Сәрһати 23
Хәԝнед Фьрәԝьн
МӘЙИГАР дәрһәԛа Усьв лап бир кьрьбу. Ида дӧ сал дәрбаз бун, ле Усьв һе дь кәледа нә. Ле зани чь ԛәԝьми паше? Һәла бьньһерʹә сәр шькьл. Фьрәԝьн рʹазайә у хәԝнед хԝәда тьштед ӧса дьвинә, нет у һʹәсаве кʹижани әԝ ньзанә, ле гәлә дьхԝазә пебьһʹәсә. Сьбәһ зу әԝи гази һʹәму зандаред хԝә кьр у хәԝнед хԝә ԝанарʹа гьли кьр. Ле тʹӧ кәс нькарьбу шьровәкьра нете ван хәԝна.
Ижар, ахьрийа-ахьрийеда Усьв кʹәтә бира мәйгәр. Әԝи готә Фьрәԝьн: «Чахе әз дь кәледа бум ԝе дәре мьн мерәк нас кьр, йе кӧ хәԝна шьровәдькьр». Фьрәԝьн фәрман да кӧ Усьв жь кәле дәрхьн у биньнә вьра.
Фьрәԝьн хәԝнед хԝә Усьврʹа гьли дькә: «Мьн һʹәфт чʹеләкед хорт у бәдәԝ дит. Ӧса жи һʹәфт чʹеләкед гәлә жар у зьрав. Әԝед жар, ԝан чʹеләкед хорт дьхԝарьн.
«Ль хәԝна дӧда мьн ль сәр чʹьԛьле гәньме, һʹәфт сьмбьлед тʹьжә дит. Паше мьн диса жи һʹәфт сьмбьлед гәньме дит, йе кӧ гәлә зьрав у зьһа бун. Мьн дина хԝә дайе, кӧ әԝед зьрав у зьһа дәстпекьрьн сьмбьлед тʹьжә у баш бьхԝьн».
Усьв готә Фьрәԝьн: «Нета ван һәр дӧ хәԝна йәкә. Һʹәфт чʹеләкед хорт у һʹәфт сьмбьлед тʹьжә, тен һʹәсаве һʹәфт сал. Ле һʹәфт чʹеләкед жар у һʹәфт сьмбьлед зьһа, һʹәфт салед дьн тенә һʹәсаве. Демәк, һʹәфт салед пешийе дь Мьсьреда ԝе бәрәкʹәта хԝарьне бә. Ле һʹәфт салед пашьн ԝе хәлайе у кемасийа хԝарьне бинә».
Ләма жи Усьв готә Фьрәԝьн: «Мерәки сәрԝахт хԝәрʹа бьжберә, кӧ бькарьбә нава һʹәфт салед баш хԝарьне тʹоп кә, ԝәки дь нава һʹәфт салед хьравда мәри бьрʹчийа нәмьрьн».
Әв нет дьле Фьрәԝьн хԝәш һат. Әԝи Усьв кʹьвш кьр ча сәрԝер, кӧ хԝарьне тʹоп кә у хԝәй кә. Сәркʹаре тʹәмамийа Мьсьре, пеше Фьрәԝьн бу паше жи Усьв. Әԝ бу мәрики мәзьн.
Һʹәйшт сал дәрбаз бун у бьрчибун ида дәстпебу. Дәрбәки Усьв дьвинә кӧ чәнд мер тенә бәрбь ԝи. Тӧ зани әԝ кʹи нә? Бәле, әԝ 10 бьред ԝи нә! Баве ԝан Аԛуб ԝана шандә Мьсьре, кӧ әԝана хԝарьн дәст хьн, чьмки хԝарьна ԝан хьлаз бьбу. Усьв бьред хԝә нас кьр, ле ԝана Усьв нас нәкьр. Зани чьрʹа? Чьмки Усьв ида мәзьн бу у кʹьнще ԝи жи щурʹәки майин бу.
Ԝи чахи хәԝнәк һатә бира Усьв, йе кӧ әԝи дь бьчʹуктайеда дитьбу. Те бира тә, кӧ Усьв дитьбу ԝәки бьред ԝи ԝе сәре хԝә ль бәр ԝи бәржер кьн. Ньһа ида Усьв фәʹм кьр чьрʹа әԝ һатә Мьсьре, кӧ әв йәк бь ԛьрара Хԝәде ԛәԝьми, ԝәки нета ԝийә баш бе сәри. Гәло ньһа Усьв ԝе чь бькә? Кʹа әм пебьһʹәсьн.
Дәстпебун 41:1-57; 42:1-8; 50:20.