Сәрһати 52
Гидәон У 300 Әскәред Ԝи
ДЬВИНИ чь вьра дьԛәԝьмә? Ль вьр тʹәмамийа әскәред исраели тʹоп бунә. Һьнә әскәр куз бунә у аве вәдьхԝьн. Ле мерәк кʹеләка ԝан сәкьнийә, у дина хԝә дьдә һәла әԝана чь щурʹәйи аве вәдьхԝьн. Наве ԝи мерьки Гидәон ә, у әԝ һʹакьме исраелийа йә.
Ньһа һе рʹьнд бьньһерʹә ль сәр шькьл у дина хԝә бьдә әскәр бь чь щурʹәйи аве вәдьхԝьн. Һьнә жь ԝан сәрчʹәʹве хԝә кьрьнә аве у ӧса вәдьхԝьн. Ле йәк жь ԝан аве бь дәсте хԝә һьлдьчʹинә у ӧса вәдьхԝә, кӧ бькарьбә дора хԝә бьньһерʹә. Йаһоԝа дьхԝәст кӧ Гидәон тʹәне ԝан мера ԝәԛәтинә, йе кӧ ԝәʹде авԝәхԝарьне дора хԝә дьньһерʹьн. Ле йе дьне, гәрәке вәгәрʹийана мале. Ле гәло чьрʹа?
Исраели пашда бунә хԝәйе кӧл у дәрда, чьмки ԝана гӧрʹа Йаһоԝа нәдькьр. Щьмәʹта мьдйане зорбә исраелийа дькьрьн, у ԝана дьчәрчьрандьн. Ләма жи Исраелийа лавайа Йаһоԝа дькьрьн, кӧ әԝ али ԝан бькә, у Йаһоԝа жи лавайед ԝан бьһист.
Йаһоԝа готә Гидәон кӧ әԝ әскәред хԝә тʹоп бькә, әԝи жи ԝәкә 32 000 мер тʹоп кьр. Ле әскәред пешбәри исраелийа ԝәкә 135 000 бун. Ле бьньһерʹә Йаһоԝа чь готә Гидәон: «Әскәред тә гәләк ьн». Гәло Йаһоԝа чьрʹа ӧса гот?
Һәрге исраелийа бь ԝан 32 000 әскәра дьжмьнед хԝә ԛьрʹ кьра, ԝе әԝана дьшьрмиш буна кӧ әв йәк ԝана бь ԛәԝата хԝә кьр у аликʹарийа Хԝәде ԝанарʹа ида лазьм найе. Ләма жи Йаһоԝа готә Гидәон: «Ԝан мера йе кӧ дьтьрсьн, бежә бьра вәгәрʹьн мала хԝә». Чахе Гидәон готә ԝан, ԝәкә 22 000 әскәр вәгәрʹийан мал. Ле тʹәви Гидәон тʹәне 10 000 әскәр ман, йе кӧ гәрәке пешбәри 135 000 әскәра дәркʹәтана.
Ле бьньһерʹә Йаһоԝа чь дьвежә Гидәонрʹа: «Әскәред тә йәкә гәләк ьн». Ләма жи Йаһоԝа готә Гидәон, кӧ бьра һʹәму әскәред ԝи жь ве канийе аве вәхԝьн, у әԝ әскәр йе кӧ сәрчʹәʹве хԝә дькьрә аве вәдьгәрʹийа мале. Паше Йаһоԝа соз да Гидәонрʹа: «Әзе бь дәсте 300 әскәра тә сәрфьнийаз кьм, йе кӧ ԝәхта ав вәдьхԝарьн дора хԝә дьньһерʹин».
Ԝәʹдә гьһишт кӧ шәрʹ дәстпекьн. Гидәон 300 әскәред хԝә кьрә се кʹома. Әԝи һәр әскәред хԝәрʹа се тьшт да: «Борʹи, кʹуп у пʹета агьр, йе кӧ дь кʹупда бу. Ԝәкә ниве шәве әԝана тʹәмам дора чадьред дьжмьне хԝә тʹоп бун. Паше ԝана дәрбәкерʹа дәстпекьрьн борʹийе хьн, кʹупед хԝә шкенандьн у бь дәнге ԛайим дьготьн: «Шуре Йаһоԝа у йа Гидәон» Әскәред рʹазайи ньшкева һʹьшйар бун, жь тьрса у әщевмайибуне дәстпекьрьн бьрʹәвьн. Ӧса исраелийа дьжмьнед хԝә алт кьрьн.
Һʹакьмти сәре 6 һʹәта 8.