Әwи Дькарьбу Кʹәрәмед ХWәде Бьстанда

ДӘСТПЕКА НӘБАШ

Баве Рʹәһобоwам Сьлеман бу, кʹижан кö 40 сала сәр Исраеле пʹадшати дькьр (1 Пʹадш. 11:42). Сьлеман сала 997 Б.Д.М., мьр, у һьнге Рʹәһобоwам жь Оршәлиме чу Шәкәме сәва wи бькьнә пʹадша (2 Дир. 10:1). Дьqәwьмә Рʹәһобоwам дьтьрсийа кö дьбә пʹадша, чьмки баве wи Сьлеман навдар бу пе биланийа хwә, ле ньһа ида әwи гәрәке биланийа хwә избат кьра wәʹде сафикьрьна чәтьнайа.

Рʹәһобоwам тʹәхмин дькьр, wәки Исраеледа тьштәки нәбаш wе бьqәwьмә. Һьнә wәʹдә дәрбаз бу, щьмәʹт һат бал wи у газьне хwә wи кьрьн: «Баве тә нире мә дьжwар кьр у хьзмәта баве тәйи дьжwар у нире wи йе гьране кö данийә сәр мә, ньһа тö сьвьк бькә у әме тәрʹа кʹоләтийе [бәрдәстийе] бькьн» (2 Дир. 10:3, 4).

Рʹәһобоwам тʹәвһәвбу, у ньзаньбу чь бькьра. Һәрге әwи хwәстьна щьмәʹте бьанийа сери, әwи малбәта хwәва у йед кö qәсьра wида бун, дькарьбун һәбук у тьштед qимәт öнда кьрана. Алики дьнва жи, һәрге әwи хwәстьна wан пьшт гöһе хwәва бьавита, щьмәʹт wе мьqабьли wи рʹабуйа. Ле гәло әwи чь кьр? Әw пешийе чу бал ширәткʹаред баве хwә, йед кö әʹмьрда мәзьн бун. Ле паше әw чу бал щаһьлед кö әʹмьрда qаси wи бун. Әwи ширәтед wан щаһьла qәбул кьр, у сафи кьр wәки тʹәви щьмәʹте сәрт бә. Әwи щаба wан öса да: «Баве мьн нире wә гьран кьр; ле бәле әзе бь сәр wева бьхьм; баве мьн wә бь qамчийан пʹәрwәрдә кьр; ле бәле әзе wә бь тупьшканва пʹәрwәрдә бькьм!» (2 Дир. 10:6-14).

Ве йәкеда әм дькарьн хwәрʹа дәрсе һин бьн. Әшкәрә йә кö әме һе зәʹф кʹаре бьстиньн, һәрге гöһ бьдьнә мәрьвед әʹмьрда мәзьн, йед кö рʹöһʹанида гьһишти нә. Әw мәрьв әʹмьрда щерʹьбанди нә, ләма жи әwана дькарьн бежьн, wәки кʹижан сафикьрьн wе чь ахьрийе бинә, у әwана wе сәр һʹиме ве йәке ширәтед баш бьдьн (Иб. 12:12).

WАНА «ГОТЬНА ХÖДАН ГÖҺДАРИ КЬРЬН»

Рʹәһобоwам ордийа хwә һазьр кьр, wәки мьqабьли щьмәʹта рʹабәр дәркʹәвә. Ле Йаһоwа кʹәтә нава wи шьхöли у бь Шәмайа пʹехәмбәр жерʹа гот: «Һуне дәрнәкʹәвьн у ль дьжи бьрайед хwә лаwед Исраелрʹа щәнге [шәрʹ] нәкьн; вәгәрʹьн, бьра һәр кәс һәрʹә мала хwә! Жь бәр кö әв тьшт жь мьн бу!» (1 Пʹадш. 12:21-24).a

Бьдьнә бәр чʹәʹве хwә, Рʹәһобоwам дьбәкә чьqас бәрхwә кʹәт, чахе әw йәк бьһист. Дьqәwьмә әw хwәрʹа дьфькьри кö щьмәʹт wе чь бежә, нә әwи әwана данә тьрсандьне кö wе wана пе qамчийа щәза кә, ле ньһа жи тьштәки нькарә бькә (Бәрамбәр кьн 2 Дирок 13:7.) Йәкә Рʹәһобоwам ордийа хwәва «готьна Хöдан гöһдари кьрьн у ль гор готьна Хöдан вәгәрʹийан у рʹийа хwәва чун».

Әм жь ве йәке чь дәрсе һин дьбьн? Wе аqьлайи бә, wәки әм тʹьме гöрʹа Хwәде бькьн, һьнге жи һәрге бона ве йәке мәрьв wе qәрфа мә бькьн. Чахе әм гöрʹа Хwәде дькьн, әм qәбулкьрьн у кʹәрәмед wи дьстиньн (Qан. Дщр. 28:2).

Ле Рʹәһобоwам чь кʹәрәм сьтанд кö гöрʹа Хwәде кьр? Әwи диса жи пʹадшатийа хwә бәрдәwам кьр сәр бәрәка Щьһуда у Бьнйамина. Хенщи ве йәке, әwи дәстпекьр територийа хwәда шәһәред тʹәзә ава кә. Әwи әw шәһәр «бь зедәйи зәхьманд [qәwи кьр]» (2 Дир. 11:5-12). Йа лапә фәрз әw бу, кö һьнге әwи гöрʹа qанунед Йаһоwа дькьр. Чахе пʹадшатийа дәһ бәрәки дәстпекьр хöданед qәлп бьһʹәбинә, жь wедәре гәләк мәрьв чунә Оршәлиме, сәва һʹәбандьна рʹастда пьштгьрийа Рʹәһобоwам бькьн (2 Дир. 11:16, 17). Рʹәһобоwам гöрʹа Йаһоwа кьр у ләма жи пʹадшатийа wи qәwи бу.

ГÖНӘ У ТʹОБӘКЬРЬНА РʹӘҺОБОWАМ

Чахе Пʹадшатийа wи qәwи бу, әwи шашикә мәзьн бәрʹда. Әwи qануна Йаһоwа пьшт гöһе хwәва авит у дәстпекьр хöданед qәлп бьһʹәбинә. Ле чьрʹа? Дьqәwьмә әw кʹәтә бәр байе дийа хwә йа кö Амони бу (1 Пʹадш. 14:21). Фьрqи тʹöнә мәʹни чь бу кö әwи öса кьр, ле йазьх тʹәмамийа щьмәʹте чʹәʹв да wи. Ләма жи Йаһоwа öса кьр, wәки пʹадше Мьсьре Шишак гәләк шәһәред Щьһуда зәфт кә. Рʹаст ә Рʹәһобоwам шәһәред хwә qәwи кьрьбу, ле әwе йәке рʹе Шишак нәгьрт (1 Пʹадш. 14:22-24; 2 Дир. 12:1-4).

Һʹале Рʹәһобоwам һе хьраб бу гава Шишак гьһиштә Оршәлиме, кʹидәре Рʹәһобоwам пʹадшати дькьр. Һьнге Шәмайа пʹехәмбәр әʹламәтийа Хwәде, Рʹәһобоwамрʹа у сәрокед wирʹа гот: «Wә мьн бәрда, жь бәр вейа йә кö мьн жи wә бь дәсте Шишаква бәрда». Ле гәло ча Рʹәһобоwам хwә да кʹьфше гава әw гьли бьһист? Әw пʹошман бу. Кʹьтеба Пирозда те готьне: «Сәрокед Исраеле у qьрал хwә ньмьз кьрьн у: Хöдан бь дади йә! готьн». Ләма жи Йаһоwа Рʹәһобоwам хьлаз кьр у Оршәлим жи wеран нәбу (2 Дир. 12:5-7, 12).

Паши ве йәке, Рʹәһобоwам бәрдәwам дькьр пʹадшатийе бькә сәр пʹадшатийа башуре. Гәләк кöрʹед Рʹәһобоwам һәбун, у паши мьрьна хwә әwи wанрʹа гәләк пʹешкʹеш бәла кьр. Әwи дьбәкә öса кьр, чьмки дьхwәст wәки әwана мьqабьли бьре хwә Әбийа дәрнәкʹәвьн, кʹижан кö гәрәке бьбуйа пʹадша (2 Дир. 11:21-23). Әw йәк алийе wида һе аqьлайи бу, нә кö чаwа әwи щаһьлтийеда кьр.

РʹӘҺОБОWАМ ЙӘКИ QӘНЩ БУ ЙАН ХЬРАБ?

Рʹаст ә Рʹәһобоwам һьнә тьштед qәнщ кьр, йәкә әwи qәбулкьрьна Хwәде öнда кьр. Кʹьтеба Пироз дьбежә: «[Әwи] тьште кö хьраб ә кьр». Ле чьрʹа? Чьмки әwи дьле хwәда Йаһоwа нәдьгәрʹийа (2 Дир. 12:14).

Бьфькьрьн кö әм чь дькарьн һин бьн жь сәрһатийа Рʹәһобоwам. Әwи щара гöрʹа Хwәде дькьр у һьнә тьштед баш жи бона щьмәʹта Йаһоwа кьр. Ле һәләqәтийа wи тʹәви Йаһоwа сьст бу у хwәстьна wи qайим нибу, wәки дьле Хwәде ша кә. Ләма жи әwи тьштед нәрʹаст кьр у кʹәтә нава пʹутпʹарьстийе. Дьqәwьмә һун пьрсе дьдьнә хwә: «Чахе Рʹәһобоwам гöрʹа Хwәде дькьр, гәло мәʹни әw бу кö әw бь дьл пʹошман дьбу бона шашийед хwә у дьхwәст дьле Хwәде ша кә, йан чьмки мәрьва жерʹа дьгот?» (2 Дир. 11:3, 4; 12:6). Рʹәһобоwам мина кальке хwә Даwьд Пʹадша нибу. Әwи әʹмьре хwәда паше диса тьштед нәрʹаст кьр. Бәле, Даwьд жи әʹмьре хwәда шаши бәрʹдан. Ле йәкә әwи тʹәмамийа жийина хwәда бь дьл у щан Йаһоwа у һʹәбандьна рʹаст һʹьз дькьр, у һʹәлал гöнед хwә дьани рʹуйе хwә (1 Пʹадш. 14:8; Зәб. 51:1, 17; 63:1).

Жь сәрһатийа Рʹәһобоwам әм дькарьн рʹасти жи гәләк тьшта һин бьн. Әм гьшк гәрәке мьqати нәфәред хwә бьн у шьхöләки һежа бькьн. Ле сәва кö Йаһоwа жь мә рʹази бә, тʹәне әw йәк бәс нинә. Лазьм ә әм wи öса бьһʹәбиньн ча дьле wи дьхwазә у гәрәке һәләqәтийа мә тʹәви wи qәwи бә.

Әwе йәке әм дькарьн бькьн һәрге qайим Йаһоwа һʹьз бькьн. Чаwа кö дар наһелә wәки агьр весә, öса жи әм гәрәке һʹьзкьрьна хwә һьндава Йаһоwа qәwи хwәй кьн бь ве йәке кö Хәбәра wи леколин бькьн, сәр бьфькьрьн у дöа кьн (Зәб. 1:2; Рʹом. 12:12). Әw һʹьзкьрьна qайим wе мә һелан кә, wәки бь дьл у щан wан тьшта бькьн, кʹижан кö дьле wи ша дькьн. Öса жи әw һʹьзкьрьн wе али мә бькә, wәки чахе әм шашийа дькьн һʹәлал тʹобә кьн. Öса әме нәбьнә мина Рʹәһобоwам, ле әме һʹәта хьлазийе амьн бьминьн Йаһоwарʹа (Щьһуд. 20, 21).