Һöрмәткьрьна Бәйраqе, Дәнгдаин у Qöльха Бажарванийе

Һöрмәткьрьна бәйраqе. Шәʹдед Йаһоwа фәʹм дькьн кö сәре хwә бәр бәйраqе дахьстьн у бәйраq һʹöрмәткьрьн, һәйә ритуала религийайе. Чьмки әв йәк гәләк щар те кьрьне бь гимнлехьстьне, у бь ве йәке мәри дьдьнә кʹьфше кö хьлазкьрьн, нә кö жь Хwәде йә, ле жь дәwләте йан жь сәркʹаред дәwләте (Ишайа 43:11; 1  Корьнтʹи 10:14; 1  Йуһʹәнна 5:21). Әве йәке әʹйан дькә мәсәла пʹадше Бабилоне, Нәбукәднәсәр. Сәва кö мәрийарʹа бьда кʹьфше зорайа хwә у хирәта хwә һьндава религийе, әw пʹадше һьмзор һәйкәләки пʹьрʹ мәзьн ава кьр, у жь мәрийа дәʹwа дькьр, wәки сәре хwә бәр wи һәйкәли дайньн. Wәʹде wе ритуале мьqам дьһатә лехьстьне, кʹижан кö дькарьн бәрамбәри гимне бькьн. Ле се щьһуйед щаһьл, Шәдрак, Мәшак у Абәднәго заньбун кö һәрге сәре хwә бәр wи һәйкәли данәйньн wе бь мьрьне бенә щәзакьрьне ле йәкә әw йәк инкʹар кьрьн (Данийел, сәре 3).

Дирокзан Карлтон Хейс ньвисийә, кö дь qöрʹна мәда «бәйраq тьштәки бона һʹәбандьне йә. Чахе бәйраqе бәр мерарʹа дәрбаз дькьн мер кʹöме хwә сәре хwә дәрдьхьн». Шайир жи бона һöрмәткьрьна бәйраqе шера дьбежьн, ле зарʹ гимн дьстьрен. Карлтон Хейс öса жи гот, кö «рʹожед пироз», «мәрьвед пироз у әʹгит», «дер» йане пʹарьстгәһ, йе натсийонализме жи һәнә. Дь шәһәре Бьразилийайеда wәʹде серемонийа дәwләте, wәзирәк кʹижан кö ль сәр әскәрарʹа qöльха бьльндда бу öса гот: «Әм бәйраqе һöрмәт дькьн у сәре хwә бәр датиньн...чаwа бәр дәwләте». Öса жи дь «Әнсиклопедийа Америкайеда» һатьбу готьне, wәки «бәйраq мина хач пироз ә».

Дь ве әнсиклопедийеда öса жи һатийә кʹьфшкьрьне, wәки «гимнед дәwләте дьдьнә кʹьфше рʹöһʹе мьләтһʹәзийе. Дь ван гимнада гәләк щар те бьһистьне кö чаwа жь Хwәде лава дькьн, wәки әw рʹебәрийе бьдә wан, öса жи хwәй кә щьмәʹта wан у сәрwеред wан». Ләма жи Шәʹдед Йаһоwа рʹаст дькьн кö һʹәсаб дькьн серемонийа мьләтһʹәзийе, һöрмәткьрьна бәйраqе у готьна гимне, әw һәнә ритуалед религийайе. Дь кʹьтеба «Рʹöһʹе Америкайе» дьһатә готьне, кö зарʹед Шәʹдед Йаһоwа дь мәкʹтәбада инкʹар дькьрьн сәре хwә бәр бәйраqе дайньн, йан жи wирʹа амьн бьн. Дь ве кʹьтебеда öса һатьбу ньвисаре: «Әw ритуалед кö һәр рʹож дькьн, бь рʹасти жь религийайе нә, у әва йәка Диwана бьльнд избат кьр дь сафикьрьна хwәда» («Thе Amеrican Charactеr»).

Рʹаст ә Шәʹдед Йаһоwа тʹәви wан серемонийа набьн, йе кö нә ль сәр һʹиме Кʹьтеба Пироз ьн. Ле әwана бь qәдьр ьн тʹәви wан мәрийа, йед кö тʹәв серемонийед öса дьбьнә йәк. Шәʹдед Йаһоwа öса жи бь qәдьр ьн һьндава бәйраqе, йа кö һәйә симбола дәwләте. Әwана qәбул дькьн сәрwертийа дәwләта хwә у wана һʹәсаб дькьн «хьзмәткʹаре Хwәде» (Рʹомайи 13:1-4). Ләма жи Шәʹдед Йаһоwа гöһ дьдьнә wе ширәте кö «бона пʹадша у һʹәму сәрwера» дöа бькьн. Әм öса дькьн «wәки әм жийинәкә әʹдьл у сәqьрʹи дәрбаз кьн» бь тʹәмамийа бәрбьһерийе у маqулийе (1  Тимотʹейо 2:2).

Дәнгдайин wәʹде һьлбьжартьна. Мәсиһийед рʹаст qәдьре изьна wан мәрьва дьгьрьн, йед кö дьхwазьн дәнге хwә бьдьнә кәсәки. Мәсиһи öса жи мьqабьли һьлбьжартьна ниньн у гöрʹа сәрwеред бьжарти дькьн. Ле wана сафи кьрийә, кö нәтʹәвбуйине дь шьхöлед политикайеда хwәй кьн (Мәтта 22:21; 1  Пәтрус 3:16). Ле чь гәрәке бькьн мәсиһи һәрге дь wәлатед öсада дьжин, кʹидәре кö те дәʹwакьрьне, wәки һәр кәс гәрәке әʹсәйи тʹәв һьлбьжартьна бә, йан жи һәрге нәчьнә һьлбьжартьна wе дьжмьнатийе wанрʹа бькʹшиньн? Дь дәрәща öсада мәсиһи дькарә һьлдә һʹәсаб мәсәла Шәдрак, Мәшак у Абәднәго. Рʹаст ә, әwана чун дәшта Дурайе, ле сәре хwә бәр һәйкәл данәйнин. Ләма һәрге öса бьqәwьмә кö мәсиһи жи бькʹәвә дәрәща öсада, у һәрге исафа wи изьне дьде, у әw сафи дькә кö һәрʹә щийе һьлбьжартьне, ви чахи әw гәрәке фәсал бә, у бир нәкә кö нәтʹәвбуйине гәрәке хwәй кә. Әw öса жи гәрәке wан шәш принсипа бира хwәда хwәй кә.

1. Шандийед Иса «нә пʹара дьнйайе нә» (Йуһʹәнна 15:19).

2. Мәсиһи wәкʹилед Мәсиһ у Пʹадшатийа wи нә (Йуһʹәнна 18:36; 2  Корьнтʹи 5:20).

3. Щьвата мәсиһийа бь сайа баwәрийе дь йәктийеда нә, әwана чʹәʹв дьдьнә Иса у һәвдö һʹьз дькьн (1 Корьнтʹи 1:10; Колоси 3:14).

4. Әwед кö кәсәки дьжберьн сәва qöльхәки, бона кьред wи щабдар ьн (Дина хwә бьдьне wе йәке һәла дь 1  Самуйел 8:5, 10-18 у 1  Тимотʹейо 5:22-да чь принсип һәнә).

5. Хwәстьна Исраелийа кö пʹадшайе wан һәбә, да кʹьфше кö әwана Йаһоwа инкʹар дькьн (1  Самуйел 8:7).

6. Чахе әм хәбәр дьдьн дәрһәqа Пʹадшатийа Хwәде тʹәви мәрьвед кö итʹбарийа хwә щурʹә-щурʹә политикайа тиньн, гәрәке азайа хәбәрдана мә һәбә (Мәтта 24:14; 28:19, 20; Ибрани 13:18).

Qöльха бажарванийе. Дь һьнә wәлатада, дәwләт дәʹwа дькә wәки кʹи кö инкʹар дькә һәрʹә әскәрийе, гәрәке qöльха бажарванийе бькә, у һаqас wәʹдә бьхәбьтә чьqас кö wирʹа кʹьфш кьрьнә. Һәрге мәрʹа лазьм бе кö сафикьрьна öса бькьн, әм гәрәке дöа бькьн, у һәрге лазьм бә, аликʹарийе бьхwазьн, демәк шевьр бькьн тʹәви мәсиһики öса, йе кö рʹöһʹанида qәwи йә. Паше жи гәрәке исафа хwә бьдьн хәбате у сафикьрьна бькьн ль сәр һʹиме wе йәке, чь кö әм ида пеһʹәсийан дәрһәqа ви шьхöли (Мәтʹәлок 2:1-5; Филипи 4:5).

Хәбәра Хwәде мә һелан дькә: «Гöрʹа сәрwер у һʹöкöмәта бькьн, гöһдар бьн у бона һʹәму кьрьнед qәнщ һазьр сәкьни бьн...мьлук бьн [сәрwахт бьн ДТʹ]» (Тито 3:1, 2). Сәва кö әwе ширәте бира хwәда хwәй кьн, гәрәке пьрсед öса бьдьнә хwә: «Һәрге әз qайил бьм кö qöльха бажарванийе бьqәдиньм, гәло бь ве йәке әзе нәтʹәвбуйинтийа мәсиһитийе хьраб нәкьм, у бь щурʹәки религийа qәлпва нәйемә гьредане?» (Миха 4:3, 5; 2  Корьнтʹи 6:16, 17). «Әw хәбата кö әзе бькьн, гәло wе рʹийа мьн нәгьрә у wе мьнрʹа зор нибә кö шьхöлед мәсиһити кʹижан кö мьнрʹа һатийә кʹьфшкьрьне бьqәдиньм?» (Мәтта 28:19, 20; Әфәси 6:4; Ибрани 10:24, 25). «Йан жи чахе әз әв qöльха бажарванийе бьqәдиньм, щәм мьн wе мәщал һәбә кö һе зедә тьшт бькьм бона пьрсед рʹöһʹани у әзе бькарьбьм ча пешәнге һәртʹьм хьзмәт кьм, йан на?» (Ибрани 6:11, 12).

Һәрге исафа Мәсиһи изьне дьдә wи, wәки дәwса ве йәке кö һәрʹә кәле, qöльха бажарванийе бьqәдинә, wи чахи мәсиһи гәрәке qәдьре бьжартьна wи бьгьрьн (Рʹомайи 14:10). Ле һәрге әw дьфькьрә кö нькарә qöльха бажарванийе бьqәдинә, мәсиһийед дьн ви чахи жи гәрәке qәдьре бьжартьна wи бьгьрьн (1 Корьнтʹи 10:29; 2 Корьнтʹи 1:24). Һöрмәткьрьна Бәйраqе, Дәнгдаин у Qöльха Бажарванийе