Сәрһати 8

Мәрийед Тәрʹьки Ль Сәр Әʹрде

БЬДӘ һʹәсаве хԝә, тӧ хԝәрʹа рʹева дьчи у ньшкева дьвини кӧ мәрики тәрʹьки, бәжне ԝи ԝәкә 2-3 метьр, бәрбь тә те. Зьраве тә ԝе бьԛәтийа, ӧса нинә? Ле һәбу ԝәʹдә, чахе ль сәр әʹрде мәрийед ӧса рʹасти жи һәбун. Кʹьтеба Пироз дьвежә, кӧ бавед ԝан мьлйакʹәтед әʹзмана бун. Ле ча әв йәк ԛәԝьми?

Те бира тә әм пеһʹәсийан, кӧ мьлйакʹәтәки хьрав демәк Шәйтʹан, мәрийа дьдә шашкьрьне у ԝана дьл дькә кӧ хьравийе бькьн. Шәйтʹан, һәла һе мьлйакʹәта жи дьхԝәст бьда шашкьрьне. Һьнә мьлйакʹәт дәстпекьрьн гӧһ бьдьнә ԝи. Кʹьтеба Пироз дьвежә, кӧ әԝана шьхӧле хԝә сәр әʹзмана, йе кӧ Хԝәде дабу ԝан һиштьн у пәйа бунә әʹрде, чьмки ԝана ль сәр әʹрде ԛизед бәдәԝ дитьн у хԝәстьн тʹәви ԝан бьжин. Ләма жи, әԝана хԝә кьрьнә мәри у зәԝьщин тʹәви жьна. Кʹьтеба Пироз дьвежә, кӧ әв йәк рʹаст нибу, чьмки сәре сәрида Хԝәде ԝана ӧса чекьр кӧ әԝана ль сәр әʹзмана бьжин.

Ԝәʹдә шунда жьнед ԝан зарʹ анин. Пешийе нәдьһат кʹьвше кӧ зарʹед ԝан нә мина зарʹед дьне бун, ле пашԝәхтийе һатә хӧйане, кӧ ԛәԝат у бәжна ԝан һәр щар зедә дьбә у әԝана дьбьнә мәрийед тәрʹьки.

Мәрийед тәрʹьки гәләки зӧлм бун. Әԝана мәрийа дьчәрчьрандьн у зийан дьданә ԝана. Һьн жи ԝана дьхԝәст кӧ һʹәму мәрьв чʹәʹв бьдьнә ԝан у хьравийе бькьн.

Ԝи чахи Һәнох ида нәдьжит. Ле ль сәр әʹрде мәрики ӧса һәбу, йе кӧ тьштед ԛәнщ дькьр. Наве ԝи Нӧһ бу. Әԝ дь һʹәму тьштида гӧһ дьда Хԝәде.

Рʹожәке Хԝәде готә Нӧһ, кӧ ԝәʹде ӧса ԝе бе чахе һʹәму мәрийед зӧлм ԝе бенә ԛьрʹкьрьне. Ле Хԝәде дьхԝәст, кӧ Нӧһ, нәфәред мала хԝәва у щурʹә-щурʹә һʹәйԝан хьлаз бьн. Дә ԝәрә әм бьвиньн әв йәк ча ԛәԝьми.

Дәстпебун 6:1-8; Щьһуда 6.