Ча qанунед Кʹьтеба Пироз кʹаре мәрʹа тиньн?

1. Чьрʹа мәрʹа лазьм ә рʹебәри?

Әʹфьрандаре мә жь мә дьһа билантьр ә. Әw ча бав, мә һʹәз дькә у бона мә хәм дькә. Хwәде мәри ӧса нәәʹфьрандийә, кӧ бькарьбьн бейи рʹебәрийа wи бьжин (Йерәмйа 10:23). Ча зарʹа бьчʹукрʹа лазьм ә рʹебәрийа де-бава, ӧса жи мә һәр кәсирʹа лазьм ә рʹебәрийа Хwәде (Ишайа 48:17, 18). Иро әм рʹебәрийе дьстиньн бь сайа wан qануна, кӧ дь Кʹьтеба Пирозда ньвисар ьн, у әв рʹебәри рʹасти жи пʹешкʹеша жь Хwәде йә. Бьхунә 2 Тимотʹейо 3:16.

Qанун у ширәтед Хwәде мә һин дькьн ча рʹожед иройин әм бәхтәwар бьн у ль ахьрийе жи әʹмьре һʹәта-һʹәтайе бьстиньн. Чьмки Хwәде әм әʹфьрандьнә, ләма һәq ә кӧ әwи qанун у фәрман дайә мә кӧ ча әм гәрәке бьжин. Әм гәрәке әве йәке бьшекьриньн у бь шабун гӧрʹа qанунед wи бькьн. Бьхунә Зәбур 19:7, 11; Әʹйанти 4:11.

2. Ча Хәбәра Хwәде рʹебәрийе мә дькә?

Һьнә qанунед жь Кʹьтеба Пироз дькарьн дь щурʹә-щурʹә дәрәщада бенә хәбьтандьне. Ле һәнә qанунед ӧса жи кӧ тʹәне дь дәрәщәкеда тенә хәбьтандьне (Qануна Дӧщари 22:8). Әм гәрәке һʹьш-аqьле хwә бьдьн хәбате, wәки фәʹм бькьн ча рʹастийед жь Кʹьтеба Пироз мәрʹа дьбежьн чь бькьн, чь нәкьн (Мәтʹәлок 2:10-12). Мәсәлә, Кʹьтеба Пироз мә һин дькә кӧ әʹмьр пʹешкʹеша жь Хwәде йә. Жь ве һинкьрьне әм чь ширәт у рʹебәрийе һьлдьдьн? Һәгәр әм һʹәсаб дькьн кӧ әʹмьр пʹешкʹеша жь Хwәде йә, әме тʹьме һаш жь хwә һәбьн, wәки нә әʹмьре хwә нә жи йе мәрийед дьн нәкьнә бьн хoфе, ӧса жи зийане нәдьнә нә хwә, нә жи мәрийед дьн. Бьхунә Кʹаред Шандийа 17:28.

3. Кʹижан дӧ фәрман лапи фәрз ьн?

Иса Мәсиһ дәрһәqа дӧ qанунед фәрз хәбәр да. Qануна пешьн нишан дькә, wәки нета әʹмьре мәрьва әw ә, кӧ дәрһәqа Хwәде бьзаньбьн, wи һʹәз бькьн у бь амьнийе wирʹа qӧльх кьн. Әв qанун әм гәрәке дь һʹәму шьхӧлед хwәда бьдьн хәбате (Мәтʹәлок 3:6). Әw мәри кʹи кӧ бь ве qануне дьжин, wе һәвалтийа тʹәви Хwәде, бәхтәwарбуна рʹаст у әʹмьре һʹәта-һʹәтайе бьстиньн. Бьхунә Мәтта 22:36-38.

Qануна дӧда дькарә али мә бькә, кӧ һәләqәтийа мә тʹәви мәрьва бь әʹдьлайи бә (1 Корьнтʹи 13:4-7). Әва qануна дӧда али мә дькә әм чʹәʹв бьдьнә Йаһоwа Хwәде, wәки ча кӧ әw тʹәви мәрийа йә ӧса жи әм бьн. Бьхунә Мәтта 7:12; 22:39, 40.

4. Ча qанунед Кʹьтеба Пироз кʹаре мәрʹа тиньн?

Qанунед Кʹьтеба Пироз малбәта һин дькьн wәки ча дь һʹәзкьрьнеда бьбьнә йәк (Колоси 3:12-14). Хәбәра Хwәде ӧса жи qанунәкә ӧса дьдә, wәки мер у жьн гәрәке һәв нәqәтьн. Әв qанун малбәта хwәй дькә. Бьхунә Дәстпебун 2:24.

Һәгәр әм ван qануна бьqәдиньн, әв йәк wе али мә бькә, wәки һʹале мә һʹәму алийава хwәш бә. Мәсәлә, әw кʹи хәбатчийа дьхwазьн, тʹьме мәрийед ӧса дьгәрʹьн, кʹи кӧ бь qанунед у ширәтед Кʹьтеба Пироз дьжин, чьмки мәрийед ӧса һʹәлал у хирәт ьн (Мәтʹәлок 10:4, 26; Ибрани 13:18). Хәбәра Хwәде ӧса мә һин дькә, кӧ һәгәр һʹәму тьштед кӧ сәва әʹмьр лазьм ә бал мә һәйә, әм гәрәке ида рʹази бьн у һәвалтийа хwә тʹәви Йаһоwа Хwәде жь һʹәму тьштед дьн һе qимәт бькьн. Бьхунә Мәтта 6:24, 25, 33; 1 Тимотʹейо 6:8-10.

Чахе әм qанунед Кʹьтеба Пироз дьдьнә хәбате, әм бь ве йәке ӧса жи сьһʹәт-qәwата хwә хwәй дькьн (Мәтʹәлок 14:30; 22:24, 25). Мәсәлә, qануна Хwәде мә һин дькә кӧ әм гәрәке тʹӧ щар сәрхwәш нәбьн. Әв qанун мә жь нәхwәшийед гьран у жь qәзийа хwәй дькә (Мәтʹәлок 23:20). Йаһоwа Хwәде дьһелә wәки әм ичʹке вәхwьн, ле тʹәне гәрәке фәсал бьн, wәки сәрхwәш нәбьн (Зәбур 104:15; 1 Корьнтʹи 6:10). Бь һинбуна qанунед Хwәде әм кʹаре дьстиньн, чьмки бь ван һинкьрьна нә кӧ тʹәне кьред мә, ле ӧса жи фькьред мә тенә хwәйкьрьне (Зәбур 119:97-100). Мәсиһийед рʹаст qанунед Хwәде дьqәдиньн нә кӧ тʹәне сәва кʹара хwә, ле сәва кӧ Йаһоwа Хwәде һӧрмәт бькьн. Бьхунә Мәтта 5:14-16.