Чьрʹа Әм Гәрәке Ширәта Бьхԝазьн?

1. Сәва кӧ әм сафикьрьнед билан бькьн у пешдачуйи бьн, әм гәрәке чь бькьн? (Мәтʹәлок 13:10; 15:22)

ӘМ ГЬШК дьхԝазьн сафикьрьнед билан бькьн у пешдачуйи бьн. Хәбәра Хԝәдеда те готьне, кӧ әм гәрәке чь бькьн, ԝәки бьгьһижьнә ԝан нета (Бьхунә Мәтʹәлок 13:10; 15:22).

2. Йаһоԝа чь соз дьдә мә?

² Ширәткʹаре һәри баш һәмьки Йаһоԝа йә. Әԝ соз дьдә мә: «Чʹәʹве Мьне ль сәр тә бә, тә ширәт кьм» (Зәбур 32:8). Жь ве рʹезе әм фәʹм дькьн, кӧ Йаһоԝа нә тʹәне ширәта дьдә мә, ле ӧса жи дина ԝи сәр мә йә у әԝ али мә дькә ширәтед ԝи биньн сери.

3. Ве готареда әме чь пебьһʹәсьн?

³ Ве готареда әме щабед ван чар пьрса жь Кʹьтеба Пироз бьстиньн: 1) Сәва кӧ әз жь ширәта кʹаре бьстиньм, әз гәрәке йәки ча бьм? 2) Кʹе дькарә ширәтед баш бьдә мьн? 3) Әз ча дькарьм нишан кьм, кӧ әз һазьр ьм ширәта ԛәбул кьм? 4) Чьрʹа әз гәрәке жь кәсед дьн нәхԝазьм ԝәки әԝана дәԝса мьн сафикьрьна бькьн?

ӘЗ ГӘРӘКЕ ЙӘКИ ЧА БЬМ?

4. Сәва кӧ жь ширәта кʹаре бьстиньн, әм гәрәке мәрьвед чаԝа бьн?

⁴ Сәва кӧ әм жь ширәта кʹаре бьстиньн, лазьм ә кӧ әм мьлук у шкәсти бьн. Әм гәрәке биньн сәр хԝә, кӧ әм нә һаԛас щерʹьбанди нә у занәбуна мә жи һаԛас тʹӧнә, ԝәки әм хԝәха сафикьрьнед билан бькьн. Һьм жи һәрге мәрʹа ширәт бе дайине, ле әм мьлук у шкәсти нибьн, ширәт ԝе кʹаре мәрʹа нәйнә, у Йаһоԝа ԝе нькарьбә али мә бькә (Миха 6:8; 1 Пәтрус 5:5). Ле һәрге әм мьлук у шкәсти бьн, әме ширәтед кӧ сәр һʹиме Кʹьтеба Пироз мәрʹа тенә дайине, ԛәбул кьн у кʹаре бьстиньн.

5. Даԝьд мәрьвәки чаԝа бу?

⁵ Ԝәрә әм дина хԝә бьдьнә сәрһатийа Даԝьд Пʹадша. Әԝ йәки гәләк пешдачуйи бу, ле диса жи әԝ нәбу йәки бабах. Гәләк сал пешийа кӧ әԝ бьбуйа пʹадша, әԝ сазбәндәки һостә бу. Жь ԝи һәла һе хԝәстьн ԝәки әԝ бәр Шаԝул Пʹадша чәнге хә (1 Самуйел 16:18, 19). Чахе Йаһоԝа әԝ ча пʹадша паши Шаԝул бьжарт, Әԝи рʹӧһʹе пироз да ԝи (1 Самуйел 16:11-13). Әԝ йәки навдар бу, чьмки Голйатʹ у дьжмьнед дьн кӧштьбу (1 Самуйел 17:37, 50; 18:7). Һәрге Даԝьд ԛӧрʹә буйа, дьбәкә бьфькьрийа кӧ нәлазьм ә гӧһ бьдә ширәтед кәсед дьн. Ле Даԝьд йәки ӧса нибу.

6. Әм жь кʹӧ заньн, кӧ Даԝьд һазьр бу гӧһ бьдә ширәта? (Ӧса жи бьньһерʹьн шькьл.)

⁶ Чахе Даԝьд бу пʹадша, әԝи тʹәви ԝан мәрьва, йед кӧ ширәт дьданә ԝи, һәвалти дькьр (1 Дирок 27:32-34). Әв йәк әʹщебмайи нинә, чьмки һәла һе пешийа кӧ әԝ бьбуйа пʹадша жи, әԝ тʹьме һазьр бу гӧһ бьдә ширәта. Әԝи нә тʹәне гӧһ дьда ширәтед мера, ле ӧса жи гӧһ дьда ширәтед жьна. Мәсәлә, әԝи гӧһ да ширәта кʹӧлфәтәкә бь наве Абигайл. Мере ԝе, Набал, йәки беԛәдьр, бешекьр у хԝәһʹәз бу. Даԝьд ширәта ԝе ԛәбул кьр, ләма жи шашикә мәзьн нәкьр (1 Самуйел 25:2, 3, 21-25, 32-34).

7. Әм жь сәрһатийа Даԝьд чь дькарьн һин бьн? (Ԝаиз 4:13) (Бьньһерʹә ӧса жи шькьл.)

⁷ Гәло әм жь сәрһатийа Даԝьд чь дькарьн һин бьн? Дьбәкә һьнә һʹӧнӧред мә йан жи щабдарийед мәйә фәрз һәбьн. Ле диса жи әм гәрәке нәфькьрьн, кӧ әм һәр тьшти заньн у һʹәԝще ширәта ниньн. Мина Даԝьд әм жи гәрәке һазьр бьн гӧһ бьдьнә ширәта, фьрԛи тʹӧнә кӧ кʹе ширәте дьдә мә (Бьхунә Ԝаиз 4:13). Һәрге әм ӧса бькьн, әме хԝә жь шашийед гьран хԝәй кьн, йед кӧ дькарьн мә у кәсед дьн бькьнә бәлайе.

КʹЕ ДЬКАРӘ ШИРӘТЕД БАШ БЬДӘ МӘ?

8. Йонатʹан чьрʹа мәрьвәки лайиԛ бу кӧ ширәте бьдә Даԝьд?

⁸ Әм дькарьн жь сәрһатийа Даԝьд дәрсәкә дьн жи һин бьн. Әԝи гӧһ дьда ширәтед ԝан мәрьва, йед кӧ незики Йаһоԝа бун у ԝана рʹьнд фәʹм дькьр, кӧ әԝ рʹасти чь чәтьнайа те. Мәсәлә, гава әԝи дьхԝәст бьзаньбә һәла мәщал һәйә кӧ әԝ диса тʹәви Шаԝул Пʹадша һәв бе йан на, Даԝьд жь кӧрʹе Шаԝул, Йонатʹан, ширәт хԝәст. Йонатʹан чьма мәрьвәки лайиԛ бу, кӧ ширәте бьдә Даԝьд? Чьмки Йонатʹан һьм хьзмәткʹарәки Йаһоԝайи амьн бу, һьм жи әԝи баве хԝә, Шаԝул, рʹьнд нас дькьр (1 Самуйел 20:9-13). Гәло әм жь ве йәке чь дәрсе һин дьбьн?

9. Ԝе баш бә кӧ әм жь кʹе ширәта бьхԝазьн? Шьровәкә (Мәтʹәлок 13:20).

⁹ Гава әм дьхԝазьн ԝәки кәсәк ширәте бьдә мә, ԝе баш бә әм жь мәрьвед ӧса бьхԝазьн, йед кӧ һьм хьзмәткʹаред Йаһоԝайи амьн ьн, һьм жи ве дәрәщеда рʹасти кʹижани кӧ тӧ һати, щерʹьбанди нәa (Бьхунә Мәтʹәлок 13:20). Мәсәлә, бьдә бәр чʹәʹве хԝә кӧ бьраки щаһьл хушкәкә лайиԛ дьгәрʹә ԝәки бьзәԝьщә. Гәло кʹе дькарә ширәтед баш бьдә ԝи? Рʹаст ә кәсе азәп, йе кӧ сәр һʹиме Кʹьтеба Пироз ширәта дьдә, дькарә тьштед керһати бежә. Ле дьбәкә ԝе дьһа баш бә ԝәки әԝ ширәте бьхԝазә жь щотәкә зәԝьщи, кӧ ида чәнд сал ә зәԝьщи нә у бәхтәԝар ьн, һьм жи ԝи рʹьнд нас дькьн. Әԝана ԝе бькарьбьн нә тʹәне сәр һʹиме принсипед Кʹьтеба Пироз, ле ӧса жи сәр һʹиме мәсәла зәԝаща хԝә ширәта бьдьн.

10. Ньһа әме чь шеԝьр кьн?

¹⁰ Мә шеԝьр кьр кӧ кʹижан дӧ һʹӧнӧр мәрʹа лазьм ьн у кʹе дькарә ширәтед баш бьдә мә. Ньһа әме бьвиньн кӧ әм ча дькарьн нишан кьн, ԝәки әм һазьр ьн ширәта ԛәбул кьн. Ӧса жи әме пебьһʹәсьн кӧ чьма нәбаш ә, ԝәки әм бьхԝазьн кӧ кәсед дьн дәԝса мә сафикьрьна бькьн.

ӘЗ ЧА ДЬКАРЬМ НИШАН КЬМ КӦ ӘЗ ҺАЗЬР ЬМ ШИРӘТА ԚӘБУЛ КЬМ?

11-12. а) Дьбәкә әм щарна чь бькьн? б) Гава Рʹәһобоԝам Пʹадша сафикьрьнәкә фәрз гәрәке бькьра, әԝи чь кьр?

¹¹ Щарна ӧса те кʹьфше, те бежи кәсәк ширәте дьхԝазә, ле бь рʹасти әԝи сафикьрьн ида кьрийә у әԝ тʹәне дьхԝазә ԝәки кәсед дьн пьштгьрийа сафикьрьна ԝи бькьн. Кәсе ӧса һазьр нинә ширәта ԛәбул кә. Ԝе баш бә ԝәки әԝ бинә бира хԝә кӧ чь һатьбу сәре Рʹәһобоԝам Пʹадша.

¹² Рʹәһобоԝам паши баве хԝә Сьлеман бу сәрԝере мьләте Исраеле. Һʹале мьләт баш бу, ле әԝана дьфькьрин ԝәки Сьлеман баре ԝан гьран кьрьбу. Ләма жи ԝана жь Рʹәһобоԝам рʹәща кьр, ԝәки әԝ баре ԝан сьвьк кә. Рʹәһобоԝам ԝанрʹа гот, кӧ ԝирʹа һьнәк ԝәхт лазьм ә сәва кӧ бьфькьрә у сафикьрьне бькә. Серида әԝи тьштәки баш кьр, чьмки әԝи жь рʹуспийед кӧ щәм Сьлеман бун, ширәт хԝәст (1 Пʹадшати 12:2-7). Ле әԝи ширәта ԝан инкʹар кьр. Гәло чьрʹа? Дьбәкә Рʹәһобоԝам хԝәха ида сафи кьрьбу кӧ чь бькә, у әԝи тʹәне дьхԝәст ԝәки кәсәк пьштгьрийа сафикьрьна ԝи бькә. Ләма жи гава әԝи жь щаһьлед ԛаси хԝә ширәт хԝәст у щаба ԝан ль гора дьле ԝи бу, әԝ ша бу (1 Пʹадшати 12:8-14). Рʹәһобоԝам ль гора ширәта ԝан щаба щьмәʹте да. Ахьрийеда мьләт пʹарәвәбу, у жь ԝе дәме Рʹәһобоԝам сәре хԝә кьрә хәта-бәлайе (1 Пʹадшати 12:16-19).

13. Әм ча дькарьн тедәрхьн, һәла әм бь рʹасти һазьр ьн ширәта ԛәбул кьн йан на?

¹³ Әм дькарьн жь сәрһатийа Рʹәһобоԝам Пʹадша чь һин бьн? Гава әм жь кәсәки ширәте дьхԝазьн, әм гәрәке һазьр бьн кӧ ве ширәте ԛәбул кьн. Гәло әм ча дькарьн тедәрхьн, һәла әм ӧса дькьн йан на? Мәсәлә, әм дькарьн жь хԝә бьпьрсьн: «Гава әз ширәте дьхԝазьм у әв нә ль гора дьле мьн ә, гәло әз ве ширәте инкʹар дькьм?» Ԝәрә әм мәсәләке шеԝьр кьн.

14. Гава мәрʹа ширәт те дайине, гәрәке әм чь бир нәкьн? Мәсәле бинә. (Бьньһерʹә ӧса жи шькьл.)

¹⁴ Бьдә бәр чʹәʹве хԝә, ԝәки бьраки хәбатәкә гәләк баш хԝәрʹа дитийә. Пешийа кӧ ԛайил бә ве хәбате ԛәбул кә, әԝ жь рʹуспики ширәте дьхԝазә. Бьра рʹуспирʹа дьбежә кӧ һәрге әԝ ве хәбате ԛәбул кә, ԝирʹа ԝе лазьм бә щар-щара сәр ԝәхтәкә дьреж жь малбәта хԝә дур бьминә. Рʹуспи тинә бира ԝи кӧ ль гора Кʹьтеба Пироз, щабдарийа ԝийи сәрәкә ча сәре малбәте әв ә, кӧ бона рʹӧһʹанийа малбәта хԝә хәм бькә (Әфәси 6:4; 1 Тимотʹейо 5:8). Ле гьлийед рʹуспи ԝи хԝәш найен, ләма жи әԝ дьчә у жь бьред дьн дьпьрсә һʹәта кӧ әԝ ширәта ль гора дьле хԝә бьстинә. Гәло әԝ бьра бь рʹасти ширәте дьгәрʹә, йан әԝи ида сафикьрьн кьрийә у тʹәне дьхԝазә кӧ кәсәк тʹәви ньһерʹандьна ԝи ԛайил бә? Бир нәкә ԝәки дьл хапинок ә (Йерәмйа 17:9). Щарна ширәта кӧ мәрʹа бь рʹасти лазьм ә, ширәтәкә ӧса йә кӧ ԛә мә хԝәш найе.

ГӘЛО ԜЕ БАШ БӘ КӦ КӘСЕД ДЬН ДӘԜСА МЬН САФИКЬРЬНА БЬКЬН?

15. Әм гәрәке чь нәкьн у чьрʹа?

¹⁵ Лазьм ә кӧ һәр кәс хԝәха сафикьрьна бькә (Галати 6:4, 5). Чаԝа мә дит, пешийа кӧ әм сафикьрьнәке бькьн, ԝе баш бә кӧ әм жь Кʹьтеба Пироз у жь хушк-бьред гьһишти ширәта бьхԝазьн. Ле әм гәрәке жь ԝана нәхԝазьн, кӧ дәԝса мә сафикьрьна бькьн. Мәсәлә, һьнә кәс рʹастә-рʹаст жь ԝи мәрьви, ԛәдьре кʹижани дьгьрьн, дьпьрсьн: «Һәрге тӧ дәԝса мьн буйайи, тәйе чь бькьра?» Һьнә кәс жи дьԛәԝьмә рʹастә-рʹаст напьрсьн, ле чʹәʹв дьдьнә сафикьрьна кәсед дьн, дәԝса кӧ хԝәха дәрһәԛа ԝе йәке кʹур лекʹолин кьн.

16. Щьвата Корьнтʹеда Мәсиһийа дәрһәԛа гоште пʹутарʹа ԛӧрбанкьри гәрәке чь сафи кьрана? (1 Корьнтʹи 8:7; 10:25, 26)

¹⁶ Ԛьрʹна йәкеда лазьм бу кӧ хушк-бьред щьвата Корьнтʹеда сафи кьрана, ԝәки гоште кӧ дьԛәԝьмә пʹутарʹа һатьбу ԛӧрбанкьрьне, бьхԝьн йан на. Паԝлосе шанди ԝанрʹа ӧса ньвиси: «Әм заньн кӧ пʹут тьштәк нинә, у тʹәне Хԝәдек һәйә» (1 Корьнтʹи 8:4). Ләма жи һьнә хушк-бьра дьфькьрин кӧ проблем нинә, ԝәки әԝана гоште кӧ пʹутарʹа һатьбу ԛӧрбанкьрьн у паше базареда дьһатә фьротане, бьхԝьн. Ле исафа һьнә кәса изьн нәдьда ԝәки ви гошти бьхԝьн (Бьхунә 1 Корьнтʹи 8:7; 10:25, 26). Әв йәк сафикьрьнәкә шәхси бу. Паԝлосе шанди тʹӧ щара Корьнтʹийарʹа нәготьбу, кӧ әԝана гәрәке дәԝса кәсед дьн сафикьрьна бькьн, йан жи чʹәʹв бьдьнә сафикьрьна кәсед дьн. Әԝи ԝанрʹа гот, кӧ һәр йәк жь ԝан «ԝе бона хԝә бәр Хԝәде щабе бьдә» (Рʹомайи 14:10-12).

17. Чь дькарә бьԛәԝьмә һәрге әм мина кәсед дьн сафикьрьна бькьн? (Бьньһерʹә ӧса жи шькьл.)

¹⁷ Әм жи иро дькарьн рʹасти дәрәща ӧса бен. Мәсәлә, ԝәрә әм дәрһәԛа фьраксийед хуне бьфькьрьн. Һәр кәс гәрәке хԝәха сафи кә, кӧ ԝан фьраксийа ԛәбул кә йан на.b Дьԛәԝьмә мәрʹа һеса нинә дәрһәԛа фьраксийед хуне рʹьнд фәʹм кьн, ле диса жи щабдарийа мә һәр кәси йә хԝәха ве пьрсе сафи кьн (Рʹомайи 14:4). Һәрге әм тʹьме мина кәсед дьн сафикьрьна бькьн, әме тʹӧ щара нәбьнә мәрьвнә билан. Ләма жи сәва кӧ әм исафа хԝә һин кьн, әм гәрәке хԝәха сәр һʹиме Кʹьтеба Пироз сафикьрьна бькьн (Ибрани 5:14). Бона ве йәке, әм гәрәке бәри пешьн хԝәха лекʹолине бькьн. Һәрге диса жи мәрʹа аликʹари лазьм бә, кӧ фәʹм кьн кʹижан принсипед Кʹьтеба Пироз дәрәща мәва гьредайи нә, һәмьки әм дькарьн жь хушк йан бьраки гьһишти ширәте бьхԝазьн.

ТʹЬМЕ ШИРӘТЕ БЬХԜАЗӘ

18. Йаһоԝа Хԝәде бона мә чь кьрийә?

¹⁸ Йаһоԝа итʹбарийа хԝә мә тинә у изьне дьдә кӧ әм хԝәха сафикьрьна бькьн. Ча Баве мәйи дьлован, әԝ бь сайа Кʹьтеба Пироз али мә дькә, кӧ әм бькарьбьн сафикьрьнед баш бькьн. Ӧса жи әԝи һәвалед билан данә мә, йед кӧ дькарьн али мә бькьн принсипед Кʹьтеба Пироз рʹаст фәʹм кьн у ль гора ван принсипа бьжин (Мәтʹәлок 3:21-23). Әм ча дькарьн бьдьнә кʹьфше, кӧ әм бона аликʹарийа Йаһоԝа рʹази нә?

19. Әм ча дькарьн дьле Йаһоԝа ша кьн?

¹⁹ Гава де-бав дьвиньн кӧ зарʹед ԝан мәзьн дьбьн у дьбьнә хьзмәткʹаред Йаһоԝайи билан, у һазьр ьн али кәсед дьн бькьн, әԝана гәләк ша дьбьн. Мина ве йәке, гава Йаһоԝа дьвинә кӧ әм һеди-һеди рʹӧһʹанида пешда дьчьн, һазьр ьн ширәта ԛәбул кьн у сафикьрьнед билан дькьн, дьле ԝи жи гәләк ша дьбә.