Чьма Шәʹдед Йаһоԝа Хԝә жь Щәжьнед Мьләтийе Дур Дьгьрьн?

Әм ча Шәʹдед Йаһоԝа һьндава һʹӧкӧмәтийе у симболед ԝанә мьләтийе бь ԛәдьр ьн. Әм фәʹм дькьн ԝәки һәр кәс хԝәха дьжберә сонда амьнийе бьхԝә, бәйраԛе һӧрмәт кә у гимна мьләтийе бьстьре, йан на.

Чь жи һәбә әм ча Шәʹдед Йаһоԝа сафи дькьн, ԝәки жь щәжьнед ӧса хԝә дур бьгьрьн, чьмки әм баԝәр дькьн, ԝәки әв йәк мьԛабьли һинкьрьнед Кʹьтеба Пироз ә. Әм дьшекьриньн гава мәрьв һьндава баԝәрийа мәда ԛәдьр дьдьнә кʹьфше, чаԝа кӧ әм һьндава баԝәрийа ԝанда бь ԛәдьр ьн.

Ве готареда

• Сәр һʹиме кʹижан принсипа әм хԝә жь щәжьнед мьләтийе дур дьгьрьн?

• Чь лазьм ә бькьн һәрге ԛануна дәԝләте дәʹԝа дькә, ԝәки тʹәви щәжьнед мьләтийе бьн?

• Гәло Шәʹдед Йаһоԝа пьштгьрийа политикайе дькьн?

Сәр һʹиме кʹижан принсипа әм хԝә жь щәжьнед мьләтийе дур дьгьрьн?

Дӧ принсипед Кʹьтеба Пирозә сәрәкә, дәрһәԛа кʹижана ԝе ньһа бе шеԝьркьрьне, сәр бьжартьна мә һʹӧкӧм дьбьн:

• Тʹәне Хԝәде һежа йә кӧ ԝи бьһʹәбиньн. Кʹьтеба Пироз дьбежә: «Сәре хԝә ль бәр Хӧдан Хԝәдейе хԝә дайнә у тʹәне ԝи бьһʹәбинә!›» (Луԛа 4:8). Сонда амьнийеда у гимнед мьләтийеда гьлийед ӧса һәнә, кʹижан кӧ дьдьнә кʹьфше ԝәки мәрьв ԝәлате хԝә жь һәр тьшти у жь һәр кәси зедәтьр һʹьз бькә. Ләма жи Шәʹдед Йаһоԝа фәʹм дькьн, ԝәки ԝе нәрʹаст бә тʹәви ԝан щәжьна бьн.

  Шәʹдед Йаһоԝа фәʹм дькьн, ԝәки һʹӧрмәткьрьна бәйраԛе пʹарәкә һʹәбандьна пʹутпʹарьстийе йә, кʹижан кӧ Кʹьтеба Пироз ԛәдәхә дькә (1 Корьнтʹи 10:14). Һьнә тʹәрихзан дьбежьн, ԝәки бәйраԛед мьләтийе бь рʹасти симбола религи нә. Тʹәрихзан Карлтон Щозеф Һаз ӧса ньвисийә: «Насионализм мина религийайе йә—симбола ԝейә сәрәкә у тьште ԝейә һʹәбандьне бәйраԛ ә».a Дәрһәԛа Мәсиһийед ԛьрʹна йәке, ньвискʹар Данийел Прат Маникс ӧса ньвиси: «Мәсиһийа инкʹар дькьр . . . ԛӧрбана бьдьне императоре [Роме] пʹьрʹ занә—анәгори ԝе йәке иро инкʹар дькьн һӧрмәте бьдьнә бәйраԛе».b

  Рʹаст ә әм Шәʹдед Йаһоԝа һӧрмәте надьнә бәйраԛе, ле ве нашәԝьтиньн, зийане надьне у нә жи бь щурʹе майин симболед мьләтийе беһӧрмәт дькьн.

• Хԝәде фьрԛийе накә ортʹа мәрьва (Кʹаред Шандийа 10:34, 35). Кʹьтеба Пироз дьбежә, ԝәки Хԝәде «һʹәму мьләтед дьнйайе жь хунәки хӧльԛанд» (Кʹаред Шандийа 17:26). Жь бо ве мәʹнийе Шәʹдед Йаһоԝа фәʹм дькьн, ԝәки ԝе нәрʹаст бә кӧ мьләтәки сәр мьләтәки дьнрʹа бьгьрьн. Әм ԛәдьре һʹәму мәрийа дьгьрьн, фьрԛи тʹӧнә әԝана жь чь мьләти нә у жь кʹидәре нә (1 Пәтрус 2:17).

Чь лазьм ә бькьн һәрге ԛануна дәԝләте дәʹԝа дькә, ԝәки тʹәви щәжьнед мьләтийе бьн?

Шәʹдед Йаһоԝа мьԛабьли һʹӧкӧмәте дәрнайен. Әм баԝәр дькьн ԝәки һʹӧкӧмәти әв һәйә пʹара «әʹмьре Хԝәде» (Рʹомайи 13:1-7). Әм ӧса жи фәʹм дькьн, ԝәки Мәсиһи гәрәке гӧрʹа һʹӧкӧмәтеда бьн (Луԛа 20:25).

Ле чь бькьн һәрге һʹӧкӧмәти жь мә дәʹԝа дькә тьштәки ӧса бькьн, чь кӧ ль гора ԛанунед Хԝәде нинә? Һьнә дәрәщада әм дькарьн бь фәрми жь һʹӧкӧмәтийе бьхԝазьн, ԝәки һьнә тьшт ԛанунеда бьгӧһезьн.c Ле чахе набә кӧ гӧһастьна бькьн, һьнге әм ча Шәʹдед Йаһоԝа бь ԛәдьр сафи дькьн, ԝәки «гӧрʹа Хԝәде бькьн, нә кӧ йа мәрьва» (Кʹаред Шандийа 5:29).

Гәло Шәʹдед Йаһоԝа пьштгьрийа политикайе дькьн?

На. Шәʹдед Йаһоԝа пьштгьрийа политикайе накьн. Чахе әм сафи дькьн сонда амьнийе нәхԝьн, һӧрмәте нәдьнә бәйраԛе у гимне нәстьрен, әв найе һʹәсабе кӧ әм активистед политикайе нә. Ле әм әве йәке дькьн жь бо баԝәрийа хԝәйә сәр һʹиме Кʹьтеба Пироз.