Сәрһати 29

Чьрʹа Муса Жь Мьсьре Дьрʹәвә

БЬНЬҺЕРʹӘ ча Муса жь Мьсьре дьрʹәвә. Ле тӧ ван мәрийа йе кӧ пәй ԝи кʹәтьнә дьвини? Гәло чьрʹа әԝана дьхԝазьн ԝи бькӧжьн? Ԝәрә әм щава ван пьрса пебьһʹәсьн.

Муса дь мала пʹадше Мьсьреда мәзьн бу. Әԝ бу мәрики гәлә билан у гьринг. Муса заньбу кӧ бь рʹастийе де-баве ԝи һʹәлал диле исраели нә, у әԝ жи исраели йә, нә кӧ жь мьсьрийа.

Рʹожәке, чахе Муса ида 40 сали бу, әԝ дьхԝәст пебьһʹәсийа һәла щьмәʹта ԝи чь рʹожеда нә у әԝ гәлә бәрхԝәкʹәт, чьмки мьсьрийа зорбәти исраелийа дькьрьн. Чахе әԝи дит кӧ йәк жь мьсьрийа диле исраели дькʹӧтә, әԝ дор-бәре хԝә ньһерʹи, дит кӧ кәс ԝи навинә у һьлда ӧса мере мьсьри хьст кӧ әԝ мьр. Паше Муса һьлда у ԝи дь ԛумеда вәшарт.

Рʹожәкә дьн Муса диса чу щәм щьмәʹта хԝә. Әԝ дьшьрмиш дьбу кӧ ԝе бькарьбә али ԝан бькә, ԝәки әԝана жь дилтйа хԝә хьлаз бьн. Ле чахе Муса дит кӧ дӧ меред исраели һәв дьхьн, әԝи готә йе нәһәԛрʹа: «Тӧ чьрʹа бьре хԝә дькʹӧти?»

Әԝи жи щава хԝә да: «Кʹи тә ль сәр мә ча сәрԝер у һʹакьм кʹьвш кьрийә, йан тӧ дьхԝази мьн жи мина ԝи мьсьри бькӧжи?»

Чахе Муса әԝан гьлийа бьһист тьрс кʹәтә дьле ԝи. Әԝи фәʹм кьр кӧ щьмәʹт, дәрһәԛа кьред ԝи ида пеһʹәсийа. Чахе Фьрәԝьн жи пеһʹәсийа, әԝи мер шанд кӧ Муса бькӧжьн. Ләма жи Муса жь Мьсьре рʹәви.

Муса жь Мьсьре гәлә дур чу, у ԝәлате Мәдийа щиԝар бу. Ԝе дәре әԝ рʹасти малбата Йәтʹро һат у тʹәви ԛизәкә ԝи, Тсиппʹора, зәԝьщи. Муса бу шьван у мьԛати пәзед Йәтʹро дьбу. Муса 40 сали шәһәре Мәдийайе жит у ида бу 80 сали. Рʹожәке, чахе әԝ бәр пез бу, тьштәки нәбуйи у кʹәрәмәт сәре ԝи ԛәԝьми, бь рʹазийа чь жи әʹмьре ԝи тʹәмам һатә гӧһастьне. Дьхԝази пебьһʹәси әв тьште нәбуйи чь бу? Ԝәки ӧса нә, вәкә бәлге майин у бьхунә.

Дәркʹәтьн 2:11-25; К’аред Шандийа 7:22-29.