Wamulembalala?

O kwila eye watange mwene kyambote o milongi yoso ya Mulangidi wa muvu yú? Se kyene, twa kudyondo tala o itambwijilu ya ibhwidisu yakayela:

Mbote yebhi itwandakatula se tungastala o kithangana kyetu mu kuzwela yalungu ni Jihova, mu ku mwivwa ni kubanza yalungu ni mwene?

Twandasola o ima ni unjimu, twandakala tu alongexi ambote, o kixikanu kyetu kyandakola dingi, ni kwila o henda yetu kwa Jihova yanda dibandekesa dingi.—w22.01, mafwe 30-31.

Kikwatekesu kyebhi kitwandakala nakyu se tudyelela kwa Jihova ni ku athu atukala ku pholo mu kilunga kyê?

Kindala kyene o kithangana kya kudyelela mu ukexilu wa Nzambi wa kubhanga o ima. Kitutokala kukala ni phata ya ima isola o tufunga mba ya itendelesu itutambula kwa ene. Kyoso kyandamateka o hadi ya dikota, twandakala polondo phala kubelesela o itendelesu yoso, katé mwene o itendelesu itumona kwila ki yatokala.—w22.02, mafwe 4-6.

Ihi yamesenene kuzwela o anju kyoso kyambe kwila o Jijudé “a ká sanguluka mu kumona o pulumu bhu lukwaku lwa [Nguvulu] Zolobabele?” (Zak. 4:11)

O kisuma kiki kyexile mulondekesa ku mundu wa Nzambi kwila, sumbala o tembulu ya ubhe yexile yofele mu ku isokesa ni tembulu yokulu, ene ejitena ku izubha ni kwila yeji kala mwene kala kyamesenene Jihova.—w22.03, mafwe 16-17.

Kyebhi kitutena kukala “phangu yambote . . . mu kuzwela”? (1 Ti. 4:12)

Tutena kubhanga kiki mu kuzwela ni henda ni kuxila kwoso mu ukunji, mu kwimba ni muxima woso, mu kutambwijila mu yônge, mu kuzwela o kidi, mu kuswinisa akwetu ni mu kukamba kulongolola o athu.—w22.04, mafwe 6-9.

Mukonda dyahi o idifwa ya yama iwana (mautuminu) yotumbule mu divulu dya Daniyele kibatulu 7 yadifwangana ni idifwa ya kyama kyotombule mu Dijingunwinu 13:1, 2?

O kyama kya muxitu kyotumbule mu Dijingunwinu 13 ki kilombolola ngó utuminu umoxi, kala o Utuminu wa Loma. Maji, kilombolola o mautuminu moso atumine kyá mu ngongo.—w22.05, difwe 9.

Kyebhi ki tulondekesa kwila twadyelela mu ukexilu wa Nzambi wa kubatula o maka?

Se bhukala muthu utulolokala, utuxinga, mba uta kituxi kokwetu, tubhanga yoso ni yoso phala kitubhake phonzo, ni kukinga kwa Jihova phala kubatula o maka. Mwene wandazubha o maka oso atubhekela kituxi.—w22.06, mafwe 10-11.

Mu kusamba mu yônge o phange watokala kuxinganeka mu ihi?

Mu kusamba mu yônge kitutokala kubhana itendelesu, né kubhana ngolokela. Ki tubhingi we “kuzwela kyavulu” bengebenge ku dimatekenu dya kyônge. (Mat. 6:7)—w22.07, mafwe 24-25.

Mu ukexilu webhi o athu “oso abhange ima yayibha, anda kwa fukununa phala kwa fundisa”? (Nzw. 5:29)

Ene kanda kwafundisa phala kwabalakala mukonda dya ima yabhange ande dya kufwa. Ene anda kwafundisa bhukaxi ka ima yandabhanga kyoso kyanda kwafukununa.—w22.09, difwe 18.

Ngolokela yebhi yabhange phange J. F. Rutherford mu kyônge kya dikota kya Katutu ka 1922?

Mu kyônge kya dikota mu mbanza ya Cedar Point, Ohio, Estados Unidos, mwene wambe: “Talenu o Sobha yu tumina kyá! Kyenyikiphe, énu mwatokala kubokela o athu. Mu kikiphe, bokenu, bokenu, bokenu o njimbu yalungu ni Sobha ni Utuminu wê!”—w22.10, mafwe 3-5.

Kala kilondekesa Izaya 30 mu maukexilu ebhi atatu Nzambi utukwatekesa kukolokota?

O kibatulu kiki kilondekesa kwila Nzambi (1) wivwa, utambwijila o misambu yetu, (2) utubhana itendelesu, (3) utubesowala kindala, ni kwila ku hádya wandatubesowala we.—w22.11, difwe 9.

Mukonda dyahi twamba kuma o izwelu ya Sálamu 37:10, 11, 29 yadikumbidila mu ukulu ni kwila yanda dikumbidila we ku hádya?

O izwelu ya Davidi yalondekesa mwene o mabesá exile nawu o akwa Izalayele mu Utuminu wa Solomá. Mu kuzwela yalungu ni palayizu ku hádya, Jezú watumbula we o izwelu ya vélusu 11. (Mat. 5:5; Luk. 23:43)—w22.12, mafwe 8-10, 14.