Сәрһати 9

Нӧһ Гәмийе Ава Дькә

ЩӘМ Нӧһ у жьна ԝи се кӧрʹ һәбун. Наве кӧрʹед ԝан Cәм, Һам у Йафәт бу. Жьна һәр кәса жь ԝан һәбу. Демәк, әԝана тʹәмамийе нәфәред малева һʹәйшт мәри бун.

Щарәки Хԝәде шьхӧләки нәнас да Нӧһрʹа. Нӧһ гәрәке гәмийа мәзьн ава кьра. Гәми мина ԛӧтʹийа гәлә мәзьн у дьреж бу. Хԝәде ӧса жи гот Нӧһрʹа: «Гәми гәрәке сеԛәти бә у отʹах жи гәрәке теда һәбьн». Отʹах лазьм бун сәва Нӧһ у нәфәред мала ԝи, ӧса жи сәва һʹәйԝана у хԝарьне, йе кӧ ԝан һʹәмушкарʹа лазьм бу.

Хԝәде Нӧһрʹа гот, кӧ гәми гәрәке ԝи щурʹәйи бе чекьрьне, кӧ ав теда нәкʹәве. Хԝәде гот: «Әзе селавәкә мәзьн биньм ль сәр әʹрде, ԝәки тʹәмамийа дьнйайе бе ԛьрʹкьрьне. Һәр кәс йе дь гәмийеда нибьн, ԝе бьмьрьн».

Нӧһ у кӧрʹед ԝи гӧрʹа Хԝәде кьрьн у авакьрьна гәмийе дәстпекьрьн. Ле мәрийед дор-бәре ԝан хԝә ль хьравийе дьгьртьн у ль сәр ԝан дькʹәнийан. Чахе Нӧһ гьли дькьр, дәрһәԛа ԛьрара Хԝәде, тʹӧ кәс жь ԝи баԝәр нәдькьр.

Сәва авакьрьна гәмийе гәләк сал лазьм һат, чьмки гәми гәләки мәзьн бу. Дь ахьрийа-ахьрийеда, паши гәләк сала, авакьрьна гәмийе хьлаз бу. Хԝәде Нӧһрʹа гот, кӧ әԝ гәрәке һʹәму щурʹә һʹәйԝана теда щи кә. Һьнә жь һʹәйԝана щотәк, ча нер ӧса жи ме, ле жь йе дьне һʹәфт щоти гәрәке һьлда. Хԝәде ӧса жи готә Нӧһ, кӧ әԝ гәрәке һʹәму щурʹә чʹьвика дь гәмийеда щи кьра. Хԝәде ча жи хԝәст, Нӧһ һәма ӧса жи кьр.

Паше ида Нӧһ у малбате ԝи дь гәмийеда щиԝар бун. Хԝәде пәй ԝанрʹа дәри дада. Нӧһ у малбате ԝи дь гәмийеда һивийа селаве бун. Һәла бьдә һʹәсаве хԝә, ԝәки тӧ жи дь гәмийеда ни у тʹәви ԝан һивийе йи. Гәло селав ԝе рʹасти дәстпебә?

Дәстпебун 6:9-22; 7:1-9.