Сәрһати 28

Муса Дь Бьчʹуктайеда Те Хьлазкьрьне

БЬНЬҺЕРʹӘ ча зарʹа бьчʹук тʹьлийа кʹӧлфәте гьртийә у дьгьри. Әв зарʹ Муса йә. Ле гәло әв кʹӧлфәта бәдәԝ кʹи йә? Әԝ ԛиза Фьрәԝьне һʹәлалә, демәк жьнмире Мьсьре йә.

Дийа Муса се мәһа кӧрʹе хԝә щәм хԝә вәдьшарт, чьмки әԝе нәдьхԝәст кӧ Мьсьрийа ԝи бькӧжьн. Ле әԝе фәʹм дькьр кӧ рʹожәке зарʹа ԝе йәкә ԝе бе дитьне. Ләма жи, сәва хьлазкьрьна ԝи, әԝе тьште ӧса кьр.

Әԝе сәвәт һьлда у ӧса чекьр кӧ ав теда нәкʹәве. Паше кӧрʹе хԝә Муса кьрә сәвәте у бәрбь чʹәме Нил нав ԛамуше вәшарт. Хушка Муса Мәрйәм жи гәрәке незики сәвәте бьсәкьнийа у бьдита һәла ԝе чь бьԛәԝьмә.

Һьнә ԝәʹдә шунда ԛиза Фьрәԝьн һатә бәр чʹәме Нил кӧ сәре хԝә бьшо. Ньшкева әԝе нав ԛамуше сәвәт дит. Әԝе готә хӧламрʹа: «Һәрʹьн у әве сәвәте мьнрʹа биньн». Чахе ԛиза Фьрәԝьн сәвәт вәкьр, әԝе теда зарʹәкә гәлә бәдәԝ дит! Мусайе бьчʹук дьгьрийа, у жьнмир гӧне хԝә пе ани. Әԝе нәдьхԝәст кӧ әв зарʹ бе кӧштьне.

Паше Мәрйәма хушка Муса незики ԝан бу. Тӧ ле дькари ль сәр шькьле бьвини. Мәрйәм жь ԛиза Фьрәԝьн пьрс кьр: «Дьхԝази әз гази жьнәкә Исраели бькьм кӧ шир бьдә ԝе зарʹоке?»

Әԝе гот: «Бәле, кʹәрәм кә».

Мәрйәм рʹәва-рʹәв чу кӧ һʹәму тьшти дийа хԝәрʹа бежә. Чахе дийа Муса һатә бал ԛиза Фьрәԝьн, жьнмир готе: «Әԝе зарʹоке һьлдә у сәва мьн мьԛати ԝи бә у шир бьдә ԝи, әзе һәԛе тә бьдьм».

Ӧса дийа Муса мьԛати зарʹа хԝәйә һʹәлал дьбу. Пашԝәхтийе, чахе Муса ида епʹещә мәзьн бу, әԝе кӧрʹе хԝә да ԛиза Фьрәԝьн. Жьнмир Муса кьрә ча кӧрʹе хԝәйи һʹәлал, у ӧса Муса дь нав малбата Фьрәԝьнда мәзьн бу.

Дәркʹәтьн 2:1-10.