Мьԛабьлбун дь Әʹзменда

Һʹәму кәсед рʹӧһʹани йед кӧ Йаһоԝа әʹфьрандьн, пешийе ԛәнщ бун. Ле паше йәк жь ван мьлйакʹәта хьраб бу. Әв Шәйтʹан Мире-щьна йә. Шәйтʹан дьхԝәст, ԝәки мәрьв ԝирʹа ԛӧльх кьн, нә кӧ Йаһоԝарʹа. У аһан чь ԛәԝьми:

Дь бахче Адәнеда гәләк даред бәрдар һәбун. Йаһоԝа Хԝәде готә Адәм у кʹӧлфәта ԝи Һеԝайе, кӧ әԝана сәрбәст дькарьн жь ван һʹәму даред бәрдар бьхԝьн. Ле хенщи ве йәке дь бахчәда диса дарәк һәбу, кʹижан кӧ Хԝәде ԛәдәхә кьр бәред ԝе бьхԝьн. Хԝәде ԝанарʹа гот кӧ һәгәр әԝана бьхԝьн бәред ве даре, ԝе әʹсәйи бьмьрьн (Дәстпебун 2:9, 16, 17).

Щарәке чахе Һеԝа тʹәне бу, мәʹр ԝерʹа хәбәр да. Бь рʹастийе мәʹр хԝәха хәбәрнәдьда, әв Шәйтʹан Мире-щьна бу йе кӧ мәʹр дабу хәбате, сәва кӧ Һеԝайерʹа хәбәр дә. Шәйтʹан, Һеԝайерʹа гот кӧ һәгәр әԝ бәра ԛәдәхәкьри бьхԝә, ԝе мина Хԝәде билан бә. Әԝи ӧса жи соз дабу Һеԝайе, ԝәки әԝе нәмьрә. Әв һʹәму созед ԝи дәрәԝ бун. Ле Һеԝайе, йәкә Шәйтʹан баԝәр кьр у бәра ԛәдәхәкьри жи хԝар. Паше да Адәм, у әԝи жи хԝар (Дәстпебун 3:1-6).

Жь ве сәрһатийа рʹаст әм педьһʹәсьн, кӧ Шәйтʹан мьԛабьл у дәрәԝин ә. Әԝи готә Һеԝайе, кӧ һәгәр әԝ гӧрʹа Хԝәде нәкә, ԝе нәмьрә. Ле әв дәрәԝ бу! Чьмки Һеԝа мьр у Адәм жи мьр. Шәйтʹан Мире-щьна һьнге нә мьр, ле әԝ жи ԝе бьмьрә, чьмки әԝи гӧнә кьрийә. Ньһа әԝ дьжи у бәрдәԝан дькә инсанәте дьхальфинә. Шәйтʹан диса жи әԝ дәрәԝин ә, йе кӧ мәрийа мәщбур дькә кӧ мьԛабьли ԛанунед Хԝәде дәрен (Йуһʹәнна 8:44).

Мьԛабьлбуна Мьлйакʹәтед Дьн

Ахьрийе мьлйакʹәтед дьн жи хьраб бун. Әԝана ль сәр әʹрде ԛизед бәдәԝ дитьбун, у хԝәстьн тʹәви ԝана бькәвьнә һәләԛәтийа сексуал. Ләма жи әԝана пәйа бун ль сәр әʹрде, хԝә кьрьнә дьлԛе мера у әв ԛиз хԝәрʹа ча жьн сьтандьн. Ле кьред ӧса, мьԛабьли ԛьрара Хԝәде бун (Дәстпебун 6:1, 2; Щьһуда 6).

Әве йәке инсанәтерʹа гәләк кӧл-дәрд ани. Жьнед ван мьлйакʹәта зарʹ дьанин, у әв зарʹ нә мина зарʹед дьнена бун. Чьмки чахе әԝана мәзьн дьбун, тәрʹьки у зӧлм дьбун. Ахьрийе әʹрд педа бь зӧлмийе тʹьжә бу. Ләма жи Йаһоԝа Хԝәде сафи кьр ԝәки ль сәр әʹрде Селава мәзьн рʹакә, у һʹәму мәрьвед зӧлм жи ԛьрʹ кә. Тʹәне Нӧһе амьн у малбәта ԝи хьлаз бун (Дәстпебун 6:4, 11; 7:23).

Ле мьлйакʹәтед зӧлм һьнге нәмьрьн, әԝана пашда вәгәрʹийанә ль әʹзмен. Әԝана ль ԝьр һатьнә щәзакьрьне. Демәк ԝанарʹа изьн нәһатә дайине, ԝәки диса тʹәви малбәта Хԝәде бьн, у тʹәви мьлйакʹәтед амьн бьминьн. Хенщи ве йәке, Йаһоԝа ԝанарʹа ԛәдәхә кьр, кӧ бькʹәвьнә дьлԛе мәрийа. У ахьрийе әԝана ԝәʹде рʹожа диԝане ԝе бьмьрьн (Щьһуда 6).

Шәйтʹан жь Әʹзмен Һатә Авитьне

Дь сала 1914-да, ль сәр әʹзмана шәрʹ дәстпебу. Кʹьтеба Пироз гьли дькә кӧ ԝәʹде ви шәрʹи чь ԛәԝьми: «Һьнге ль әʹзмен шәрʹ дәстпебу. Мьхайил [Иса Мәсиһе сахкьри] у мьлйакʹәтед хԝәва [йед ԛәнщ] тʹәви зийе [Шәйтʹан] шәрʹ кьр, зийе жи мьлйакʹәтед хԝәва [йед хьраб] тʹәви ԝан шәрʹ кьр. Ле зийе да дәр, әʹзменда жи иди щи дәст ԝан нәкʹәт, әԝ зийайе мәзьн жорда һатә авитьне. Әва әԝ мәʹре бәре бу, кӧ жерʹа Мирещьн у Шәйтʹан дьбежьн, йе кӧ тʹәмамийа дьне хальфандийә. Әԝ мьлйакʹәтед хԝәва [йед хьраб] жорда һатьнә авитьне сәр рʹуйе әʹрде».

Ле гәло әв шәрʹе һан ча хьлаз бу? Кʹьтеба Пироз дәрһаԛа ве йәке ӧса дьбежә: «Аԝа ша бьн, әʹзманно у йед кӧ ԝанда дьминьн». Мьлйакʹәтед ԛәнщрʹа әве йәке шабун ани, чьмки Шәйтʹан у мьлйакʹәтед ԝийи хьраб йане рʹӧһʹед хьраб, ида ль сәр әʹзмен ниньн. Ле гәло әв йәк ча ль сәр инсанәте һʹӧкӧм бу? Дь Кʹьтеба Пирозда ӧса нивисар ә: «Ле ԝәй ль әʹрде у ль бәʹре, чьмки Мирещьн жорда сәр ԝәда һатә авитьне у әԝ жь һерсе хԝә дьхԝә, кӧ занә ԝе һьндьки бьминә» (Әʹйанти 12:7-9, 12).

Шәйтʹан Мире-щьна у мьлйакʹәтед ԝийи зӧлм, бь рʹастийе жи мәрийа дьхальфиньн у ль сәр әʹрде тʹьжә кӧл-дәрд дькьн. Әв мьлйакʹәтед зӧлм тенә навкьрьне щьн. Әԝана дьжмьнед Хԝәде нә, у һʹәмушк жи дәрәԝи ньн.

[Шькьл сәр рʹупʹела 8]

Чахе Шәйтʹан бь мәʹр тʹәви Һеԝайе хәбәр да, һьнге Һеԝа тʹәви Шәйтʹан бу йәк, у мьԛабьли Хԝәде дәркʹәт

[Шькьл сәр рʹупʹела 9]

Мьлйакʹәтед зӧлм пәйа бун ль сәр әʹрде, сәва кӧ тʹәви ԛизед бәдәԝ бькʹәвьнә һәләԛәтийа сексуал

[Шькьл сәр рʹупʹела 10]

Шәйтʹан Мире-щьна у мьлйакʹәтед ԝийи зӧлм жь әʹзмен һатьнә авитьне