Сәрһати 51

Рʹутʹ У Наһоми

ДЬ КʹЬТЕБА Пирозда кʹьтебәк бь наве Рʹутʹ һәйә. Әв кʹьтеб дәрһәԛа малбатәки гьли дькә, йе кӧ ԝәʹде һʹакьма дьжитьн. Рʹутʹ кәчʹька щаһьл ә у әԝ нә жь щьмәʹта Хԝәде исраели йә, әԝ дь Моԝабеда дьжи. Ле гава Рʹутʹ дәрһәԛа Хԝәдайе рʹаст педьһʹәсә, әԝ дәстпедькә Йаһоԝа гәлә һʹәз бькә. Ле гәло, кʹи али Рʹутʹ дькьр кӧ әԝ дәрһәԛа Йаһоԝа пебьһʹәсийа? Наве ԝе кʹӧлфәте Наһоми бу.

Наһоми жь исраелийа бу. Әԝ тʹәви мере хԝә у дӧ кӧрʹед хԝә дәрбази әʹрде Моԝабе бу, чьмки ԝи чахи дь исраеледа хәлайи дәстпебу. Пашԝәхтийе мере Наһоми мьр. Паше дӧ кӧрʹед ԝе жь моԝабийа жьн анин, навед ԝан жьна Рʹутʹ у Орпа бу. Ле ԝәкә 10 сала шунда, дӧ кӧрʹед Наһоми жи мьрьн. Бьдә һʹәсаве хԝә ешәкә чьԛа гьран кʹәтә дьле Наһоми у дӧ букед ԝе! Гәло ньһа Наһоми ԝе чь бькә?

Рʹожәке Наһоми ԛьрар дькә, кӧ рʹекʹәвә у вәгәрʹә ԝәлате хԝә. Рʹутʹ у Орпа жи пәй Наһоми чун, чьмки ԝана дьхԝәст тʹәви ԝе бьмана. Чахе әԝана һьнә рʹе дәрбаз бун, Наһоми сәкьни у готә ԝан: «Вәгәрʹьн мала баве хԝә у дь ԝе дәре сьтʹар бьн».

Пәй ве готьнерʹа Наһоми чу рʹуйе ԝан. Һинге гьрин кʹәтә ԝан, чьмки ԝана Наһоми гәлә һʹәз дькьр. Ԝана гот: «На! әме тʹәви тә бен бал щьмәʹта тә». Ле Наһоми щава хԝә да: «Ԛизед мьн, һун гәрәке вәгәрʹьн. Дь мала ԝәда ԝәрʹа ԝе һе баш бә». Орпа вәгәрʹийа мал, ле Рʹутʹ нәдьчу.

Ԝи чахи Наһоми готә Рʹутʹ: «Ва Орпа вәгәрʹийа, ләма тӧ жи гәрәке вәгәрʹи». Рʹутʹ жи щава хԝә да: «Мьн зоре нәдә вәгәрʹандьне кӧ әз жь тә бьԛәтьм! Бьһелә кӧ әз тʹәви тә бем. Чьмки тӧ кʹӧда һәри әзе тʹәви тә бем, тӧ ль кʹӧ бьмини әзе жи ль ԝьр бьминьм. Щьмәʹта тә ԝе щьмәʹта мьн бә, Хԝәдайе тә ԝе Хԝәдайе мьн бә. Тӧ ль кʹидәре бьмьри әзе жи ль ԝьр бьмьрьм у ль ԝьр бемә дәфьн кьрьне». Паши ван гьлийа Наһоми ле ида зор нәдькьр кӧ вәгәрʹә мале.

Пашԝәхтийе әԝана гьһиштьнә Исраеле у ль ԝьр щиԝар бун. Рʹутʹ перʹа-перʹа дәстпекьр дь зәвийада бьхәвьтә, чьмки ԝи чахи ида ԝәʹдә бу кӧ сьмбьла тʹоп кьн. Мерәк бь наве Боԝаз дьһишт кӧ Рʹутʹ дь зәвийа ԝида сьмбьла тʹоп кә. Зани дийа Боԝазе кʹи бу? Дийа ԝи Рʹәхабе жь Әриһайе бу.

Дәрбәке Боԝаз готә Рʹутʹ: «Тә чь ԛәнщи хԝәсийа хԝәрʹа кьрийә, һʹәму кьред тә мьнрʹа гьли кьрьнә. Ӧса жи әʹйан ә кӧ тә чаԝа де-баве хԝә у ԝәлате хԝә һиштийә у һати гьһишти ве щьмәʹте, кʹижан тә пешда нас нәдькьр. Бьра Хԝәдан ԛәнщийа тә бинә пешийа тә у ль сәр тә бьбаринә!»

Рʹутʹ жи ԝирʹа гот: «Хԝәйе мьн, әз дьвиньм кӧ дьле тә ль сәр мьн дьшәԝьтә. Тӧ бь гьлийе хԝәйә ширьн бәр дьле мьнда һати». Һинге Боԝаз Рʹутʹ гәлә бәгәм кьр у пашԝәхтийе әԝана зәԝьщин у бунә жьн мере һәв. Жь ве йәке Наһоми гәлә ша бу! Ле чахе щәм ԝан зарʹа пешьн һатә буйине Наһоми һе гәлә ша бьбу. Наве зарʹоке данин Овед. Пашԝәхтийе Овед бу калке Даԝьд. Һе зедә дәрһәԛа Даԝьд әме паше пебьһʹәсьн.

Кʹьтеба Рʹутʹ.