Сәрһати 22

Усьв Давежьн Кәле

ЧАХЕ Усьв бьрьн Мьсьре әԝ һе 17 сали бу. Ԝе дәре әԝ һатә фьротане сәр мерәки наве ԝи Потифар. Потифар бал пʹадше Мьсьре дьхәвьти. Дь Мьсьреда ль сәр пʹадша Фьрәԝьн дьготьн.

Усьв хԝәйе хԝә Потифаррʹа дьл у щан дьхәвьти. Ләма жи чахе Усьв ида мәзьн бу Потифар ԝи ль сәр тʹәмамийа мал-һәбуна хԝә кʹьвш кьр. Ле чьрʹа Усьв кʹәтә кәле? Әв йәк бь мәʹнийа жьна Потифар ԛәԝьми.

Чахе Усьв мәзьн бу әԝ бу хӧртәки гәлә бәдәԝ, у жьна Потифар дьхԝәст кӧ Усьв тʹәви ԝе рʹазе. Ле Усьв заньбу кӧ әв йәк рʹаст нинә у ләма жи ԝерʹа ԛайил нәдьбу. Жьна Потифар жь ве йәке гәлә һерс дькʹәт. Чахе Потифар вәгәрʹийа мале, әԝе мере хԝә хапанд у готе: «Усьве бе намус дьхԝәст зоре мьн тʹәви хԝә вәләзанда!» Потифар жьна хԝә баԝәр кьр у ль сәр Усьв гәлә һерс кʹәт. Ләма жи әԝи Усьв авитә кәле.

Ԝәʹдә дәрбаз бу у сәрԝере кәле тʹәгʹмин кьр кӧ Усьв мәрики гәлә баш ә. Ләма жи әԝи Усьв ча мьԛатчийе һʹәму гьртийа кʹьвш кьр. Дәрбәке Фьрәԝьн ль сәр мәйгәрәки у нанпежәки хԝә, гәлә һерс кʹәт у ԝана авитә кәле. Дь кәледа ԝана хәԝна фәрз дит, нет у һʹәсаве кʹижани ԝана ньзаньбу. Ԝи чахи Усьв готә ԝан: «Мьнрʹа гьли кьн, һәла ԝә чь хәԝн дит». Чахе ԝана гьли кьр, Усьв бь аликʹарийа Хԝәде хәԝна ԝан шьровәкьр.

Мәйгәррʹа Усьв гот: «Се рʹож шунда тӧйе жь кәле дәркʹәви у пашда бьби мәйгәре Фьрәԝьн». Усьв сәрда зедә кьр: «Чахе тӧ дәркʹәви, Фьрәԝьнрʹа әʹсәйи дәрһәԛа мьн бежә у али мьн бькә кӧ әз жи жь вьр дәркʹәвьм». Ле нанпежрʹа Усьв гот: «Се рʹож ԝе дәрбаз бә у Фьрәԝьн ԝе сәре тә һьлԛәтинә».

Се рʹож дәрбаз бу, Усьв чаԝа гот ӧса жи ԛәԝьми. Фьрәԝьн сәре нанпеж һьлԛәтанд. Ле мәйгәр жь кәле дәркʹәт у Фьрәԝьнрʹа диса жи мәйгәрийе дькьр. Ле әԝи дәрһәԛа Усьв лап бир кьр! Әԝи ԛә тьштәк жи нәготә Фьрәԝьн дәрһәԛа Усьв, у Усьв ӧса жи дь кәледа ма.

Дәстпебун 39:1-23; 40:1-23.