Сәрһати 7

Мере Мерхас

МӘРИ ль сәр әʹрде зедә дьбун, у гәлә жь ԝан мәрийа мина Ԛайин хьравийе дькьрьн. Ләма жи хьрави жь бәр һәв зедә дьбу. Ле нав ԝан мәрик һәбу, йе кӧ нә мина ԝан бу. Наве ԝи Һәнох бу. Һәнох мәрики мерхас бу. Рʹаст ә һʹәму мәрийед дор-бәре ԝи хьравийе дькьрьн, ле әԝи Хԝәдерʹа йәкә ԛӧльх дькьр.

Гәло чьрʹа мәрийед ԝи чахи һаԛа хьрави дькьрьн? Һәла бинә бира хԝә, кʹи Адәм у Һеԝа дәʹвда, кӧ әԝана гӧрʹа Хԝәде нәкьн у емиш жь дара беизьн бьхԝьн? Рʹаст ә, мьлйакʹәте хьрав ԝана дәʹвда. Кʹьтеба Пироз дьвежә, кӧ наве ԝи Шәйтʹан ә. Әԝ дьхԝазә ӧса бькә, кӧ һәр кәс жь мәрийа хьравийе бькә.

Щарәке Хԝәде готә Һәнох, кӧ әԝ гәрәке мәрийарʹа бежә, кӧ һʹәму мәрийед зӧлм ԝе ԛьрʹ бьн. Ле әв гьли дьле ԝан мәрийа хԝәш нәһат у әԝана гәлә һерс дькʹәтьн. Ԝана һәла һе дьхԝәстьн Һәнох бькӧштана. Ләма жи Һәнохрʹа, сәва кӧ мәрийарʹа даннасин бькә дәрһәԛа ԛьрара Хԝәде, мерхаси лазьм бу.

Ле Хԝәде нәһишт, кӧ Һәнох гәлә ԝәхт нав ԝан мәрийа бьжи у бьчәрчьрә. Һәнох сәри-бьни 365 сал әʹмьр кьр. Ле чьрʹа әм дьвежьн кӧ «сәри-бьни 365 сал»? Чьмки мәрийед ԝан ԝәʹда, жь мәрийед иройин, һе ԛәԝат бун у һе зедә дьжитьн. Дә бьдә һʹәсаве хԝә, кӧ Мәтӧшәлаһе кӧрʹе Һәнох 969 сала жит!

Паши мьрьна Һәнох, мәри һе зедә дь алийе хьравда дьчун. Кʹьтеба Пироз дьвежә: «Һәр фькьра ԝан дәрһәԛа хьравийе бу у әʹрд пе зӧлме тʹьжә дьбу».

Ле тӧ зани чьрʹа һʹале дьнйайе ӧса хьрав бу? Чьмки Шәйтʹан бь щурʹәки тʹәзә дәстпекьр мәрийа ль сәр алийе хьравийе бьвә. Дь сәрһатийа майинда әме пебьһʹәсьн әԝи чь кьр.

Дәстпебун 5:21-24, 27; 6:5; Ибрани 11:5; Щьһуда 14, 15.