3 | O Misoso ya Athu Otumbule mu Bibidya Itena Kukwatekesa

O BIBIDYA IZWELA . . . Yalungu ni mayala ni ahatu afiyele adibhanene ni ibhidi kala itwene mudibhana nayu.—TIYAKU 5:17.

Ihi Ilombolola o Izwelu Yiyi?

Mu Bibidya tusangamu misoso ya mayala ni ahatu exile mutandanganya kyavulu ni ibanzelu yayibha. Kyoso kituya ni kutanga o misoso yâ, nange tusanga musoso wa muthu wabhiti mu ibhidi kala itwamudibhana nayu.

Kiki Kitena Kutukwatekesa Kyebhi?

Etu enyoso twamesena kwila akwetu atutendela, bengebenge se twamudibhana ni uhaxi wa kikote ku muxima. Kyoso kitutanga o Bibidya, tusangamu misoso ya athu exile ni ibanzelu kala itwala nayu etu. Kuma adibhele we ni ibhidi itwamubhita nayu, tumona kwila k’etu ngó twamudibhana ni uhaxi wa kuvula o hele.

Mu Bibidya mwala izwelu ya athu aluwalele kyavulu, adivu kwila kexile dingi ni kidyelelu. O kwila sayi kizuwa wabanze kiki: ‘Kwabhu kyá, kota ngafwami’? Mozé, Elija ni Davidi adivu we kiki.—Dyalwilu 11:14; 1 Jisobha 19:4; Jisálamu 55:4.
O Bibidya izwela yalungu ni muhatu amwixana Ana, ‘waluwalele kyavulu’ mukonda kexile muvwala twana, mu kiki o mukajin’ê wexile mu musebhulula kyavulu.—1 Samuwele 1:6, 10.
O Bibidya izwela yalungu ni diyala amwixana Jobe wadibhele ni ibhidi yavulu ku mwenyu. Sumbala wexile ni kixikanu kya dikota kwa Jihova, sayi kizuwa waluwalele kyavulu yu wambe: “Mwenyu wami wa ngi kumu, ngwami kukola mwenyu izuwa yoso kiki.”—Jobe 7:16.

O athu yá otumbule mu Bibidya adibhana kyambote ni ixinganeku yâ yayibha. O phangu yâ itena kutukwatekesa kudibhana ni mukondo wetu.

Kyebhi o Bibidya Yamukwatekesa Kevin

O Uhaxi wa Kuluwala ni Kusanguluka mu Kithangana Kimoxi

“Kyoso kingatenesa 50 a mivu, o jidotolo angitangela kwila ngala ni uhaxi wa ngibhangesa kuluwala ni kusanguluka mu kithangana kimoxi. Sayi bhabha ngimona kwila ngitena kubatula o maka oso amoneka ku mwenyu wami. Maji mu ithangana ya mukwá ngidivwa kwila o mwenyu wami kiwala ni valolo.”

Kyebhi o Bibidya Yene mu Ngikwatekesa?

“O musoso wa Bibidya wene mungikwatekesa, wa poxolo Phetele. Sayi ilwezu yate mwene, yamubhangesa kudivwa sé valolo. Maji mu veji dya kusuluka kudivwa kiki, mwene wasoto kikwatekesu ku makamba mê amuzolele kyavulu. Kyoso kingamudivwa kyayibha mukonda dya uhaxi wami, ngitandanganya kyavulu mukonda dya itondalu yami, kyenyiki ngidivwa kwila kingala ni valolo. Kala poxolo Phetele, ngenemubhanga nguzu yavulu phala kukala kumoxi ni makamba mami amesena kungikwatekesa kudibhana kyambote ni uhaxi wami.

“O musoso wamukwa ungikwatekesa kyavulu wa Sobha Davidi. Mu ithangana yavulu wadivu kyayibha mukonda dya ibhidi yexile mu dibhana nayu ni ilwezu yatele. Kuma sayi bhabha ngizwela mba ngibhanga ima ingibhangesa kudyela, ngene mudivwa kala mwene. O izwelu ya Davidi yala mu Jisálamu 51 yene mungiswinisa. Mu velusu 3, Davidi wambe: ‘Nga xikina kuma nga ku bhukumukina; mbata, o ikuma yami nga ijiya mwene kyambote.’ Kyoso o ibanzelu yayibha ingivula, kingibanza kyambote yalungu n’eme. Eme we ngixinganeka mu izwelu ya Davidi yala mu velusu 10: ‘Nzambi yami, ngi kalakale moxi muxima wengi wazele; ngi bhangulule dingi ni nzumbi ya kuyuka moxi dyami.’ Kyoso kingamusamba, ngitumbula we izwelu kala yiyi phala Nzambi nangikwatekese kudimona mu ukexilu wambote. Ngawabhela we kyavulu o izwelu yala mu velusu 17. Yene yamba: ‘Muxima watoloka, wadyela mwene, eye Nzambi ku dituna-u.’ O velusu yiyi ingidyelelesa kwila Nzambi wangizolo.

“Mu kudikwatenena ku misoso ya Bibidya ni ku ima yene mubhanga Nzambi phal’eme, ngikala dingi ni kidyelelu kya kwila ku hádya o ima yandawabha. Kuma ngadyelela mu ikanenu ya Bibidya, ngala dingi ni nguzu phala kudibhana ni uhaxi wami.”