Сәрһати 10

Селава Тʹәмамийа Дьнйайе

НӦҺ нәфәред мала хԝәва дь гәмийеда бу, ле мәрийед дор-бәре ԝи, мина бәре дьжитьн. Ԝана баԝәр нәдькьр кӧ селав рʹасти ԝе бе у һе зедә дәстпекьрьн бькʹәньн сәр Нӧһ. Ле шабуна ԝан зу хьлаз бу.

Ньшкева барана ԛайим бари. Ԛапʹахе әʹзмана вәбун у хӧшинийа баране дәстпебу. Гьлийе Нӧһ рʹаст бун! Ле ньһа сәва мәрийед дьн, ида гәләки дәрәнг ә бькʹәвьнә гәмийе. Чьмки дәре гәмийе, бь дәсте Йаһоԝа, ԛайим һатә дадане.

Гьрин у ԛужә-ԛужа мәрийа дьне һьлда. Лейикә мәзьн рʹабу, дара кʹокева рʹадькьр пәй хԝә дьбьр у гьрмә-гьрма кәвьра дьһат. Мәрийед зьравԛәти дьрʹәвийан бәрбь щийе бьльнд. Гәләк жь ԝан пʹошман дьбун у дьфькьрин: «Хԝазьл мә гӧрʹа Нӧһ бькьра у чахе дәре гәмийе һе вәкьри бу бькʹәтана һӧндор!» Ле ида гәләки дәрәнг бу.

40 рʹож у 40 шәв хӧшинийа баране нәдьсәкьни. Ава селаве зедә дьбу у һьлдькʹьшийа һʹәта чʹийа. Пашԝәхтийе һәла һе чʹийайед бьльнд жи бьн аве ман. Хԝәде ча гот ӧса жи ԛәԝьми, һʹәму мәрьв у һʹәйԝан йе кӧ нә дь гәмийеда бун мьрьн, ле йе дь гәмийеда хьлаз бун.

Нӧһ у кӧрʹед ԝи гәми гәлә рʹьнд ава кьрьн, ләма жи гәми нәчу бьн аве, ле сәр аверʹа бу. Бьдә һʹәсаве, чахе баран сәкьни у тәʹв жь әʹԝра дәркʹәт, дьнйа чь щурʹәйи бу? Гәми ль сәр аверʹа бу у дор-бәре ԝи хенщи аве тʹӧ тьшт тʹӧнә бу.

Мәрийед тәрʹьки мьрьн у ида тʹӧ кәс зийане ԝе надә инсанәте. Әԝана тʹәви дийайед хԝә, мина мәрийед дьне хьрав ԛьрʹ бун. Ле һʹале бавед ԝан ча бу?

Те бира тә баве мәрийед тәрʹьки кʹе бун? Рʹаст ә, әԝана мьлйакʹәт бун у мәрийед мина мә нибун, әԝана пәйа бунә әʹрде, кӧ мина мәрийа бьжин. Ләма жи чахе селав һат әԝана нәмьрьн. Ԝана бәдәне хԝә йе мәрьва һишт, пашда бунә мьлйакʹәт у вәгәрʹийан әʹзмана. Ле ль сәр әʹзмана сәва ԝан щи ида тʹӧнә бу, чьмки Хԝәде изьн нәда ԝан бьжин дь нав нәфәред ԝида. Ләма жи әԝ бунә мьлйакʹәтед Шәйтʹан. Кʹьтеба Пироз дьвежә кӧ наве ԝан мьлйакʹәта щьн ә. Шәйтʹан жи бу мире ԝан, демәк мире щьна.

Хԝәде баки мәзьн рʹакьр у ава селаве һеди-һеди дадькʹәт. Пенщ мәһа шунда, гәми ль сәре чʹийайе бьльнд сәкьни. Гәләк рʹож дәрбаз бун, Нӧһ у нәфәред ԝи ль сәр әʹрд ньһерʹин у сәре чʹийа дитьн. Ав һеди-һеди дадькʹәт.

Паше Нӧһ чʹьвика рʹәш, йе ԝерʹа дьвежьн ԛьрʹьк, жь гәмийе бәрʹда. Әԝ һьнә ԝәʹдә фьрʹи у пашда вәгәрʹийа, чьмки ԛә щик жи хԝәрʹа нәдьдит кӧ бьсәкьнә у һеса бә. Чәнд дәрба ԛьрʹьк фьрʹи у һәр щар вәдьгәрʹийа кӧ ль сәр гәмийе һеса бә.

Нӧһ дьхԝәст пебьһʹәсийа, гәло ав жь рʹуйе әʹрде вәкʹьшийа йане на, ләма жи ижар әԝи кәвотк шанд. Ле кәвотк жи вәгәрʹийа, чьмки әԝи жи щийе кӧ бьсәкьнә нәдит. Нӧһ щара дӧда ԝи шанд, у әԝ диса жи вәгәрʹийа, ле ижар дьндке хԝәда бәлге зәйтʹуне ани. Ӧса Нӧһ пеһʹәсийа кӧ ав жь әʹрде вәкʹьшийа. Чахе Нӧһ щара сьсийа кәвотк шанд, әԝ ида вәнәгәрʹийа пашда, чьмки хԝәрʹа щики баш дит у сьтьри.

Хԝәде готә Нӧһ: «Нәфәред мала хԝә у һʹәйԝана һьлдә у жь гәмийе дәркʹәвә». Әԝана дь гәмийеда саләк зедәтьр ман. Дә бьдә һʹәсаве хԝә шабуна ԝанә мәзьн, кӧ әԝана хьлаз бун у дькарьн жийина тʹәзә дәстпекьн!

Дәстпебун 7:10-24; 8:1-17; 1 Пәтрус 3:19, 20.