2 Йуһʹәнна

1 Әз каләмер,* ханьма бьжартирʹа у зарʹед ԝерʹа дьньвисьм, кʹижана әз бь рʹасти һʹәз дькьм, у нә тʹәне әз, ле һʹәму кәсед кӧ һатьнә сәр рʹийа рʹастийе. 2 Әм ԝә һʹәз дькьн, чьмки рʹасти дьле мәда йә у әԝе һʹәта-һʹәтайе бьминә. 3 Дә бьра кʹәрәма мәзьн, рʹәʹм у әʹдьлайи жь Хԝәде Баве мә, у жь Кӧрʹе ԝи Иса Мәсиһ, бь рʹастийе у һʹәзкьрьне тʹәви мә бә.

4 Гава мьн бьһист кӧ һьнә зарʹед тә ль гора тʹәмийа кӧ мә жь Бав стандийә, рʹийа рʹастийеда дьчьн, әз гәләк ша бум. 5 Ньһа әз һиви тә дькьм, ханьм, әԝ тʹәмийа кӧ мәрʹа һатийә дайине ԝәки һәвдӧ һʹәз бькьн, хԝәй кьн. (Әз нә кӧ тʹәмикә ну, ле тʹәмийа кӧ мә жь дәстпеке стандьбу, тәрʹа дьньвисьм.) 6 Һʹәзкьрьн әв ә, кӧ әм бәрдәԝам кьн ль гора тʹәмийед Бав бьжин. Тʹәмийа кӧ ԝә жь дәстпеке бьһистийә, әв ә: Бәрдәԝам кьн сәр рʹийа һʹәзкьрьне бьн. 7 Чьмки гәләк мәрьвед хапинок дәркʹәтьнә дьнйайе. Әԝана ԛәбул накьн кӧ Иса Мәсиһ ча мәрьв* һатийә дьнйайе. Әԝед кӧ ве йәке инкʹар дькьн, хапинок ьн у нәйаре Мәсиһ нә.

8 Һаж хԝә һәбьн кӧ һун кʹәда дәсте мә ӧнда нәкьн, ле хәлата хԝә бь тʹәмами бьстиньн. 9 Һәр кәсе кӧ хԝә ль һинкьрьна Мәсиһ нагьрә у жь синоре ԝе дәрдькʹәвә, Хԝәде тʹәви ԝи нинә. Ле кәсе кӧ хԝә ль ве һинкьрьне дьгьрә, һьм Бав һьм жи Кӧрʹ тʹәви ԝи йә. 10 Һәрге кәсәк бе бал ԝә у ль гора һинкьрьна Мәсиһ һин нәкә, ԝи кәси нә гази мала хԝә бькьн, нә жи ԝи сьлав кьн. 11 Чьмки кʹи кӧ ԝи сьлав дькә, дьбә һәвпʹаре кьред ԝийә хьраб.

12 Әз дьхԝазьм гәләк тьшта ԝәрʹа бежьм, ле әз нахԝазьм ве йәке пе кʹахаз у һʹӧбьре бьньвисьм. Гӧмана мьн һәйә кӧ әзе бемә бал ԝә у рʹу бь рʹу тʹәви ԝә хәбәр дьм, сәва кӧ һун гәләк ша бьн.

13 Зарʹед хушка тәйә бьжарти тә сьлав дькьн.