Гәло Хwәде Дьхwәст wәки Әм ӧса Бьжин?
ЧАХЕ әм рʹожнәма дьхуньн, телевизоре дьньһерʹьн, йан жи радиойе дьбьһен әм педьһʹәсьн кӧ ль дьнйайе тʹьжә терроризм, шәрʹ-дәʹв у нәһәqи дьqәwьмьн! Хенщи wе йәке, проблемед мәйә башqә жи һәнә. Һьнәк бәрхwә дькʹәвьн жь бо нәхwәшийа, һьнәк жи жь бо мьрьна мәрьвед хwәйә незик дьчәрчьрьн. Дьбәк тӧ жи тʹәхмин дьки wе йәке чь кӧ Ибо пʹехәмбәр гот: «Әз кӧл-дәрдада хәньqимә» (Ибо 10:15, ДТʹ).
Һәла дьшьрмиш бә:
Хwәде дьхwәст wәки әʹмьре мә ӧса буйа?
Кʹидәре әм дькарьн аликʹарийе бьбиньн, wәки проблемед хwә сафи кьн?
Wе бе wәʹде ӧса wәки ль сәр әʹрде әʹдьлайи һәбә?
Кʹьтеба Пироз рʹаст у бь тʹәмами щабед wан пьрса дьдә.
КʹЬТЕБА ПИРОЗ ҺИН ДЬКӘ КӦ ХWӘДЕ ЛЬ СӘР ӘʹРДЕ WЕ WАН ГӦҺАСТЬНА БЬКӘ.
«Әwе жь чʹәʹвед wан һʹәму һесьред wан паqьж кә у иди мьрьне тʹӧнәбә, нә шин, нә гьри, нә еш-ешук» (Әʹйанти 21:4).
«Тʹӧпал wе мина гакʹуви банздә» (Ишайа 35:6, ДТʹ).
«Чʹәʹве кора вәбьн» (Ишайа 35:5).
«Һʹәмуйед тʹьрбада . . . wе . . . рʹабьн» (Йуһʹәнна 5:28, 29).
«Йе кӧ ль wьр рудьне [дьжи], wе нәбежә: ‹Әз нәхwәш ьм›» (Ишайа 33:24).
«Ль сәр рʹуйе әʹрде гәньм зедә бьбә» (Зәбур 72:16, АБ).
ҺИНБУНА КʹЬТЕБА ПЕРОЗ КʹАРЕ ТИНӘ
Һәрге тә тʹьре, кӧ әw һʹәму тьштед дәрһәqа кʹижани мә жоре хwанд найенә сери, ләз нәкʹәвә. Бир нәкә кӧ әw созед Хwәде нә. Һьн жи Кʹьтеба Пироз шьровәдькә кӧ Хwәде әwан соза wе чаwа бинә сери.
Кʹьтеба Пироз wе али тә бькә, wәки тӧ ида иро бь жийинәкә баш у фькьранди бьжийи. Һәла дьшьрмиш бә чь проблемед тә һәнә. Дьбәк пʹәрава гьредайи, йан нәфәре малева гьредайи, йан жи алийе сьһʹәт-qәwатеда проблема тә һәйә. Гәләк мәри бәрхwәдькʹәвьн у дьлтәнг ьн, чьмки мәрьвед wанә незик мьрьнә. Һәйнәсәр проблемед мә гәләк ьн. Ле Кʹьтеба Пироз бь сайа щабед ль сәр пьрсед жере ньвисар, дькарә али тә бькә тӧ wан проблема сафи ки, у wәки бәрхwәкʹәтьна у дьлтәнгйа тә һе кем бә:
Чьрʹа әм дьчәрчьрьн?
Ча әм дькарьн проблемед хwә сафи кьн?
Чь әм дькарьн бькьн, wәки жийина малбәта мә һе баш у бәхтәwар бә?
Паши мьрьне әʹмьр бәрдәwан дьбә, йан на?
Гәло әме мьрийед хwә диса бьвиньн?
Чьрʹа әм гәрәке баwәр кьн кӧ Хwәде созед хwә wе бинә сери?
Әw йәк, кӧ тӧ ньһа әве кʹьтебе дьхуни, дьдә кʹьфше wәки тӧ дьхwази пебьһʹәси һәла Кʹьтеба Пироз чь һин дькә. Әв кʹьтеб дь wе йәкеда wе али тә бькә. Дина хwә бьде кӧ хьлазийа рʹупʹела пьрс сәва абзаса һәнә. Бь милйона мәрийа ша нә, кӧ тʹәви Шәʹдед Йаһоwа бь сайа пьрс у щаба дәрһәqа Кʹьтеба Пироз тʹәви һәв шеwьр дькьн. Гӧмана мә һәйә, wәки тӧ жи бьхwази. Бьра Хwәде әwе хwәстьна тә кʹәрәм кә, у бьра тӧ кʹаре бьстини жь wан тьштед кӧ тӧ жь Кʹьтеба Пироз пебьһʹәси!