Бьра Qанун у Принсипед Хwәде Исафа Тә Һин кьн

1. Чь тьштәки мәхсус һәйә бал мәрьва, чь кö бал һʹәйwана тʹöнә?

ХWӘДЕ тьштәки мәхсус дайә мәрьва, чь кö бал һʹәйwана тʹöнә йә. Әw һәйә исаф. Хwәде жь дәстпека әʹфьрандьна инсанәте исаф дайә мәрьва. Мәсәлә, чахе Адәм у Һеwайе qануна Йаһоwа тʹәрʹьбандьн, wана хwә вәшарт у әw йәк дьдә кʹьфше wәки исафе әwана дьчәрчьрандьн.

2. Чаwа исафа мә мина компасе йә? (Бьньһерʹә шькле әʹwльн.)

² Әw мәрьве кö исафа wи рʹьнд һинкьри нинә, мина ве гәмийе йә, кʹижан кö пе компаса хьраббуйи дьчә. Рʹеwитийа пе компаса нәрʹаст, гәләк хоф ә. Ба у ава океане, дькарьн һеса гәмийе бьвьнә щики нәрʹаст. Ле компаса кö рʹаст дьхәбьтә дькарә али гәмиван бькә, сәва гәмийе алийе рʹастрʹа бьвә. Исафа мә жи мина компасе йә. Исаф дьле мәда ча рʹебәр ә, бь сайа кʹижани әм дькарьн рʹасти у нәрʹастийе һәвдәрхьн. У әw йәк али мә дькә рʹийа рʹастрʹа һәрʹьн. Ле сәва исафа мә рʹебәре баш бә, лазьм ә әw рʹаст һинкьри бә.

3. Чь дькарә бьqәwьмә һәрге исаф нәрʹаст һинкьри йә?

³ Һәрге исафа мә нәрʹаст һинкьри йә, әwе нькарьбә мә бьгьрә йан жи пешда әʹлами мә бькә кö кьред хьраб нәкьн (1 Тимтʹ. 4:1, 2). Әw исаф дькарә һәла һе жи мә һелан кә кö хьрабийе һʹәсаб кьн ча qәнщи (Иша. 5:20). Дәрһәqа ве йәке Иса пешда шагьртед хwәрʹа öса гот: «Wәхте жи бе, wәки кʹи кö wә бькöжә жи, wе һʹәсаб кә кö әw Хwәдерʹа qöльх дькә» (Йуһʹн. 16:2). Бь рʹасти тьштед öса qәwьмин, мәсәлә мәрьвед кö Стәйфан кöштьн у öса жи һьнәкед мина wан, дьфькьрин кö бона Хwәде ве йәке дькьн (Кʹар. Шанд. 6:8, 12; 7:54-60). Рʹасти жи чьqас әʹщеб ә, кö фанатикед религийа пе зöлмийа öса ча меркöжи, qануна wи Хwәдейи дьтʹәрьбиньн, кʹижан кö дьһʹәбиньн (Дәркʹ. 20:13). Әшкәрә йә, исафа wан рʹебәре гәләк хьраб ә!

4. Ча әм дькарьн тедәрхьн һәла исафа мә рʹаст дьхәбьтә йан на?

⁴ Ле ча әм дькарьн тедәрхьн һәла исафа мә рʹаст дьхәбьтә йан на? Qанун у принсипед жь Хәбәра Хwәде керһати нә «бона һинкьрьне, леһьлатьне, рʹасткьрьне у ширәткьрьна жийина рʹастийеда» (2 Тимтʹ. 3:16). Бәле, әм гәрәке Кʹьтеба Пироз леколин бькьн, сәр бьфькьрьн, у әʹмьре хwәда бьдьнә хәбате. Öса әме һин бьн мина Йаһоwа бьфькьрьн, у исафа мә жи ида wе мәрʹа бьбә рʹебәре баш. Wәрә әм шеwьр кьн кö чаwа qанун у принсипед Йаһоwа дькарьн али мә бькьн исафа хwә һин кьн.

БЬРА QАНУНЕД ХWӘДЕ ТӘ ҺИН КЬН

5, 6. Әм чь кʹаре дьстиньн жь qанунед Хwәде?

⁵ Һәрге әм дьхwазьн жь qанунед Хwәде кʹаре бьстиньн, әм гәрәке wан qануна нә кö тʹәне бьхуньн у бьзаньбьн, ле әм гәрәке qайим һʹьз бькьн у qимәт кьн. Хәбәра Хwәде дьбежә: «Хьрабийе бькәрьһьн [нәфьрʹәт кьн] у qәнщийе һʹәз бькьн» (Амс. 5:15). Ле ча әм дькарьн ве йәке бькьн? Йа пешьн, әм гәрәке мина Йаһоwа сәр тьшта бьньһерʹьн. Бьфькьрьн сәр ве мәсәле: Бәʹса хәбәре һун шәв хьраб рʹадьзен, у һʹәкиме wә wәрʹа диетайе дьньвисә, дьбежә кö спортева мьжул бьн, у һьнә тьшт әʹмьре хwәда бьгöһезьн. Паше чахе wә һʹәму ширәтед wи данә хәбате, wә дит wәки проблема wә сафи бу! Фәʹмдари йә, һуне бона wе аликʹарийе жь wи һʹәкими гәләк рʹази бьн.

⁶ Әʹфьрандаре мә жи мәрʹа qанун данә, кʹижан кö дькарьн мә хwәй кьн жь ахьрийа хьраб кö гöнә тинә, у әʹмьре мә баш кьн. Бьфькьрьн кö әм чьqас кʹаре дьстиньн гава гöрʹа wан тʹәмийед Кʹьтеба Пироз дькьн, мәсәлә чахе хwә дур дьгьрьн жь дәрәwийе, фелбазийе, дьзийе, бенамусийе, зорбәтийе у сербазийе. (Бьхунә Мәтʹәлок 6:16-19; Әʹйан. 21:8) Гава әм дьвиньн кö әм чьqас кʹәрәмед баш дьстиньн чахе гöрʹа Йаһоwа дькьн, дьле мә һьндава Йаһоwа у qанунед wи бь рʹазибуне у һʹьзкьрьне тʹьжә дьбә.

7. Әме чь кʹаре бьстиньн һәрге сәрһатийед жь Кʹьтеба Пироз бьхуньн у сәр бьфькьрьн?

⁷ Нәлазьм ә әм qанунед Хwәде бьтʹәрьбиньн у ахьрийа хьраб бьстиньн, у паше фәʹм кьн чь рʹаст ә чь хьраб ә. Әм дькарьн жь шашийед мәрьвед бәре һин бьн, сәрһатийед кʹижана Хәбәра Хwәдеда ньвисар ьн. Мәтʹәлок 1:5-да те готьне: «Йе сәрwахт бьбьһе һе занәбуна хwә зедә кә». Бь рʹасти чахе әм сәрһатийед жь Кʹьтеба Пироз дьхуньн у сәр дьфькьрьн, бь ве йәке әм занәбун у һинкьрьна жь Хwәде дьстиньн. Һинкьрьна Хwәде лапә баш ә. Бәʹса хәбәре, бьфькьрьн кö Даwьд Пʹадша чьqас кöл-дәрд кʹьшанд, гава гöрʹа тʹәмийа Йаһоwа нәкьр у тʹәви Бат-Шәбайе бенамуси кьр (2 Сам. 12:7-14). Чахе әм әве сәрһатийе дьхуньн у сәр дьфькьрьн, әм дькарьн пьрсе бьдьнә хwә: «Даwьд ча дькарьбу хwә жь ахьрийа хьраб у еше хwәй кьра, йа кö әwи бона бенамусийа тʹәви Бат-Шәбайе станд?» Һәрге әз рʹасти щерʹьбандьнәкә öса бьһатама, гәло мьне бькарьбуйа хwә зәфт кьра у мина Усьв жь ве тʹәльке бьрʹәвийама? (Дәстп. 39:11-15). Һәрге әм бьфькьрьн кö гöнә чь ахьрийе тинә, әме һе qайим хьрабийе нәфьрʹәт кьн.

8, 9. а) Исафа мә чьда али мә дькә? б) Чаwа принсипед Йаһоwа сәр исафа мә һʹöкöм дькьн?

⁸ Бәле, мәрʹа нә зор ә хwә жь wан тьшта дур бьгьрьн, кʹижан кö бәр чʹәʹве Хwәде рʹәш ьн. Ле һәнә тьштед öса, дәрһәqа кʹижана Кʹьтеба Пирозда тʹәмийа конкрет тʹöнә. Һьнге әм ча дькарьн тедәрхьн кö wе ча Хwәде хwәш бе? Ве дәрәщеда исафа пе Кʹьтеба Пироз һинкьри, дькарә али мә бькә сафикьрьна билани бькьн.

⁹ Йаһоwа жь һʹьзкьрьне мәрʹа принсип данә, кʹижан кö рʹебәрийе исафа мә дькьн. Әw дьбежә: «Әз Йаһоwа, Хwәдайе тә мә, кʹижан кö тьштед qәнщ тә һин дькә у ве рʹерʹа тә дьбә, ль сәр кʹижани тö гәрәке һәрʹи» (Иша. 48:17, 18, ДТʹ). Чахе әм пе һʹьш-аqьл у дьле хwә сәр принсипед Хwәде кʹур дьфькьрьн, әw йәк али мә дькә сафикьрьнед билани бькьн.

БЬРА ПРИНСИПЕД ХWӘДЕ РʹЕБӘРИЙЕ ТӘ БЬКЬН

10. Принсип чь йә, у Иса ча принсип рʹьнд дьданә хәбате?

¹⁰ Принсип әw һәйә рʹастийа сәрәкә кö рʹебәрийе фькьред мә дькә, у али мә дькә сафикьрьнед рʹаст бькьн. Чахе әм принсипа заньн, әw йәк али мә дькә ньһерʹандьна Qанундар, демәк Йаһоwа фәʹм кьн, у wан мәʹнийа, кö чьрʹа әwи әw qанун данә мә. Иса wәʹде хьзмәтийа хwә принсип дьданә хәбате, сәва шагьртед хwә һин кә, wәки әwана фәʹм кьн, кö фькьр у шьхöл чь ахьрийе дькарьн биньн. Бәʹса хәбәре, әwи гот кö һерс дькарә мерьв бәрбь зорбәтийе бьвә, ле тәме хьраб, демәк фькьред бенамуси мерьв бәрбь бенамусийе бьвьн (Мәт. 5:21, 22, 27, 28). Сәва кö исафа мә рʹаст бьхәбьтә, әм гәрәке бьһельн, wәки принсипед Хwәде рʹебәрийе мә бькьн, у öса әме пе кьред хwә шькьрийе бьдьнә Хwәде (1 Корн. 10:31).

11. Ча исафа Мәсиһийа дькарә жь һәв щöдә бә?

¹¹ Рʹаст ә исафа Мәсиһийа пе Кʹьтеба Пироз һинкьри йә, ле ньһерʹандьна һәр кәси сәр һьнә тьшта дькарә жь һәв щöдә бә. Мәсәлә, дәрһәqа ичʹкәвәхwарьне. Кʹьтеба Пироз ичʹкәвәхwарьне qәдәхә накә, ле дьбежә wәки хwә дур бьгьрьн жь гәләк ичʹкәвәхwарьне у сәрхwәшибуне (Мәтʹлк. 20:1; 1 Тимтʹ. 3:8). Ле гәло әв те һʹәсабе, wәки Мәсиһийе кö ичʹке һьндьки вәдьхwә, гәрәке хәма wи сәр тьштәки дьн нибә? На. Дьбәкә исаф wи начәрчьринә, ле әw öса жи гәрәке исафа мәрьвед дьн һьлдә һʹәсаб.

12. Чаwа гьлийед жь Рʹомайи 14:21 мә һелан дькьн, wәки qәдьре исафа мәрьвед майин бьгьрьн?

¹² Паwлос гот wәки Мәсиһи гәрәке исафа мәрьвед майин һьлдьнә һʹәсаб. Әwи гот: «Qәнщ ә нә гошт бьхwи, нә шәраве вәхwи у нә жи тьштәки öса бьки, кö бьре тә бькʹәвә» (Рʹом. 14:21). Һәрге һун дьхwазьн тьштәки бькьн у заньн изьна wә һәйә, ле фәʹм дькьн кö бь ве йәке хушк йан бьрак дькарә бьлькʹöмә, гәло һуне хwә бьгьрьн жь ве йәке? Бешьк, һуне хwә бьгьрьн, wәки әw хушк йан бьра нәлькʹöмә. Һьнә бьред мә пешийа кö бьһатана сәр рʹийа рʹаст, гәләк ичʹкә вәдьхwарьн, ле ньһа тʹәрка ичʹке данә. Фәʹмдари йә әме тьштәки öса нәкьн, wәки бьбьнә мәʹни кö әw бьра диса вәгәрʹә сәр хәйсәте хwәйи бәре (1 Корн. 6:9, 10). Һәрге әw бьра меванти бе мала мә, әме тʹö щар зоре wи нәкьн wәки ичʹке вәхwә, илаһи һәрге әwи сафи кьрийә кö ида вәнәхwә.

13. Чаwа Тимотʹейо мәсәла баш һишт кö qәдьре исафа мәрьвед майин бьгьрьн?

¹³ Чахе Тимотʹейо щаһьл бу, әw qайил бу wәки wи сьнәт кьн. Рʹаст ә әwи wе ешәкә чәтьн бькʹьшанда, ле йәкә әw qайил бу ве йәкерʹа, wәки Щьһу, кʹижанарʹа әw мьзгинийе бәла кә, нәлькʹöмьн. Тимотʹейо жи мина Паwлос нәдьхwәст дьле кәсәки бешинә (Кʹар. Шанд. 16:3; 1 Корн. 9:19-23). Ле тö жи һазьр и, бона кʹара мәрьвед майин qöрбана бьки?

ГЬҺИШТИБУНЕДА ПЕШДА ҺӘРʹЬН

14, 15. а) Чь те һʹәсабе гьһиштибун? б) Ча гьһиштибуна Мәсиһи һʹьзкьрьнева гьредайи йә?

¹⁴ Һʹәму Мәсиһи гәрәке сәр хwә бьхәбьтьн wәки «һинбунед пешьнә сәр Мәсиһ алики бьһельн», у «бенә сәр һинбуна гьһишти» (Ибрн. 6:1). Ле әw йәк хwәха найе стандьн. Әм гәрәке гьһиштибунеда тʹьме һе пешда һәрʹьн. Бона ве йәке, әм гәрәке занәбун у фәʹмкʹарийа хwә һе зедә кьн. Ве йәкеда wе али мә бькә хwәндьна Кʹьтеба Пирозә һәррʹожи (Зәб. 1:1-3). Ле wә хwәрʹа нет данийә wәки һәр рʹож Кʹьтеба Пироз бьхуньн? Һәрге һун öса бькьн, һуне һе кʹур фәʹм кьн qанун у принсипед Йаһоwа.

¹⁵ Qанунәкә лапә мәзьн бона Мәсиһийа әw һәйә qануна һʹьзкьрьне. Иса готә шагьртед хwә: «Бь ве йәке һʹәмуйе заньбьн һун шагьртед мьн ьн, һәгәр һун һәвдö һʹьз бькьн» (Йуһʹн. 13:35). Аqуб сәр һʹьзкьрьне гот «qануна Пʹадшатийе» (Аqуб 2:8). Ле Паwлос гот: «Һʹьзкьрьн сәре Qануне дьгьрә» (Рʹом. 13:10). Әw гьлийед qәwи дәрһәqа һʹьзкьрьне лайиq ьн, чьмки Кʹьтеба Пироз дьбежә кö «Хwәде һʹьзкьрьн ә» (1 Йуһʹн. 4:8). Һʹьзкьрьна Хwәде бь кьред wи те кʹьфше. Йуһʹәнна ньвиси: «Бь ве йәке һʹьзкьрьна Хwәде һьндава мәда хöйа бу, гава кö әwи Кöрʹе хwәйи Тайе Тʹәне шандә дьнйайе, wәки әм бь wи бьжин» (1 Йуһʹн. 4:9). Бәле, бь ве йәке Хwәде һʹьзкьрьна хwә избат кьр. Чахе әм һʹьзкьрьне һьндава Йаһоwа, Кöрʹе wи у һьндава хушк-бьра дьдьнә кʹьфше, öса жи һьндава мәрьвед дьн, әм избат дькьн кö әм Мәсиһийед гьһишти нә (Мәт. 22:37-39).

16. Чахе әм дьбьнә Мәсиһийед гьһишти, чьрʹа принсипед Хwәде бона мә һе зәʹф qимәт дьбьн?

¹⁶ Чахе һун бьбьнә Мәсиһийед гьһишти, һуне фәʹм кьн wәки принсипед Хwәде бона wә һе фәрз у qимәт ьн. Qанун бона дәрәщед конкрет ьн, ле принсип бона щурʹә-щурʹә дәрәща дькарьн бьдьнә хәбате. Мәсәлә, һәрге щаһьл фәʹм накә кö чьqас хоф ә тʹәви мәрьвед нәбаш һәвалтийе бькә, де-бавед сәрwахт wе синора wирʹа дайньн wәки wи хwәй кьн (1 Корн. 15:33). Ле гава зарʹ дьбә гьһишти, һʹьш-аqьле wи те гöһастьне у әw ида дькарә принсипед Кʹьтеба Пироз фәʹм кә у һьлдә һʹәсаб. Öса әw wе сафикьрьнед билани бькә кö һәвалед рʹаст хwәрʹа бьжберә. (Бьхунә 1 Корьнтʹи 13:11; 14:20.) Чахе әм дьфькьрьн сәр принсипед Хwәде, исафа мә дьбә рʹебәре һе рʹаст у баш, кʹижан кö ль гора ньһерʹандьна Хwәде йә.

17. Чьрʹа әм дькарьн бежьн, wәки бал мә һʹәму тьшт һәйә сәва сафикьрьнед билани бькьн?

¹⁷ Бал мә һʹәму тьшт һәйә чь кö лазьм ә сәва әм сафикьрьнед öса бькьн кö Йаһоwа хwәш тен. Qанун у принсипед жь Хәбәра Хwәде, али мә дькьн «бона һʹәму кьрьнед qәнщ һазьр сәкьни» бьн (2 Тимтʹ. 3:16, 17). Принсипед жь Кʹьтеба Пироз дькарьн али мә бькьн кö әм тедәрхьн чь йә qьрара Йаһоwа у әw чь дьфькьрә (Әфәс. 5:17). Хwәрʹа бькьн хәйсәт wәки һʹәму һащәтед бона леколинкьрьне бьдьнә хәбате, мәсәлә «Индекса Әʹдәбийәта Бьрща Qәрәwьлийе», «Рʹебәрийа Леколинкьрьне бона Шәʹдед Йаһоwа», «Кʹьтебханәйа Бьрща Qәрәwьлийе» (Watchtowеr Library), «КʹЬТЕБХАНӘЙА ОНЛАЙН йа Бьрща Qәрәwьлийе», у «JW Кʹьтебханә app» (JW Library app). Чахе әм әwан һащәта бьдьнә хәбате, әме һе зәʹф кʹаре бьстиньн жь һинбуна хwәйә шәхси у жь qöльхкьрьна тʹәви малбәте.

ИСАФА ПЕ КʹЬТЕБА ПИРОЗ ҺИНКЬРИ КʹӘРӘМА ТИНӘ

18. Әме чь кʹаре бьстиньн һәрге qанун у принсипед Хwәде бьдьнә хәбате?

¹⁸ Чахе әм qанун у принсипед Йаһоwа тиньн сери, әʹмьре мә бь кʹәрәма у шабуне тʹьжә дьбә. Зәбур 119:97-100-да те готьне: «Һинкьрьна Тә чьqаси әз һʹьз дькьм! Тʹәмамийа рʹоже әз сәр wе дьфькьрьм. Әʹмьред Тә мьн жь нәйара сәрwахттьр дькьн, чьмки һәр тʹьм әw тʹәви мьн ьн. Әз жь һʹәму дәрсдаред хwә билантьр бумә, чьмки фькьред мьн сәр тʹәмийед Тә нә. Жь каләмера аqьлтьр бумә, чьмки хwәй дькьм qәйдә-qанунед Тә». Һәрге әм хwәрʹа wәʹдә башqә дькьн сәва бьфькьрьн сәр qанун у принсипед Хwәде, әме бь билани у фәʹмкʹарийе тьшта бькьн. У гава әм исафа хwә пе qанун у принсипед Йаһоwа һин кьн, әме «бьбьнә мәрьвед гьһишти, хут wәкә бәжьн-бала Мәсиһ» (Әфәс. 4:13).