya Nzambi kitubhana we itendelesu phala tutene kudilanga. Ithangana yoso ene mutulembalesa phala kubhana dyalwilu dya mutelembe wetu ku tufunga phala ene atene kutuxinda se kumoneka mavuwa. O kwila wabhange kyá kiki? Etu we nange atubhana o kitendelesu kyalungu ni kuswama mu kididi kimoxi, kuya mu kididi kyengi, mba kitendelesu kyalungu ni kwebhi kutwanda tambula o ima. Atena we kututangela kwila sayi ixi o jiphange jetu amutala hadi, ni kyebhi kitutena ku akwatekesa. Se kitubelesela o itendelesu yiyi, twandatá o mwenyu wetu ni mwenyu wa tufunga mu kilwezu. Lembalala kwila o jiphange jiji jafiyele ja mutulanga. (Jih. 13:17) Mamá Margaret wambe: “Eme ngixikina ni kidi kyoso kuma o kubelesela itendelesu ya tufunga ni ya kilunga kya Jihova, kyabhulula o mwenyu wami.”

13. Ihi yakwatekesa Jikidistá javulu axisa o jinzo jâ, kusanguluka ni kukala ni kutululuka?

¹³ Jiphange javulu axisa o jinzo jâ mukonda dya mavuwa, ita mba jimvunda mwatungile, abhange yoso ni yoso phala kuxikina o ukexilu wa ubhe wa mwenyu wâ, ya amubhanga dingi mu sidivisu ya Jihova. Kala o Jikidistá mu ukulu amwanganene mukonda dya izukutisu, o jiphange jiji amusuluka ni kuboka “o njimbu yambote ya mak’â Nzambi.” (Ika. 8:4) O kuboka ku akwatekesa kulunga o mesu ku Utuminu wa Nzambi, mu veji dya kulunga o mesu ku ibhidi yâ. Mukonda dya kiki, ene asanguluka, ala ni kutululuka.

KYEBHI KITUTENA KUTULULUKA KYOSO KYATUZUKUTISA?

14. Kyebhi o izukutisu itena kukatula o kutululuka kwetu?

¹⁴ Kyoso kyatuzukutisa, ku tubhonza kutululuka. Tusanguluka kyavulu kyoso kitudyongeka ni akwetu, tuboka mu ikoka ni kubhanga o ima itwene mubhanga izuwa yoso sé kukala ni wôma wa kwila andatuta mu kaleya. Se kitutena kubhanga o ima yiyi, tutena kukala ni hele ni kukala ni wôma wa ima itena kubhita ku pholo. O kudivwa kiki, ki kima kyayibha. Maji, twatokala kudilanga. Jezú wambe kwila o izukutisu yejibhangesa o akayedi’ê kudibhukana. (Nzw. 16:1, 2) Kyebhi kitutena kukala ni kutululuka, né mwene se atuzukutisa?

15. Mukonda dyahi kitutokala kukala ni wôma wa kutuzukutisa? (Nzwá 15:20; 16:33)

¹⁵ O Mak’â Nzambi amba kwila: “Oso adibhakula mu kusidivila Nzambi mu ukamba ni Kidistu Jezú, anda kwa zukutisa we.” (2 Ti. 3:12) Sayi phange amwixana manu Mandele, kyamubhonzele kuxikina kwila o Jimbangi joso ja Jihova mu ixi yê eji kwazukutisa. Mwene wexile muxinganeka kiki: ‘Bhabha bhwala Jimbangi ja Jihova javulu. Kyebhi o jinguvulu kyandatena kuta etu enyoso mu kaleya?’ Maji mu veji dya kumubhekela paze, o ixinganeku yiyi yexile mumubhekesa hele yavulu. Jiphange ja mukwá adyelele kwa Jihova, ene kexile mubanza kwila keji kwata mu kaleya. Ene ejidile kwila ejitena we ku ata mu kaleya, maji kexile ni hele yavulu kala manu Mandele. Mwene wasolo kukayela o phangu ya jiphange jengi ni kudyelela kwa Nzambi. Mu kusukaku mwene watenene kukala ni kutululuka, kindala wasanguluka sumbala mu ixi yê mwala hanji maka avulu. Kima kiki kitena we kubhita n’etu. Jezú watutangela kwila andatuzukutisa, maji watudyelelesa we kwila tutena kukala fiyele.—Tanga Nzwá 15:20; 16:33.

16. Itendelesu yebhi itwatokala kubelesela mu ithangana ya izukutisu?

¹⁶ Se o kikalakalu kyetu akifidisa mu ixi mutwala, twandatambula itendelesu yavulu ku filiyale ni ku tufunga. O itendelesu yiyi phala kutulanga, phala kutukwatekesa kutambula o kudya mu nzumbi ni kutukwatekesa kuboka mu ukexilu ki utubhekesa maka. Bhanga yoso phala kubelesela o itendelesu i utambula, né mwene se ki wamutendela kyambote se mukonda dyahi akubhanayu. (Tiy. 3:17) Ku mbandu ya mukwá, kana kutangela o ima yalungu ni jiphange jetu ni ima mu kilunga kya Jihova, ku athu katokala ku ijiya.—Ndo. 3:7.

17. Kala kyabhiti ni jipoxolo ku hama yadyanga, etu twala polondo phala kubhanga ihi?

¹⁷ O kima kimoxi kibhangesa Satanaji kubhânga ni mundu wa Nzambi kyenyiki: Ene “ala ni kikalakalu kya kubhana umbangi walungu ni Jezú.” (Dij. 12:17) Kana kwehela Satanaji ni mundu wê ku kukwatesa wôma. O kuboka ni kulonga né mwene ni izukutisu kutusangulukisa, kutubhana we paze. Ku hama yadyanga kyoso o jinguvulu ya Jijudé kyatumu o jipoxolo kweha kuboka, o jipoxolo asolo kubelesela Nzambi. Ene asuluka ni kuboka, o kikalakalu kiki kya asangulukisa. (Ika. 5:27-29, 41, 42) Maji kyoso o kikalakalu kyetu kya kifidisa mu ixi mutwala, twatokala kudilanga mu kuboka. (Mat. 10:16) Se tubhanga yoso itutena, twandakala ni kutululuka kwijila mu kusangulukisa Jihova ni mu kubokela o athu yalungu ni njimbu ya mwenyu.

“O NZAMBI YA PAZE WANDA KALA” N’EYE

18. O paze ya kidi itunda kwa nanyi?

¹⁸ Dyelela ni kidi kyoso kwila né mwene mu ithangana yabhonzo, tutena kukala ni paze. Mu ithangana yiyi, twatokala kulembalala kwila o paze itwabhindamena, o paze ya Nzambi. Jihova mwéne ngó utena kubhana o paze yiyi. Dyelela kwa mwene kyoso ki udibhana ni mabhebhu, mavuwa, mba izukutisu. Dikwatenene mu kilunga kyê. Xinganeka ku mabesá utwandatambula ku hádya. Mu kubhanga kiki, “o Nzambi ya paze wanda kala” n’eye. (Fil. 4:9) Mu milongi yakayela, twandadilonga kyebhi kitutena kukwatekesa o jiphange jetu amudibhana ni izukutisu kukala ni paze ya Nzambi.