Сәрһати 19

Аԛуб Дьбә Хԝәйе Малбатәкә Мәзьн

ТӦ ТʹӘНЕ бьньһерʹә, малбата Аԛуб чьԛас мәзьн ә. Донздәһ кӧрʹед ԝи һәнә, у ԛизед ԝи жи һәбун. Ле гәло навед ԝан чь йә? Ԝәрә әм пебьһʹәсьн.

Жь Леа Рʹубен, Шьмһʹун, Леԝи у Щьһуда һатьн буйине. Чахе Рʹаһел дьдит, кӧ мина Леа нькарә зарʹа бинә әԝ гәлә бәр хԝә дькʹәт. Ләма жи әԝе бәрдәстийе хԝә Билһа да мере хԝә Аԛуб. Билһа дӧ кӧрʹ ани, Дан у Нәфтәли. Паше Леа жи бәрдәстийе хԝә да Аԛуб у әԝе жи дӧ кӧрʹ ани, Гад у Ашер. Пашԝәхтийе Леа диса дӧ кӧрʹ ани, Исахар у Зәбулон.

Ахьрийа ахьрийеда Рʹаһелрʹа жи зарʹ бу. Әԝе наве ԝи дани Усьв. Паше әме дәрһәԛа Усьв һе зедә пебьһʹәсьн, чьмки әԝ ԝе бьбә мәрики гьринг у навдар. Йанздәһ кӧрʹед Аԛуб һатьнә буйине һе чахе әԝ тʹәви баве Рʹаһел Лабан дьжит.

Бал Аԛуб ԛиз жи һәбун. Ле Кʹьтеба Пироз тʹәне наве ԛизәке дьдә, наве ԝе Динаһ йә.

Ԝәʹдә һат у Аԛуб сафи кьр, кӧ жь Лабане щьһе бә у вәгәрʹә Кәнане. Әԝи нәфәред мала хԝәйә мәзьн, кәрийед пез у гаранед деԝер тʹoп кьр у кʹәтә рʹекә дьреж.

Паши ԝе йәке ча әԝана гьһиштьнә Кәнане, Рʹаһел диса кӧрʹәк ани. Әв йәк рʹева ԛәԝьми. Буйина зарʹоке гәлә чәтьн дәрбаз дьбу у Рʹаһел гәлә дьчәрчьри, әԝе зарʹ ани у мьр. Ле зарʹок сагʹ ма. Аԛуб наве ԝи дани Бьнйамин.

Кʹа әм навед 12 кӧрʹед Аԛуб бир нәкьн, чьмки тʹәмамийа мьләте Исраел жь ԝан 12 кӧрʹа һатә дьне. Донздәһ бәрәкед Исраел навед хԝә жь 10 кӧрʹед Аԛуб у жь дӧ кӧрʹед Усьв һьлдан. Калке ԝан 12 бьра, демәк Исһаԛ, паши буйина ԝан һе гәлә сал әʹмьр кьр. Дә бьдә һʹәсаве хԝә чьԛас нәбийе Исһаԛ һәбун у әԝ ԝанрʹа чьԛас ша дьбу. Ԝәрә әм пебьһʹәсьн сәре нәбикә Исһаԛ, наве кʹижане Динаһ бу, чь ԛәԝьми.

Дәстпебун 29:32-35; 30:1-26; 35:16-19; 37:35.