Сәрһати 21

Усьв Ль Бәр Чʹәʹве Бьред Хԝә Рәʹш Дьбә

ДИНА хԝә бьдә шькьл, әв гәдә чьԛа һесир у бе гӧман ә. Әв Усьв ә. Һәма һежа бьред Усьв ԝи фьротьнә ԝан мәрийа, йе кӧ дьчун Мьсьре. Ӧса Усьв бу дил. Ле гәло бьред ԝи чьрʹа тьштәки ӧса кьрьн? Чьмки әԝана һʹәвсуд бун у ԝи һʹәз нәдькьрьн.

Баве ԝан Аԛуб кӧрʹе хԝә Усьв беһʹәсав һʹәз дькьр. Әԝи һʹәзкьрьна хԝә бь ԝи йәки әʹйан кьр, кӧ кʹьнщәки дьреж у бәдәԝ да дьрутьне сәва Усьв. Гава бьрайед ԝи мәзьн дитьн кӧ Аԛуб жь ԝан һе зедәтьр Усьв һʹәз дькә, ԝана дәстпекьрьн һе гәлә һʹәвсудийе ԝи бькьн у Усьв ль бәр чʹәʹве ԝан рʹәш бу. Ле диса мәʹник һәбу бона чь әԝана ль сәр ԝи һерс дьбун.

Усьв дӧ хәԝна дьвинә. Дь һәр дӧ хәԝнада жи, бьред ԝи мәзьн сәре хԝә ль бәр ԝи датанин. Чахе Усьв хәԝнед хԝә ԝанарʹа гьли кьр, әԝана һе гәлә ль сәр ԝи һерс кʹәтьн.

Рʹожәке, чахе бьред ԝийә мәзьн пәзед баве хԝә бьрьбун чоле, Аԛуб Усьв шандә щәм ԝан кӧ әԝ сәрики ԝан хә у пебьһʹәсә һәла һʹале бьред ԝи ча нә. Гава ԝана бьре хԝә Усьв жь дурва дитьн, һьнә жь ԝана гот: «Кʹа әм ԝи бькӧжьн!» Ле бьре ԝани һәри мәзьн Рʹубен гот: «Һәла бьсәкьньн, ве йәке нәкьн!» Дәԝса ве йәке ԝана ԝи гьрт у авитьнә бира зьһа. Паше әԝана рʹуньштьн у шеԝьра һәв дькьрьн, һәла чь дькарьн сәре ԝи бькьн.

Ве дәме ԝана дит кӧ һьнә мәрийед Исмаили рʹева дәрбаз дьбьн. Щьһуда бьред хԝәрʹа гот: «Кʹа әм Усьв ԝанрʹа бьфьрошьн». Ԝана ӧса жи кьр. Ԝана Усьв байе 20 зива фьрот. Кьред ԝан гәлә бехӧдети у беисаф бу!

Ле баве хԝәрʹа ԝана ԝе чь бьгота? Ԝана бьзьнәк сәржекьр у чәнд дәрба кʹьнще ԝийә бәдәԝ хуне хьстьн. Паше кʹьнще ԝи бьрьнә мал, нишани баве хԝә кьрьн у готьн: «Бьньһерʹә, мә әв кʹьнщ рʹева дит. Әв кʹьнще Усьв нинә?»

Аԛуб дит кӧ рʹасти жи кʹьнще Усьв ә у гьринва гот: «Тәрәԝьл кӧрʹе мьн Усьв кӧшт». Бьред Усьв нете хԝә анин сәри, ԝана чаԝа хԝәст Аԛуб ӧса жи фькьри. Еша гьран кʹәтә дьле Аԛуб. Әԝи гәлә рʹожа шина кӧрʹе хԝә дькьр. Ле бь рʹастийе Усьв нәмьрийә. Кʹа әм пебьһʹәсьн чь сәре ԝи ԛәԝьми.

Дәстпебун 37:1-35.