Ча малбәта тә дькарә бәхтәwар бә?

1. Чьрʹа зәwаща бь qануни, сәва бәхтәwарийа малбәте фәрʹз ә?

Чьмки Йаһоwа Хwәдайе бәхтәwар у хwәзьли йә, ләма әw дьхwазә, wәки малбәт бәхтәwар бьн (1 Тимотʹейо 1:11). Йаһоwа зәwащ саз кьр. Зәwаща бь qануни, бәхтәwарийе тинә һьн мер у жьнрʹа, һьн жи зарʹарʹа. Әw кʹи кӧ Хwәде баwәр дькьн, гәрәке бь qәдьр бьньһерʹьн ль сәр qанунед дәwләте, дәрһәqа qанункьрьна зәwаще. Бьхунә Луqа 2:1, 4, 5.

Ча Йаһоwа Хwәде дьньһерʹә ль сәр зәwаще? Әw дьхwазә, wәки зәwащ демәк пʹәвгьредана жьн у мер тʹӧ щар хьраб нәбә. Йаһоwа Хwәде дьхwазә, wәки жьн у мер һьмбәри һәв амьн бьн (Ибрани 13:4). Һәвqәтандьн бәр чʹәʹве Йаһоwа рʹәш ә (Малахи 2:16). Ле һәгәр жьна кәсәки йан мере кәсәки qавийе бькә, тʹәне wи чахи Йаһоwа изьне дьдә, wәки ле бьqәтә у тʹәзәда бьзәwьщә. Бьхунә Мәтта 19:3-6, 9.

2. Мер у жьн һьмбәри һәв гәрәке чаwа бьн?

Йаһоwа Хwәде мер у жьн ӧса әʹфьрандийә, wәки әwана кʹомәке бьдьнә һәв (Дәстпебун 2:18). Мер малхе мале йә, ләма жи әw гәрәке дәрһәqа һʹәwщед нәфәре мале хәм бькә. Ӧса жи әw гәрәке wана дәрһәqа Хwәде һин бькә. Мер гәрәке хwәһʹәз нибә у жьна хwә wәкә хwә һʹәз бькә. Мер у жьн гәрәке һәвдӧ һʹәз бькьн у qәдьре һәв бьзаньбьн. Чьмки һәр жьн у һәр мер гӧнәкʹар ә, ләма һәгәр әwана һин бьн һәвдӧ бьбахшиньн әwана wе бәхтәwар бьн. Бьхунә Әфәси 4:31, 32; 5:22-25, 33; 1 Пәтрус 3:7.

3. Һәгәр дь зәwащеда тӧ бәхтәwар нини, лазьм ә һун һәв бьqәтьн?

Һәрге дь зәwаща тәда чәтьнайи һәйә, һәр кәс жь wә гәрәке бьхәбьтьн сәва кӧ һʹәзкьрьна wә һьмбәри һәв һәбә (1 Корьнтʹи 13:4, 5). Хәбәра Хwәде мә һин дькә, wәки һе баш ә проблемед зәwаще пе һәвдуркʹәтьне сафи нәкьн. Бьхунә 1 Корьнтʹи 7:10-13.

4. Зарʹно, Хwәде жь wә чь дәwа дькә?

Йаһоwа Хwәде дьхwазә, wәки һун бәхтәwар бьн. Әw ширәтед ӧса баш дьдә wә, wәки һун жь щьһалтийа хwә ләзәте бьбиньн. Хwәде дьхwазә, wәки тӧ гӧрʹа де-баве хwә бьки, чьмки әwана билан ьн у дь әʹмьре хwәда щерʹьбанди нә (Колоси 3:20). Йаһоwа Хwәде ӧса жи дьхwазә, wәки тӧ qьрара Әʹфьрандаре хwә бьqәдини у гӧрʹа кӧрʹе wи бьки, wәки шабуне бьстини. Бьхунә Wаиз 11:9–12:1; Мәтта 19:13-15; 21:15, 16.

5. Ча де бав дькарьн зарʹед хwә бәхтәwар кьн?

Һун гәрәке тʹьме бьхәбьтьн, wәки хwарьн, кʹьнщ у щи-сьтʹара зарʹед wә һәбә (1 Тимотʹейо 5:8). Сәва кӧ зарʹед wә бәхтәwар бьн һун гәрәке ӧса жи wана һин кьн, wәки Хwәде һʹәз бькьн у жь Хwәде һин бьн (Әфәси 6:4). Зарʹ чахе дьбиньн һун ча һʹәзкьрьна хwә һьндава Хwәде дьдьнә кʹьфше, әwана мәсәле баш хwәрʹа һьлдьдьн. Ширәтед wәйи ль сәр һʹиме Кʹьтеба Пироз wе гәләк рʹьнд һʹӧкӧм бьн ль сәр дьшьрмишбуна зарʹед wә. Бьхунә Qануна Дӧщари 6:4-7; Мәтʹәлок 22:6.

Сәва зарʹа кʹар ә чахе һун пʹайа у һелана дьдьнә wан. Ле wанарʹа ӧса жи һинкьрьн у ширәткьрьн лазьм ә. Һинкьрьна wә wе зарʹед wә жь һинкьрьнед нәрʹаст хwәй кә, кʹижан кӧ дькарьн шабуне жь wан бьстиньн (Мәтʹәлок 22:15). Ле фәсал бьн, wәки һинкьрьна wә гәлә һʹьшк у бь дьлсари нибә. Бьхунә Колоси 3:21.

Шәʹдед Йаһоwа һьнә кʹьтеб нәшьр кьрьн, хут сәва кӧ али де-бава у зарʹа бькә. Әв кʹьтеб ль сәр һʹиме Кʹьтеба Пироз һатьнә ньвисаре. Бьхунә Зәбур 19:7, 11.