Сәрһати 30

Тʹумәк Бь Агьрва Дьшьхӧли

МУСА һьлкʹьшийа ль сәр чʹийайе Һорәб, кӧ пәзед ԝи бьчʹерьн. Ль ԝьр әԝи тʹуме агьрпекʹәти дит, йе кӧ нәдьшәԝьти!

«Әв чь әʹщев ә» Муса дьшьрмиш бу. «На, әз гәрәке һәрʹьмә незики ԝи, кӧ һе рʹьнд бьвиньм». Чахе Муса незики тʹуме бу, дәнгәк жь тʹуме һат, йе кӧ дьгот: «Незики вьр нәбә. Чарьхед хԝә бехә, чьмки тӧ ль сәр әʹрде Пироз сәкьни йи». Бь рʹастийе Хԝәде ԝирʹа хәбәр дьда бь мьлйакʹәтәки хԝә, ләма жи Муса сәр чʹәʹве хԝә дада.

Паше Хԝәде гот: «Мьн дит кӧ щьмәʹта мьн дь Мьсьреда зәлулийеда нә. Ләма жи әзе ԝана хьлаз кьм, у әз һәма тә дьшиньм кӧ щьмәʹта мьн жь Мьсьре дәрхи». Йаһоԝа ԝе ԝана бинә ԝәлате Кәнан, йе кӧ әʹрдәки гәлә баш у бәдәԝ бу.

Ле Муса гот: «Әз кʹи мә кӧ бькарьбьм әве йәке бькьм? Ле һәрге әз һәрʹьм жи, исраели ԝе мьнрʹа бежьн: ‹Кʹи тӧ шанди вьра?› Ԝи чахи әзе чь бежьм?»

Хԝәде ԝирʹа гот: «Тӧйе ԝанарʹа ӧса бежи: ‹ЙАҺОԜА Хԝәдайе Бьраһим, Хԝәдайе Исһаԛ у Хԝәдайе Аԛуб, әз шандьм щәм ԝә›». Йаһоԝа сәрда зедә кьр: «Әв ә наве мьн һʹәта-һʹәтайе».

Ԝи чахи Муса щава хԝәда гот: «Ле һәрге әз бежьм кӧ тә әз шандьмә у әԝана ԝе мьн баԝәр нәкьн?»

Хԝәде ԝи пьрс кьр: «Әв чь йә ль дәсте тәда?»

Муса гот: «Әв шьвдар ә».

«Ԝи бавежә әʹрде» Хԝәде готә ԝи. Чахе Муса шьвдар авитә әʹрде, шьвдар бу мәʹр. Паше Йаһоԝа диса кʹәрәмәтәк нишани ԝи кьр. Хԝәде гот: «Дәсте хԝә текә нав синге хԝә». Муса ӧса жи кьр у чахе дәсте хԝә жь синге дәрхьст, дәсте ԝи мина бәрфе ԛәрԛаш бу! Те бежи нәхԝәшийа кʹотибуне ԝи кʹәт. Паше Хԝәде ида ԛәԝат да Муса, кӧ әԝ хԝәха кʹәрәмәта сьсийа бькә. Хьлазийе Хԝәде гот: «Чахе тӧ ван кʹәрәмәта ль бәр исраелийа бьки, әԝана ԝе баԝәр кьн кӧ рʹасти жи мьн тӧ шанди».

Паши ве йәке Муса вәгәрʹийа мал у готә Йәтʹро: «Һиви тә дькьм, бьһелә әз һәрʹьм Мьсьре кӧ пебьһʹәсьм һʹале мәрийед мьн ча нә». Йәтʹро ԝирʹа гот кӧ бь хер у сьламәт һәрʹә, у Муса кʹаре хԝә кьр у кʹәтә рʹийа Мьсьре.

Дәрк’әтьн 3:1-22; 4:1-20.