Сәрһати 18

Аԛуб Дьчә Һаране

РʹОЖӘКЕ, чахе Аԛуб рʹева бәр бире сәкьни, әԝ рʹасти ԝан мәрийа һат, йе кӧ тӧ ль сәр шькьли дьвини. Әԝана мьԛати пәзе Аԛуб бун. Ле гәло әԝана кʹи нә? Аԛуб ԝана пьрси: «Һун жь кʹидәре һатьнә?»

«Жь Һаране», ԝана гот.

«Дьбәк һун Лабан нас дькьн?» Аԛуб пьрси.

«Бәле, әм ԝи нас дькьн, ԝа бьньһерʹьн, ԛиза ԝи жи Рʹаһел пәй кәрийе пәзед баве хԝә те». Һәла тӧ жи бьньһерʹә ча Рʹаһел жь дурва те, әв йәк ль сәр шькьли рʹьнд те кʹьвше.

Чахе Аԛуб Рʹаһел дит пе кәрийе пәзед хале хԝәйи Лабан, әԝ незики бире бу, кәвьре бире ԝеда кьр кӧ пәзед Лабан аве вәхԝьн. Паше әԝи сьлав да Рʹаһел, әԝ пач кьр у насийа хԝә да ԝе. Чахе Рʹаһел пеһʹәсийа кӧ әԝ мәрийед һәв ьн, әԝ шабуна шәпьрзә бу у рʹәви һʹәта мале, кӧ һʹәму тьшти баве хԝәрʹа гьли кә.

Лабан ша бу кӧ Аԛуб һатә бал ԝи мевани. Чахе Аԛуб гот кӧ дьхԝазә тʹәв Рʹаһеле бьзәԝьщә, Лабан ша бу у ԛәбул кьр. Ле әԝи йәкә әмьр кьр кӧ Аԛуб һʹәфт сала сәва Рʹаһеле бьхәвьтә. Чьмки Аԛуб Рʹаһел гәләки һʹәз кьр, ләма жи ԛайил бу һʹәфт сала сәва ԝе бьхәвьтә. Ле зани чь ԛәԝьми, чахе һʹәфт сал дәрбаз бун?

Лабан дәԝса Рʹаһеле ԛиза хԝәйә мәзьн Леа да Аԛуб. Паше Аԛуб диса һʹәфт сала хәвьти у тʹәне һинге Лабан ида ԛиза хԝә Рʹаһел да ԝи. Ԝан ԝәʹда Хԝәде дьһишт кӧ щәм мер чәнд жьн һәбуйа. Ле ньһа, жь Кʹьтеба Пироз әм һин дьбьн у фәʹм дькьн, кӧ бал мер гәрәке тʹәне жьнәк һәбә.

Дәстпебун 29:1-30.