Сәрһати 6

Кӧрʹе Баш У Кӧрʹе Хьрав

ҺӘЛА дина хԝә бьдә Ԛайин у Һабил. Әԝана ида мәзьн бунә. Ԛайин бу щоткʹар. Әԝи гәньм, пʹьнщар у емиш мәзьн дькьр.

Һабил жи бу шьван. Әԝи һʹәз дькьр мьԛати бәхькед бьчʹук буйа. Ле бәхькед бьчʹук мәзьн дьбун у жь ԝан ида кәрийед пез чедьбун, ләма жи Һабил ча шьванәки баш мьԛати ԝан дьбу.

Рʹожәке Ԛайин у Һабил Хԝәдерʹа ԛӧрбан анин. Ԛайин жь ԝан тьшта ԛӧрбан кьр, йе кӧ әԝ мәзьн дькьр. Һабил жи пәзе хԝәйе жь һʹәмушка баштьр ԛӧрбан кьр. Йаһоԝа Һабил у ԛӧрбана ԝи ԛәбул кьр. Ле Ԛайин у ԛӧрбана ԝи ԛәбул нәкьр. Гәло чьрʹа?

Нә сәва ԝе йәке, кӧ ԛӧрбана Һабил жь ԛӧрбана Ԛайин четьр бу. Хԝәде ԛӧрбана Һабил ԛәбул кьр, чьмки әԝ мәрики баш бу. Әԝ нә тʹәне Йаһоԝа, ле ӧса жи бьре хԝә һʹәз дькьр. Ле Ԛайин мәрики хьрав бу, әԝи бьре хԝә һʹәз нәдькьр.

Ләма жи Хԝәде готә Ԛайин, кӧ әԝ гәрәке нете дьле хԝә рʹаст кә. Ле Ԛайин гӧһ нәда Йаһоԝа. Әԝ гәләк һерс дьбу, чахе дьдит кӧ Хԝәде Һабил һе зәʹф һʹәз дькә. Щарәки Ԛайин готә Һабил: «Кʹа әм һәрʹьн зәԝийе». Гава әԝана тʹәне ман, Ԛайин бьре хԝә хьст. Әԝи ӧса ԛайим ԝи хьст, кӧ әԝ мьр. Әԝи гәләк тьштәки хьрав кьр, ӧса нинә?

Рʹаст ә Һабил мьр, ле йәкә әԝ дь бира Хԝәдеда нә. Һабил мәрики гәләки баш бу, у мәрийед мина ԝи Йаһоԝа тʹӧ щар бир накә. Рʹожәкә ӧса ԝе бе, чахе Йаһоԝа ԝе Һабил жь мьрийа рʹакә. Һабил тʹӧ щар ԝе ида намьрә. Әԝ ԝе бькарьбә ль сәр әʹрде һʹәта-һʹәтайе бьжи. Чьԛас ԝе һʹәԝас бә насийа хԝә бьдьн мәрийед мина Һабил!

Хԝәде мәрийед мина Ԛайин һʹәз накә. Гава Ԛайин бьре хԝә кӧшт, Хԝәде бәри ԝи да жь нәфәред мала ԝи у ԝи чоле хьст. Чахе әԝ гәрәке жь нәфәред хԝә дур кʹәта, әԝи тʹәви хԝә хушкәкә хԝә һьлда, йа кӧ пашԝәхтийе бу жьна ԝи.

Ԝәʹдә шунда Ԛайинрʹа зарʹ һатьн буйине. Щәм Адәм у Һеԝа зарʹед дьн жи һәбун, әԝана жи зәԝьщин у зарʹ анин. Ԝәʹдә дәрбаз дьбу у мәри ль сәр әʹрде зедә дьбун. Дь ԝе кʹьтебеда сәрһатийа һьнә жь ԝан мәрийа һәнә. Ԝәрә әм дәрһәԛа ԝан пебьһʹәсьн.

Дәстпебун 4:2-26; 1 Йуһʹәнна 3:11, 12; Йуһʹәнна 11:25.