Sumbala ni Ita Asange o Kutululuka
Gary wexile disoladi wambe kiki: “Ande dya kumateka kudilonga o Bibidya, eme ki ngejidile se mukonda dyahi mu ngongo mwene kuyibha kwavulu ni maka. Maji lelu ngasange o kutululuka. Ngejiya kwila Jihova Nzambi wanda bhangesa o mundu yu kukituka kidid kyakondama.”
Gary, kimwene ngo udivwa kiki. Tumone kyebhi o Bibidya yakwatekesa o athu amukwa.
IHI IZWELA O BIBIDYA: ‘Kuma, eye Ngana Jihova, u muthu wambote, u lenguluka kuloloka.’—Jisálamu 86:5.
MUKONDA DYAHI O IZWELU YIYI IKWATEKESA?: “O velusu yiyi ingilonga kwila Jihova mukwa jihenda. Ngejiya we kwila mwene wanda ngiloloka mu yoso ingabhange kyoso kingexile mu usoladi.”—Wilmar, Colômbia.
IHI IZWELA O BIBIDYA: “Kuma eme ngi yudika kyá mawúlu mobhe; ni oxi yobhe; o ima ya bhiti kyá ki bhu kala dingi ku i banza, né ngó kwiza mu kilunji, lémbwa.”—Izaya 65:17.
MUKONDA DYAHI O IZWELU YIYI IKWATEKESA?: “Ngikala ni njinda yavulu, o muxima ungikata mukonda dya ima yoso ingabhiti mu usoladi. O velusu yiyi ingilembalesa kwila Jihova wandajima o ibanzelu yoso yayibha ingala nayu. O ibanzelu yoso yiyi yanda jimuka kate ku hádya ni hádya. Kyoso o ima yiyi yanda bhita nganda sanguluka kyavulu!”—Zafirah, Estados Unidos.
IHI IZWELA O BIBIDYA: “Mu izuwa yê athu a yuka akala mukuzanda, kukala paze inangenena kala kinangenena o mbeji.”—Jisálamu 72:7.
MUKONDA DYAHI O IZWELU YIYI IKWATEKESA?: “Ngene mulembalala jinga o izwelu yiyi. Kwakambe ngo bhofele o ita yoso mu ngongo yandabhwa. Nuka dingi twanda kala ni hele mukubanza se o jindandu jetu ala mukilwezu mba kana.”—Oleksandra, Ucrânia.
IHI IZWELA O BIBIDYA: “O athu’é, àfwa, a k’èza dingi ku mwenyu. . . . phaphumukenu, mu tane ni kusanguluka enu mwà tunga mu fufutila.”—Izaya 26:19.
MUKONDA DYAHI O IZWELU YIYI IKWATEKESA?: “Ndumba ni ndumba dya jindandu jami afwila mu ita yabhiti mu ixi yami. Maji o velusu yiyi ingidyelelesa kwila, nganda tena kumona dingi o jindandu jami, ngala ni hanji yavulu ya kwivwa o dizwi dya kyoso kyanda kwa fukununa!”—Marie, Ruanda.
IHI IZWELA O BIBIDYA: “Bhu bhita ngó kathangana, mukwa phulu-ó ubhwa athu ku mesu . . . Oso-phe a lenduka, ene a lundula o ixi; A kala ku ngalasa ni kutululuka kwavulu.”—Jisálamu 37:10, 11.
MUKONDA DYAHI O IZWELU YIYI IKWATEKESA?: “O ita mu ixi yami yabhu kya, maji kate kiki kwala hanji ima yavulu ya ibha ni athu avulu ayibha. O jivelusu jiji jingiswinisa kyavulu. Jihova umona o ima yoso, umona we kyebhi kingamudivwa. Mwene utukanena kwila o hadi yoso yiyi yanda bhwa nuka dingi twanda lembalala o ima yiyi.”—Daler, Tadjiquistão.
O athu a atumbula mu kadivulu kaka, Jimbangi ja Jihova. Ene asange o kutululuka mukonda dya kudilonga o Bibidya. O Jimbangi ja Jihova adilongo kukatula o katombo ku mixima ya. Phala ene kikwala yu watokala mu ixi yanganji mba-phe ku mwiji wanganji. (Efezu 4:31, 32) Ene kene mudita mu maka a jinguvulu, kene we mudita mu jimvunda.—Nzwá 18:36.
O Jimbangi ja Jihova ku mundu woso edikala ana mbwiji, ene mudikwatekesa mudya. (Nzwá 13:35) Mu kifika, Oleksandra, mukonda dya ita yabhiti mu ixi yê mwene walenge mu ixi yengi ni phang’ye. Mwene wambe: “Kyoso kitwazawuka o mbambe, o kima kyadyanga kitwamono, o jiphange atokalele mu ixi yenyoyo exile kya mutukingila phala kututambulula. Mukonda dya kulenga o ita mu ixi yetu, o kikwatekesu kyatubhana ene kyatukwatekesa kudivwa kyambote mu ixi yenyoyo.”
Twamukwixana we eye phala wende mu yonge yetu, mu yonge yetu tudilonga se kyebhi kitutena kukala ni kutululuka mu kukumbidila o milongi ya Bibidya. Nde mu sayite yetu jw.org, phala utene kusanga kididi kyazukama bhu watungu phala ubhinge ku Jimbangi ja Jihova na kulonge o Bibidya se kufuta kitadi bhukaxi ka kadivulu Sanguluka Katé Kuhádya ni Hádya!