Әм Гәрәке Ча Ширәта Бьдьн?

1. Кʹе гәрәке ширәта бьдә? Шьровәкә.

ГӘЛО тӧ һʹәз дьки ширәта бьди? Әв йәк һьнәкарʹа һеса йә, һьнәкарʹа жи чәтьн ә. Чь жи һәбә, щарна лазьм ә кӧ әм ширәта бьдьн. Гәло чьма? Чьмки Иса готьбу, кӧ шагьртед ԝи ԝе пе һʹәзкьрьна нав ԝанда бенә наскьрьне (Йуһʹәнна 13:35). Гава хушк йан бьраки мә һʹәԝще ширәте йә, әм гәрәке ԝанрʹа ширәте бьдьн, чьмки әм ԝана һʹәз дькьн. Кʹьтеба Пирозда те готьне, кӧ «ширьнайа һәвалтийе жи жь ширәтед ԛәнщ» те (Мәтʹәлок 27:9).

2. Рʹуспи гәрәке чь бькьн, у чьма? (Ӧса жи бьньһерʹьн чаргоша бь наве «Ширәтед сәр Щьвина Бьжин у Хьзмәт кьн».)

² Илаһи рʹуспи гәрәке ширәта бьдьн. Бь сайа Иса, Йаһоԝа ԝана ча шьван кʹьфш кьрьнә, ԝәки бона щьвате хәм бькьн (1 Пәтрус 5:2, 3). Әԝана ве йәке дькьн гава пе готара дәрдькʹәвьн, у бь сайа ԝан готара ширәтед сәр һʹиме Кʹьтеба Пироз дьдьн. Әԝана ӧса жи башԛә ширәта дьдьнә мә, гава әм һʹәԝщә нә. Рʹуспи ӧса жи али ԝан хушк-бьра дькьн, йед кӧ жь щьвате дур кʹәтьнә, ԝәки вәгәрʹьнә щәм Йаһоԝа. Гәло ча рʹуспи у ӧса жи һәр кәс жь мә дькарьн ширәтед баш бьдьн?

3. а) Әм ча дькарьн бьбьнә ширәткʹаред баш? (Ишайа 9:6; ӧса жи бьньһерʹьн чаргоша бь наве «Гава Ширәта Дьдьн, Чʹәʹв Бьдьнә Иса».) б) Әме жь ве готаре чь пебьһʹәсьн?

³ Сәва кӧ әм ширәтед баш бьдьн, әм гәрәке мәсәлед хьзмәткʹаред Хԝәдейә бәре лекʹолин кьн, илаһи мәсәла Иса. Кʹьтеба Пироз Иса нав дькә «Ширәткʹаре Пʹьрʹ Баш» (Бьхунә Ишайа 9:6). Ве готареда әме бьвиньн, кӧ һәрге кәсәк жь мә ширәте бьхԝазә, әм чь дькарьн бькьн. Ӧса жи әме пебьһʹәсьн, кӧ әм чь дькарьн бькьн чахе дьвиньн кӧ лазьм ә ширәте бьдьнә ԝи кәси, йе кӧ ширәт жь мә нәхԝәстийә. Хенщи ве йәке, әме пебьһʹәсьн кӧ чьԛас фәрз ә ԝәки әм ԝәʹде лайиԛда у бь щурʹе рʹаст ширәта бьдьн.

ГАВА ЖЬ МӘ ШИРӘТЕ ДЬХԜАЗЬН

4-5. Һәрге кәсәк жь мә ширәте бьхԝазә, бәри пешьн әм гәрәке жь хԝә чь бьпьрсьн? Мәсәле бинә.

⁴ Гава кәсәк жь тә ширәте дьхԝазә, гәрәке тӧ чь бьки? Дьбәкә тӧ ша би, чьмки һәвале тә баԝәрийа хԝә тә тинә. Дьԛәԝьмә тӧйе бьхԝази дәрберʹа али ԝи бьки. Ле пешийа кӧ ширәте бьди, жь хԝә бьпьрсә: «Гәло щерʹьбандьн у занәбуна мьн һаԛас һәйә, ԝәки әз ширәте бьдьме?» Дәԝса кӧ ширәте бьди, щарна дьһа баш ә һәвале хԝә бьшини бал кәсе щерʹьбанди, йе кӧ дькарә бона дәрәща ԝи ширәта керһати бьдә ԝи.

⁵ Ԝәрә мәсәләки шеԝьр кьн. Бьдә бәр чʹәʹве хԝә, ԝәки һәваләки тә гьран нәхԝәш кʹәтийә. Әԝ тәрʹа дьбежә кӧ дәрһәԛа щурʹә-щурʹә методед ԛәнщкьрьне лекʹолин кьрийә. Ньһа әԝ жь тә дьпьрсә, һәла ль гора ньһерʹандьна тә, кʹижан метода ԛәнщкьрьне дьһа баш ә. Дьԛәԝьмә ньһерʹандьна тәйә шәхси дәрһәԛа ве пьрсе һәйә, ле тӧ һʹәким нини у ньзани кӧ кʹижан ԛәнщкьрьн ԝе бона ԝи дьһа баш бә. Ве дәрәщеда лапи баш әв ә, ԝәки тӧ али ԝи бьки дохдьрәки щерʹьбанди бьвинә, йе кӧ дькарә нәхԝәшийа ԝи ԛәнщ кә.

6. Пешийа кӧ әм ширәте бьдьн, ԝе баш бә әм чь бькьн?

⁶ Һәрге жи тӧ дьфькьри кӧ епʹещә щерʹьбанди йи сәва кӧ бона фьлан дәрәще ширәте бьди, ԝе дьһа баш бә ләзә-ләз ширәте нәди. Гәло чьма? Мәтʹәлок 15:28-да те готьне кӧ «дьле йе рʹаст ль сәр щабдайине дьфькьрә». Һәрге жи тӧ дьфькьри кӧ щабе зани, йәкә ԝе дьһа баш бә кӧ тӧ лекʹолина бьки, дӧа бьки у кʹур бьфькьри. Һәрге тӧ ӧса бьки, ширәта тә ԝе дьһа незики ньһерʹандьна Йаһоԝа бә. Ԝәрә әм биньн бира хԝә кӧ чь һатьбу сәре Натʹан пʹехәмбәр.

7. Жь сәрһатийа Натʹан пʹехәмбәр әм дькарьн чь һин бьн?

⁷ Даԝьд Пʹадша Натʹан пʹехәмбәррʹа бәʹса хԝәстьна хԝә кьр кӧ бона Йаһоԝа пʹарьстгәһе ава кә. Натʹан, дәԝса кӧ пешийе ньһерʹандьна Йаһоԝа пебьһʹәсийа, дәрберʹа Даԝьдрʹа гот кӧ бьра авакьрьне дәстпекә. Ле паше пеһʹәсийа, ԝәки Йаһоԝа нәдьхԝәст, кӧ Даԝьд пʹарьстгәһе ава кә (1 Дирок 17:1-4). Жь ве сәрһатийе әм фәʹм дькьн кӧ гава кәсәк жь мә ширәте дьхԝазә, ԝе баш бә ԝәки әм ләз нәкʹәвьн щабе бьдьн (Аԛуб 1:19).

8. Пешийа кӧ әм ширәтәке бьдьн, гәрәке әм чь бькьн?

⁸ Мәʹникә дьн жи һәйә кӧ чьма лазьм ә фәсал ширәта бьдьн: Һәрге кәсәк жь бо ширәта мә сафикьрьнәкә нәбаш бькә, йа кӧ ахьрийа хьраб бинә, дьбәкә әм жи нәһәԛ бьн. Гәло дьһа баш нинә әм рʹьнд бьфькьрьн пешийа кӧ ширәта бьдьн?

ЧА ШИРӘТА БЬДЬН, ГАВА ЖЬ МӘ НАПЬРСЬН

9. Пешийа кӧ рʹуспи ширәте бьдьн, әԝана гәрәке чь рʹьнд бьзаньбьн? (Галати 6:1)

⁹ Һәрге хофи һәйә кӧ хушк йан бьрак «гавәкә шаш бавежә», щарна лазьм ә ԝәки рʹуспи хԝәха ширәте бьдьне (Бьхунә Галати 6:1). Кәсе ӧса дьԛәԝьмә һе гӧнә нәкьрийә, ле рʹуспи дьвиньн кӧ әԝ һеди-һеди жь рʹийа рʹаст дур дькʹәвә. Ләма жи нета ԝан әв ә, кӧ али ви кәси бькьн сәр рʹийа жийине бьминә (Аԛуб 5:19, 20). Ле бәле, сәва кӧ һʹӧкӧме ширәта ԝан һәбә, әԝана гәрәке рʹьнд бьзаньбьн һәла әԝи кәси бь рʹасти гавәкә шаш авитийә йан на, чьмки Йаһоԝа изьне дьдә һәр кәси ль гора исафа хԝә сафикьрьна бькә (Рʹомайи 14:1-4). Ле һәрге кәсәки бь рʹасти жи гавәкә шаш авитьбә у рʹуспи сафи кьн кӧ жерʹа ширәте бьдьн, әԝана гәрәке ве йәке чь щурʹәйи бькьн?

10-12. Рʹуспи ча дькарьн ширәте бьдьнә ԝи мәрьви, йе кӧ ширәт нәхԝәстийә? Мәсәле бинә. (Бьньһерʹә ӧса жи шькьл.)

¹⁰ Бона рʹуспийа һеса нинә ширәте бьдьнә ԝи мәрьви, йе кӧ ширәт нәхԝәстийә. Гәло чьма? Паԝлосе шанди готьбу кӧ кәсәк дькарә «беһʹәмде хԝә гавәкә шаш бавежә». Ле пешийа кӧ рʹуспи ширәте бьдьнә кәсе ӧса, ԝе баш бә кӧ әԝана ԝи кәси һазьр кьн.

¹¹ Ширәте бьдьнә ԝи мәрьви, йе кӧ ширәт нәхԝәстийә, бәрамбәри шьхӧле щоткʹарәки дьбә, кӧ дьхԝазә әʹрде һʹьшкда тʹохьм бьрʹәшинә. Пешийа кӧ әԝ тʹохьм бьрʹәшинә, әԝ гәрәке әʹрд щот кә, ԝәки нәрм бә. Паше әԝ дькарә тʹохьм бьрʹәшинә у ав дә. Мина ве йәке, пешийа кӧ рʹуспик ширәте бьдә, әԝ гәрәке «әʹрд» һазьр кә. Мәсәлә, әԝ дькарә ԝи мәрьвирʹа бежә кӧ әԝ ԝи һʹәз дькә у дьхԝазә дәрһәԛа тьштәки хәбәр дә. Һәрге рʹуспи ча кәсе һʹәйф у дьлован те наскьрьне, хушк-бьрарʹа ԝе дьһа һеса бә ширәтед ԝи ԛәбул кьн.

¹² Сәва кӧ «әʹрд» дьһа нәрм бә, рʹуспи дькарә бежә кӧ һәр кәс шашийа дькә у щарна һʹәԝще ширәта йә (Рʹомайи 3:23). Бь дәнгәки рʹьһʹәт у бь ԛәдьр, рʹуспи дькарә жь Кʹьтеба Пироз нишани ԝи кәси кә, кӧ әԝи гавәкә шаш авитийә. Һәрге әԝ бинә сәр хԝә кӧ шаши кьрийә, рʹуспи дькарә «тʹохьм бьрʹәшинә», демәк бь гьлийед һеса ԝирʹа зәлал кә кӧ әԝ ча дькарә проблема хԝә сафи кә. Паше рʹуспи дькарә «ав дә», демәк жь дьл пʹайе ԝи бьдә у тʹәви ԝи дӧа бькә (Аԛуб 5:15).

13. Сәва мәрьв ширәта кӧ ԝирʹа те дайине фәʹм кә, рʹуспи дькарьн чь бькьн?

¹³ Щарна дьԛәԝьмә кәсәк ширәта кӧ жерʹа те дайине, рʹаст фәʹм нәкә. Рʹуспи дькарьн чь бькьн сәва кӧ ӧса нәԛәԝьмә? Мәсәлә, әԝана дькарьн бь ԛәдьр у бь тактики пьрса бьдьнә ԝи мәрьви, кʹижанирʹа кӧ ширәте дьдьн, сәва кӧ дина ԝи бькʹьшиньнә сәр тьштед сәрәкә (Ԝаиз 12:11). Щабед ԝи ԝе нишани рʹуспийа кьн, һәла әԝи ширәта ԝан фәʹм кьр йан на.

ԜӘʹДЕ ЛАЙИԚ У БЬ ЩУРʹЕ РʹАСТ ШИРӘТА БЬДЬН

14. Гава әм һерс ьн, ԝе чьма баш бә кӧ әм ширәте нәдьн?

¹⁴ Әм гьшк ԛьсурдар ьн, ләма жи щарна әм бь гьли йан кьред хԝә дьле кәсед дьн дешиньн (Колоси 3:13; Әфәси 4:26). Гава әм һерс ьн, ԝе дьһа баш бә кӧ әм ширәте нәдьн, «чьмки һерса мерьв рʹастийа Хԝәде найнә сери» (Аԛуб 1:20). Һәрге әм һерсә-һерс ширәте бьдьн, дәрәщә ԝе дьһа хьраб бә. Әв йәк һәмьки найе һʹәсабе кӧ әм гәрәке ԝи кәсирʹа кӧ дьле мә ешандийә, нәбежьн ԝәки әм чь дьфькьрьн у чь тʹәхмин дькьн. Ле пешийа кӧ әм тьштәки бежьн, ԝе баш бә һивийе бьн һʹәта кӧ һерса мә дайнә. Дина хԝә бьдьне, кӧ Әлиһу ча ширәт да һәвале хԝә Ибо.

15. Әм жь мәсәла Әлиһу чь һин дьбьн? (Бьньһерʹә ӧса жи шькьл.)

¹⁵ Ибо гәләк рʹож жь бӧхданед кӧ һәвалед ԝийи ԛәлп давитьнә ԝи, хԝә дьпʹараст, у Әлиһу гӧһ дьда ԝан. Дьле Әлиһу сәр Ибо дьшәԝьти, ле әԝ һерс кʹәт жь бо ве йәке кӧ Ибо дәрһәԛа Йаһоԝа тьштед нәрʹаст хәбәр да у бь зедәйи дина хԝә дьда һʹале хԝә. Диса жи, Әлиһу һивийа дора хԝә сәкьни у паше бь нәрми у бь ԛәдьр ширәт да Ибо (Ибо 32:2; 33:1-7). Жь ве мәсәле әм дәрсәкә фәрз дьстиньн: Сәва кӧ ԛәԝата ширәтәке һәбә, әв гәрәке ԝәʹде лайиԛ у бь щурʹе рʹаст бе дайине, демәк бь ԛәдьр у һʹәзкьрьне (Ԝаиз 3:1, 7).

ШИРӘТА ҺЬМ БЬДЬН ҺЬМ ЖИ ԚӘБУЛ КЬН

16. Әм жь Зәбур 32:8 чь һин дьбьн?

¹⁶ Ль гора рʹеза сәрәкә, Йаһоԝа ‹мә ширәт дькә› у ‹чʹәʹве ԝи ль сәр мә йә› (Бьхунә Зәбур 32:8). Әв йәк дьдә кʹьфше кӧ әԝ бәрдәԝам дькә али мә бькә. Әԝ нә кӧ тʹәне ширәта дьдә, ле ӧса жи али мә дькә ԝәки әм ль гора ван ширәта бьжин. Гәло нәлазьм ә кӧ әм жи ӧса бькьн? Гава әм гәрәке кәсәкирʹа ширәте бьдьн, ԝәрә әм ӧса жи ԝи кәси ԛәԝи кьн у али ԝи бькьн кӧ әԝ пешдачуйи бә.

17. Рʹуспийед кӧ сәр һʹиме Кʹьтеба Пироз ширәта дьдьн, бәрамбәри чь дьбьн? Шьровәкә. (Ишайа 32:1, 2)

¹⁷ Жь бо ве йәке кӧ әм рʹожед хьлазийеда дьжин у әʹмьр чәтьн ә, лазьм ә кӧ әм ширәтед баш бьдьн у бьстиньн (2 Тимотʹейо 3:1). Рʹуспийед кӧ сәр һʹиме Кʹьтеба Пироз ширәта дьдьн, мина канийед аве нә әʹрде зьһада (Бьхунә Ишайа 32:1, 2). Һәвалед кӧ заньн әм чь дьхԝазьн бьбьһен, ле диса жи чь лазьм ә мәрʹа дьбежьн, гәләк ԛимәт ьн, ширәта ԝан «мина сева зерʹин ә ль сәр зив ԛашкьри» (Мәтʹәлок 25:11). Ԝәрә әм бәрдәԝам кьн биланийа хԝә зедә кьн, ԝәки ширәтед баш һьм бьдьн, һьм жи ԛәбул кьн!